¹ Waki si Daud. Weeanola ka’adilan wia niaku, eeh TUHAN, karengan niaku ku timou mouw witu eng kale’osan e nate; wia si TUHAN niaku ma’eman ampit e reiy’ meware-wareng. ² Ujinouw aku, eeh TUHAN, wo wa’awa’anouw aku; soisapenouw em batinku wo e nateku. ³ Karengan em berenku neiy i katuyu witu e nupus lale’-Mu, wo niaku ku matou-tou witu eng kaulitan-Nu. ⁴ Niaku ku reiy’ rimuber ampit se lumele’ekok, wo ampit se tou munafik niaku ku reiy’ makasewok; ⁵ niaku ku mari’iris wia em pinaeruran ne tou se masiwo lewo’, wo ampit se tou fasik niaku ku reiy’ rimuber. ⁶ Niaku ku minoas e lawasku eng kowa’ reiy’ simelok, laa o kumelang lumedongla e mezbah-Mu, eeh TUHAN, ⁷ kasuatan minapalingala eng kekantaren syukur ampit e menaleinteng, wo simusuiyla e reiy’ sa mina’asa em pasiwo-siwon-Nu e maka’erangen. ⁸ TUHAN, niaku ku rumendem witu em bale paena’an-Nu wo witu en tampa eng kamulian’an-Nu rimuber. ⁹ Te’a mouw mesesawut e nyawaku mewali-wali se tou makadosa, ka’apa em patou-touangku mewali-wali se tou menenoa’ raa’, ¹⁰ em bitu e lawasna eng kimerut em pasiwo-siwon sa’amek, wo e lawas lele’osna en simungkul e wewoko’. ¹¹ Ta’an niaku i yi’i ku matou-tou witu eng kale’osan e nate; i waya momi aku wo i koupusola aku. ¹² Ne’aku e rimedeiy witu en tana’ rampen; niaku ku pa’ar melelo’or si TUHAN witu se jema’ah.