¹ Haleluya! Lo’orenouw si TUHAN, heiy imukurku! ² Niaku ku laa mememuliala si TUHAN eng keurean niaku nu matou-tou, wo mememazmur i wee si Empungku eng keurean naiku nu wia. ³ Te’a mouw ma’eman wia em baya se bangsawan, wia se oki’ ni tou se reiy’ mete’u meela kelawiran. ⁴ Sakawisa e nyawana e merar, sia si mareng mea waki tana’; witu e nendo i ti’i kangkasi minere’i mouw e maksut-maksutna. ⁵ Ma’aruiyola sitou si makapunyala si Empung ni Yakub tanume si tumetulung, narapanna e wia si TUHAN, Empungna: ⁶ Sia si simiwola e langit wo em bumi, en tasik wo e reiy’ sa mina’asa pumpunena; si minena-ena’ lale’ i wee eng keure-urena, ⁷ si minalinto’orla eng ka’adilan i wee se tou-tou pineras, si minee roti wia se tou-tou maarem. TUHAN si minayami se tou-tou kinakurungan, ⁸ TUHAN si minuka’ em beren ne tou-tou rapa, TUHAN si timaga’la se tou se neiy i katu’utuk, TUHAN si meupusla se tou-tou ulit. ⁹ TUHAN si metayur se tou-tou wo’oseiy, se oki’ ula wo se balu se neiy i taga’-Nala sumeup, ta’an e lalan ne tou fasik e neiy i reko’-Nala. ¹⁰ TUHAN i ti’i si Raja i wee eng keure-urena, Empungmu, eeh Sion, see’ o see’! Haleluya!