¹ Haleluya! Nuli-ulit, memazmur i wee si Empung ta ni’itu e nulit, awes tare e wangun, wo e waarouw melo’o-lo’or e ni’itu. ² TUHAN si minangun e Yerusalem, Sia si minerurla se tou-tou Israel neiy i keta’ata-ta’atas; ³ Sia si lime’osla se tou-tou repu’ ate wo simalipupu em pali’-pali’ nea; ⁴ Sia si timantula eng kelakerna ne sumesena’-sumesena’ wo timotor e ngaran-ngaran em baya nyi’a. ⁵ Wangko’ mouw si Tuhan ta wo limokon eng kaente’an, eng kasama’an-Na e reiy’ siniakaran. ⁶ TUHAN si timaga’la sumeup se tou-tou neiy i kalotoiy, ta’an kimumengla se tou-tou fasik i ka’ayo waki bumi. ⁷ Kumantarouw i wee si TUHAN ampit eng kekantaren syukur, memazmurouw i wee si Empung ta ampit eng kecapi! ⁸ Nisia, si minenetla e langit ampit e linaak-linaak, si simadiala e naro i wee em bumi, si simiwo eng kuntung-kuntung minapatoumi rukut. ⁹ Nisia, si minee kekaanen wia se tekapen, wia se oki-oki’ ne wara kokoak, se mengere-ngeret. ¹⁰ Sia si so’o wia eng kegaga’an ni kawalo, Sia si reiy’ senaang wia e ne’a ne tuama; ¹¹ TUHAN si senaang wia se tou-tou talo Nisia, wia se tou-tou maarapla e nupus lale’-Na. ¹² Sawa’enola si TUHAN, heiy Yerusalem, lo’orenouw si Empungmu, heiy Sion! ¹³ Karengan Nisia si time’etepla eng kelam em pepalen leloangannu, wo minerkatla se oki-oki’mu witu e neletmu. ¹⁴ Sia si mineela eng kasejahtera’an wia en daerahmu wo minesula nikoo ampit eng gandum kasa le’os. ¹⁵ Sia si mina’ayola em perenta-Na mea waki bumi; ampit e minakarengan e nuwu’-Na matingkas. ¹⁶ Sia si timumpami en salju tanu em bu’uk ni domba wo simerala e leleiydem kimete tanu e riawu. ¹⁷ Sia si limawami e rano watu tanu em pete’an-pete’an. Seiy ku’a re’en si taang rumedeiy sumarula eng ge’egher-Na? ¹⁸ Sia si mina’ayola e nuwu’-Na, laa o rumanola em baya nyi’a, Sia si simengomi e reghes-Na, takar en dano e maso’oso’. ¹⁹ Sia si minabarla e nuwu’-Na wia si Yakub, katataapan-katataapan-Na wo e nukum-ukum-Na wia se Israel. ²⁰ Sia si reiy’ simiwo en tuana wia se reiy’ sa mina’asa bangsa, wo e nukum-ukum-Na e reiy’ kasine’uan nea. Haleluya!