¹ I wee si ma’aka-aka ne biduan. Mazmur ni Daud. TUHAN, karengan eng kuasa-Mu mouw si raja si mepa’a-pa’ar; kumura eng kewangko’ e melaya-laya’na karengan eng kamenangan waki-Nikoo! ² Sapa e minamuali kepa’aran e natena e neiy mouw i karunia-Mula wia nisia, wo em pengiween en sumpingna e reiy’ neiy-Mu i sede’. S e l a (maseng) ³ Karengan Nikoo koo simungkul nisia ampit em berkat limokon; Nikoo koo minee e mahkota mas tu’a witu natas eng kokongna. ⁴ Patou-touan eng kiniweenami waki-Nikoo; Nikoo koo mineela nyi’a wia nisia, wo e numur pakatu’an i wee e mapawee-weena wo eng keure-urena. ⁵ Wangko’ eng kamulia’anna karengan eng kamenangan waki-Nikoo; kawangko’an wo eng kamulia’an neiy mouw i karunia-Mula wia nisia. ⁶ Yon, Nikoo si simiwo nisia minamuali berkat i wee e mapawee-weena; Nikoo koo minutala nisia e mepa’a-pa’ar witu en sinaru-Mu. ⁷ Karengan si raja si ma’eman wia si TUHAN, wo karengan e nupus o lale’ Ni Kasarakek nisia si reiy’ moghe. ⁸ Lawas-Mu e laa sume’u em baya ne kesaru-Mu; lawas lele’os-Mu e laa sume’u se tou-tou se mari’iris Nikoo. ⁹ Nikoo koo laa sumiwo nisea tanu e ramporan melaya-layas, witu e nedo Nikoo nu mapa’atola en tou, eeh TUHAN. Nupi’ ni TUHAN e laa lume’ouw nisea wo e napi e laa kumaan nisea. ¹⁰ Se see’ nea se laa punengen-Numi waki saruan em bumi, wo se oki’ o puyun nea waki elet ne oki-oki’ ni tou. ¹¹ Sakawisa sea laa mapa eiy eng kacilaka’an witu nikoo, metetiro’la e le’ekok wiles, nisea se reiy’ siketer. ¹² Yon, Nikoo koo laa sumiwo nisea tumingkasla en tou, ampit en tali worang-Mu Nikoo koo mesara eng gio nea. ¹³ Tumo’orouw, eeh TUHAN, witu eng gorem eng kuasa-Mu! Nikeiy keiy pa’ar mekekantarla wo mememazmurla eng kaente’an-Nu.