¹ I wee si ma’aka-aka ne biduan. Waki si hamba ni TUHAN, nyi’a i yi’i si Daud si mina’ayola e lelila’an eng kekantaren i yi’i wia si TUHAN, witu e nedo si TUHAN nu minaya momi nisia waki rerongkeman em baya ne kesaruna wo waki e lawas ni Saul. Sia si limila’: “Niaku ku meupusla Nikoo, eeh TUHAN, kaente’angku! ² Oh TUHAN, kentur watuku, reen petaangangku wo lumelawirku, Empungku, kuntung watuku, tampaku materung, kekelungku, sunge kelawirangku, kota bentenku! ³ Lino’orouw si TUHAN, naleiyku: takar niaku tu’u ku lawir waki se kesaruku. ⁴ Tali-tali maut en simoisapola niaku, wo en songker-songker kasa lewo’ en timoro mola niaku, ⁵ tali-tali eng kaoatan ne tou minate e limi’ikerola niaku, e we’etes- we’etes maut neiy i keta’an witu en saruanku. ⁶ Katoroan niaku nu witu eng kase’esekan, wia si Empungku niaku rumekeiy makitulung. Sia si limingame en suaraku waki bait-Na, e rekeiyku makitulung wia-Nisia e mina’ayo waki talinga-Na. ⁷ Laa o maoghe wo moghe mouw em bumi, wo en to’otolan-to’otolan eng kuntung matenggo’ogho’ wo maoghe, eng karengan e melaya-layas e nupi’-Na. ⁸ Nawun minumbungi waki sesepunan-Na, e napi masila’ rimou’mi waki suma-Na, waana e melayas e rimou’mi waki-Nisia. ⁹ 0 Sia si mineku’la e langit, laa o tumumpa, karibe’ebengan em bitu e wawa’ ne’a-Na. ¹⁰ Sia si mengali eng kerub, laa o tumelew wo merar witu natas eng kale’ekew e reghes. ¹¹ Sia si simiwo eng kareiydeman witu eng kaledong-Na minamuali kekirongan-Na, yon, e minamuali lekouw-Na: rano naro e reiydem, linaak eng kuraber. ¹² Karengan en sena’ witu en sinaru-Na i kaliongouw e linaak-linaak-Na minewali e naro eis wo em baana napi. ¹³ Takar si TUHAN si limenter waki langit, Si Kasarakek si minapalingala en suara-Na. ¹⁴ Neiy i waya-Name em panah-panah-Na, i ka’ayo neiy i sarakan-Nala sea, kerap e mangarero’orot, i ka’ayo kinaceu-Nala sea. ¹⁵ Laa o kaloo’anouw en to’otolan-to’otolan e lawanan, wo i kaongka’ mouw e na’ali’-na’ali’ eng kaoatan karengan e rekak-Mu, eeh TUHAN, karengan en sengoan e nasengan waki sesepunan-Nu ¹⁶ Sia si kima’apangi waki tampa rakek, minedo niaku, kimeongi niaku waki songker. ¹⁷ Sia si minayami niaku waki se kesaruku kegaga wo waki se tou-tou mari’iris niaku, karengan nisea se taleus ente’ i wee niaku. ¹⁸ Nisea se minontar niaku witu e nendo belotku, ta’an si TUHAN si minamuali tetebean i wee-Niaku; ¹⁹ Sia si minali niaku rimou’mi mea waki tampa pelas, Sia si limawirla niaku, karengan Nisia si minepa’arla wia niaku. ²⁰ TUHAN si matuanala niaku minatoroan ampit eng kaulitangku, Sia si simuli’ wia niaku e minatoroan ampit eng kasucian e lawasku, ²¹ karengan niaku ku minena-ena’ maki’itla e lalan ni TUHAN wo reiy’ mawinta’ fasik witu si Empugnku. ²² Karengan e reiy’ sa mina’asa e nukum-Na em bineeangkula ghenang, wo eng katataapan-Na e reiy’ neiy i wa’akatkula waki niaku; ²³ niaku ku mawinta’ reiy’ mapero witu en sinaru-Na, wo metayur en tou witu eng kaselokan. ²⁴ Kaa ni’itu si TUHAN si simuli’ wia niaku minatoroan ampit eng kaulitangku, e minatoroan ampit eng kasucian e lawasku witu en saruan em beren-Na. ²⁵ Witu se tou se lale’ Nikoo koo mawinta lale’, witu se tou e reiy’ sisering Nikoo koo mawinta’ reiy’ sisering, ²⁶ witu se tou suci Nikoo koo mawinta’ suci, ta’an witu se tou reko’ Nikoo koo mawinta’ e minererengkom. ²⁷ Karengan Nikoo mouw si limawirla se bangsa neiy i kalotoiy, ta’an se tou se matu’usla ampit en tingkeiy se neiy i kumeng-Mula. ²⁸ Karengan Nikoo mouw si simiwola en soloku simena’; TUHAN , Empungku, si timerangla eng kareiydemangku. ²⁹ Karengan ampit Nikoo niaku ku berani mesarula se rambangan, wo ampit si Empungku niaku ku berani kumompo’la em beton. ³⁰ Sapa tare si Empung, e lalan-Na e lekep; ta’ar ni TUHAN nyi’a mouw e murni; Nisia si minamuali kekelung em baya ne tou se timerung wia-Nisia. ³¹ Karengan seiy ku’a re’en si Empung sa reiy’ si TUHAN, wo seiy ku’a re’en si kuntung watu kacuali si Empung ta? ³² Empung Nisia mouw si mina’akes e rereenangku ampit eng kewaraneiyan wo simiwo e lalanku rimampen; ³³ si simiwo e ne’aku tanu e ne’a ni rusa wo simiwo niaku rimedeiy waki kakenturan; ³⁴ si minajar e lawasku maseke, i ka’ayo e lawasku en toro mengkurla em borang tambaga. ³⁵ Koo mineela wia niaku eng kekelung kelawiran-Nu, lawas lele’os-Mu en timobol niaku, kamura’an-Nu en simiwo niaku sela. ³⁶ Koo mineela en tampa pelas i wee eng ke’angku, wo em berenna e ne’aku e reiy’ moghe. ³⁷ Niaku ku mekeki’it se kesaruku i ka’ayo ku sumikop nisea, wo reiy’ murikiti nu reiy’pe’ sea ka’apungkula; ³⁸ niaku ku rimimu’umukla nisea, i ka’ayo sea reiy’ mouw mete’u tumo’or kasi; nisea se rimewa witu e wawa’ e ne’aku. ³⁹ Nikoo koo mina’akesola e rereenangku ampit eng kewaraneiyan kaa laa sumeke’; Nikoo koo timu’utukla witu e wawa’ eng kuasaku se tou se timo’or masu’usuk niaku. ⁴⁰ Koo simiwo se kesaruku timingkasi waki niaku, wo se tou-tou se mari’iris niaku se pinunengkula. ⁴¹ Nisea se marekeiy makitulung, ta’an e reiy’la si lumawirla, nisea se marekeiy wia si TUHAN, ta’an Nisia si reiy’ miningkot nisea. ⁴² Niaku ku gimiling nisea mina rinte’-rinte’ tanu e riawu witu en saruan e reghes, minansalela nisea tanu e liwota’ witu lalan. ⁴³ Nikoo koo limiseiyi niaku waki pemeroan ne rakyat; Nikoo si minopo niaku minamuali kapala witu se bangsa-bangsa; bangsa se reiy’ kasine’uangku se minamuali hambaku; ⁴⁴ tare mouw i te en talinga nea luminga, nisea se lale’ wia niaku; tou-tou wo’oseiy se tu’tuk masila’ niaku. ⁴⁵ Tou-tou wo’oseiy se kera weles wo rumou’mi waki kota rineen nea ampit e matenggo’ogho’. ⁴⁶ TUHAN si matou-tou! Lino’orouw si kuntung watuku, wo mulia mouw si Empung Lumelawirku, ⁴⁷ Empung, si simiwo mola sesuli’an i wee niaku, si timu’utukola se bangsa-bangsa witu e wawa’ eng kuasaku, ⁴⁸ si limiseiyomi niaku waki se kesaruku. Awes tare, Nikoo koo rimakekola niaku limantouwla nisea se timo’or mesaru niaku; Nikoo koo minaya momi niaku waki se tou se matuanala eng kawengi’isan. ⁴⁹ Kaa ni’itu niaku ku pa’ar mekekantarla en syukur i wee-Nikoo witu nelet ne bangsa-bangsa, eeh TUHAN, wo niaku ku pa’ar mekekantarla e mazmur i wee e ngaran-Nu. ⁵⁰ Sia si kimaruniala eng kelawiran wangko’ wia se raja se pinopo-Na, wo minapa’atola e nupus o lale’ wia se tou se ni’isu’-Nala, nyi’a i ti’i si Daud wo wia se oki’ puyunna i wee eng keurena.”