1 Waki si Daud. TUHAN nyi’a mouw si terangku wo kelawirangku, wia si seiy ku’a re’en niaku lewo’ sa reiy’ meide’? TUHAN nyi’a mouw si benten em patou-touangku, witu si seiy ku’a re’en aku lewo’ sa reiy’ tumenggo’ogho’? 2 Katoroan se lumelewo’-lumelewo’ nu rumego niaku kaa laa mekekaan e le’onaku, nyi’a i yi’i em baya ne kasu’usukeku wo se kesaruku, nisea nuesa mouw se neiy i kare’esok wo ka’anu. 3 Ma’anouw tu’u se suraro dumasing kumepung niaku, reiy’ meide’ e nateku; ma’anouw tu’u tu lumentut em paseke’an mesaru niaku, witu eng kapualitan i ti’i tu’u niaku ku minena-ena’ ma’eman. 4 E nesa kapualitan eng kiniweeku mola wia si TUHAN, ni’itu mouw ni’i kepa’arkula: mena’ witu em bale ni TUHAN esa nga umur em patou-touangku, lumoo’ola eng kamura’an ni TUHAN wo kumeipila em bait-Na. 5 Karengan Nisia si timerungla niaku witu e lekouw-Na witu e nedo bahaya; Sia si kimirongla niaku witu em kekirongan waki dasing-Na, Sia si minopo niaku mea waki atas eng kuntung watu. 6 Takar en teakan taga’ mouw eng kokongku, limatouwla se kesaruku esa nga kaledongku; witu en dasing-Na niaku ku pa’ar mesesempela tetule ampit e merio-rio; niaku ku pa’ar mekekantar wo mememazmur i wee si TUHAN. 7 Linganouw, TUHAN, e naleiy neiyku i pa’ayola, i koupusola aku wo wingkotenouw aku! 8 Nateku maki’itla e nuwu’-Mu: “Seronouw eng gio-Ku”; takar eng gio-Mu en seronku, eeh TUHAN. 9 Te’a mouw mekekirongla eng gio-Mu wia niaku, te’a mouw mesesede’ si hamba-Mu i yi’i ampit e nupi’; Nikoo mouw si tumetulungku, te’a meteterek niaku wo te’a mouw metetele’ula niaku, eeh Empung lumelawirku! 10 Ma’anouw tu’u si ama’ku wo si ina’ku tumele’ula niaku, ta’anouw si TUHAN si simungkul niaku. 11 I tudu’ mola e lalan-Mu wia niaku, eeh TUHAN, wo rawirenouw aku witu e lalan rampen eng karengan se kasu’usukeku. 12 Te’a mouw mesesarakan niaku witu en serit ne kesaruku, karengan timo’orouw marego niaku se sairi-sairi towo, wo se tou-tou se maasengla eng kawengi’isan. 13 Eng kaulitna, niaku ku ma’emanla laa lumoo’ eng kale’osan ni TUHAN waki wanua ne tou-tou se matou-tou! 14 Pa’ena’enola si TUHAN! Ente’enola wo te’etepenola natemu! Yon, pa’ena’enola si TUHAN!