¹ I wee si ma’aka-aka ne biduan. I ki’it e lagu: Rusa witu em beena, Mazmur ni Daud. Empungku, Empungku, ka’a Koo tumele’ula niaku? Niaku ku maaleiy, ta’an Nikoo koo minena-ena’ wa’akat wo reiy’ tumulung niaku. ² Empungku, ku mereke-kekeiy witu e nedo oat, ta’an Nikoo koo reiy’ mingkot, wo witu e nedo wengi, ta’an e reiy’ kangkasi aku lumompon. ³ E nulitna Nikoo mouw Si Kudus si maena’ waki atas em puji-pujian ne tou Israel. ⁴ Wia-Nikoo se nene moyang meiy ma’eman; nisea se ma’eman, wo Nikoo koo limiseiyla nisea. ⁵ Wia-Nikoo sea mengale-ngaleiy, wo nisea se neiy i kaliseiy; wia-Nikoo sea ma’eman, wo nisea se reiy’ maka’ato e nirang. ⁶ Ta’an niaku i yi’i ku witek wo e reiy’ tou, pasero’an ne tou kelaker. ⁷ Em baya se limoo’ niaku se menero-nero’ niaku, nisea se mawi’la en sumpingna, makuyungla eng kokongna: ⁸ “Nisia si minee en tou wia si TUHAN; ma’anouw Sia si lumiseiyi nisia, ma’anouw Sia si mayami nisia! Reiy’ ku’a re’en Sia si minepa’arla wia nisia?” ⁹ Yon, Nikoo si rimou’mi niaku waki gandongan; Nikoo si simiwo niaku aman witu em be’ewer ni ina’ku. ¹⁰ Wia-Nikoo niaku neiy i sarakan rengane’ niaku nu minatou, rengane’ witu eng gandongan ni ina’ku Nikoo mouw si Empungku. ¹¹ Te’a mouw mewa’akat waki niaku, karengan eng kasusa’an en tawi mouw, wo e reiy’la si tumulung. ¹² Laker se sapi raghar minuyuti niaku; banteng-banteng waki Basan se kimepung niaku; ¹³ nisea se ngimangala en semurna witu niaku tanu si singa si mera’akep wo manguang. ¹⁴ Tanu en dano niaku neiy i katoa’, wo e reiy’ sa mina’asa e ruiyku neiy i kapensoli waki kekusi’anna; nateku minamuali tanu e lilin, minakemu minerano witu eng gorem em be’ewerku; ¹⁵ Kaente’angku em pera tanu em pete’an eng kaca, lila’ku eng kimerut witu e langit-langit en sumaku; wo witu e riawu maut Koo rimeta’la niaku. ¹⁶ Karengan se asu-asu se minuyuti niaku, se rambangan lumelewo’ se kimepung niaku, nisea se timude’ e lawas wo ne’aku. ¹⁷ E reiy’ sa mina’asa ruiyku en toro rekenengku; nisea se ma’ato, nisea se matu’usla niaku. ¹⁸ Nisea se minemete-meteng e labungku witu nelet nea, wo nisea se limobo’ eng koba’ witu eng karaiyku. ¹⁹ Ta’an Nikoo, TUHAN, te’a mouw wa’akat; eeh kaente’angku, makarenganouw tumulung niaku! ²⁰ I waya momi niaku waki en santi, wo e nyawaku waki rerongkeman ni asu. ²¹ Lawirenomi niaku waki semur ni singa, wo waki sunge em benten. Nikoo koo miningkotouw niaku! ²² Niaku ku laa mememasyurla e ngaran-Nu wia se patuari-patuariku wo melo’o-lo’or Nikoo witu eng keuneran ne jema’ah: ²³ nikouw si meide’la si TUHAN, lo’orenouw Sia, heiy ne pakasa’an oki’ o puyun ni Yakub, mulianola Sia, wo meide’ mola witu Nisia, heiy ne pakasa’an oki’ o puyun ni Israel! ²⁴ Karengan Nisia si reiy’ maloo’ola hina ka’apa tu’u mapedam mari’iris em peme’itan ne tou se neiy i kalotoiy, wo Nisia si reiy’ mekekirongla eng gio-Na wia se tou i ti’i, wo Nisia si luminga eng katoroan sitou i ti’i nu rumekeiy makitulung wia-Nisia. ²⁵ Karengan Nikoo niaku ku melo’o-lo’or witu se jema’ah kasela; nazarku e laaku wearen witu en sinaru nea se meide’la Nisia. ²⁶ Sitou si kumeng ate si laa kumaan wo mawesu, sitou simasero si TUHAN si laa melo’o-lo’or Nisia; ma’anouw e natemu tumou i wee eng keurena! ²⁷ E reiy’ sa mina’asa tempokna em bumi e laa ghumenang nyia’ wo murikit wia si TUHAN; wo se reiy’ sa mina’as kaum waki se bangsa-bangsa se laa mongkot sumempe witu en sinaru-Na. ²⁸ Karengan si TUHANouw si makapunya eng keraja’an, Nisia mouw si maperenta witu se bangsa-bangsa. ²⁹ Yon, wia-Nisia se laa mongkot sumempe em baya ne tou se tingkeiy wia em bumi, witu en sinaru-Na se laa kumurur em baya ne tou se tumumpa witu eng gorem e riawu, wo se tou se reiy’ mete’u tumo’orong em patou-touan. ³⁰ Se oki-oki’ o puyun se laa rumaghes wia-Nisia, wo laa sumusuiyla en tanume si TUHAN wia se angkatan e laa meiy. ³¹ Nisea se laa mabarla eng ka’adilan-Na wia se bangsa se laa tumou eeh sangari, karengan Nisia si timuana mola nyi’a.