¹ Mazmur. Kekantaren i wee em pentahbisan em Bait Suci. Waki si Daud. Niaku ku laa lumo’or Nikoo, eeh TUHAN, karengan Nikoo koo kimeongome niaku minatas wo reiy’ minee se kesaru-kesaruku mepa’a-pa’ar witu niaku ² TUHAN, Empungku, wia-Nikoo niaku marekeiy makitulung, wo Nikoo koo lime’osola niaku. ³ TUHAN, Nikoo koo minopomi niaku waki kaoatan ne tou minate, Nikoo koo timoula niaku witu nelet nea se timumpame waki ruragh eng kubur. ⁴ I kantarola e mazmur i wee si TUHAN, heiy tou-tou se i koupus-Nala, wo i sempe mola en syukur witu e ngaran-Na kudus! ⁵ Karengan esa nga edo i te Sia meupi’, ta’an esa nga umur em patou-touan Sia si mura ate; eng kelabotan em bengi wawean name’an, melelaa memo’odo kinalinga’an merio-rio. ⁶ Witu eng kasenaangangku niaku ku limila’: “Niaku ku reiy’ laa moghe i wee eng keure-urena!” ⁷ TUHAN, eng karengan Nikoo koo minepa’arla, Nikoo koo timampa mola niaku waki atas eng kuntung te’etep; eng katoroan Nikoo nu kimirongla eng gio-Mu, niaku ku neiy i kasenge’. ⁸ Wia-Nikoo, eeh TUHAN, niaku maaleiy, wo wia si Tuhanku niaku makiwee: ⁹ “Sapa ku’a re’en e nuntungna sa e raa’ku i katoa’, sa aku tumumpa mea waki ghorem ko’okor eng kubur? Toro ku’a re’en e riawu syumukur wia-Nikoo wo mabarla eng kelale’an-Nu? ¹⁰ Linganouw, TUHAN, wo i koupusola niaku, TUHAN, mamuali mouw tumetulungku!” ¹¹ Niaku si ma’arip rinoba-Mu mola minamuali tou si mengengke-ngengket, e roko mengasi’ku e winuka’-Mu mola, rereenangku e wina’akes-Mu ampit e mepa’a-pa’ar, ¹² rio e imukurku eng kumantarla mazmur i wee-Nikoo wo te’a makapenes en tou. TUHAN, Empungku, i wee eng keure-urena niaku pa’ar mekekantarla en syukur i wee-Nikoo.