¹ Waki si Daud. Lino’orouw si TUHAN, kuntung watuku, si timuru’ e lawasku kaa laa tumokol, wo en tetudu’-tetudu’ku kaa laa sumeke’; ² si minamuali tampa paterungangku wo rereen petaangangku, kota bentenku wo lumelawirku, kekelungku wo tampa niaku nu materung, si timu’utukla se bangsa-bangsa witu e wawa’ eng kuasaku! ³ Oh TUHAN, sapa ku’a re’en sitou i ti’i, i ka’ayo koo maweela ghenang nisia, wo sioki’ ni tou, i ka’ayo Koo minaparekenla nisia? ⁴ Tou si masuat tanu e reghes, e nendo-nendona tanu eng kumalenoan-kumalenoan e melangkoiy. ⁵ Oh TUHAN, peku’enola e langit-Mu wo tumumpa mouw, lelerenouw eng kuntung-kuntung, i ka’ayo mawun! ⁶ Wa’alengomi eng kerap-kerap wo i sarakanola sea, i reta’ momi em panah-panah-Mu, i ka’ayo sea i kaserok! ⁷ I kaya’ momi e lawas-Mu waki tampa rakek, i waya momi aku wo i reta’ momi aku waki songker, waki lawas ne tou-tou wo’oseiy, ⁸ en sumana matotorla e le’ekok wo e lawas lele’osna nyi’a mouw e lawas lele’os towo. ⁹ Oh Empung, niaku ku laa mekekantarla eng kekantaren weru i wee-Nikoo, ampit eng gambus mapulu’ tali niaku ku laa mememazmur i wee-Nikoo, ¹⁰ Nikoo si mineela kamenangan wia se raja-raja, wo si minayami si Daud, hamba-Mu! ¹¹ I waya momi niaku waki santi cilaka wo i wayamomi niaku waki lawas ne tou-tou wo’oseiy, en sumana e matotorla e le’ekok, wo e lawas lele’osna nyi’a mouw e lawas lele’os towo. ¹² Satorona se oki-oki’ tuama ta se tanu en tanemen-tanemen se tumouw mewangko’ witu e nedo kamudana; wo se oki-oki’ wewene ta se tanu en tobol-tobol ruuna, em pina’at i wee em bangunan istana! ¹³ Satorona eng godong-godong ta e wuta, marou’mi e minegheghioan barang; satorona se membe’ domba ta se mamuali mangariwu-riwu, mangalaksa-laksa waki padang-padang ta! ¹⁴ Satorona se lembu sapi ta se wuta o wuter; satorona e reiy’la kapo’opolan wo reiy’la kera’araghan, wo reiy’la rekeiyan waki pelein-pelein ta! ¹⁵ Ma’aruiyola se bangsa se tuana eng ka’adanna! Ma’aruiyola se bangsa si Empungna nyi’a mouw si TUHAN!