¹ Mazmur ni Daud. Oh TUHAN, niaku ku maaleiy wia-Nikoo, meiy mouw makrengan wia niaku, weeanouw talinga witu en suaraku, e nedo niaku nu maaleiy wia-Nikoo! ² Ma’anouw en sombayangku nyi’a mouw i wee-Nikoo tanu en sesempe weweun tinunu, wo e lawasku neiy i kaayat tanu en sesempe tetule witu e nedo mawengindo. ³ Pategha’enola en sumaku, eeh TUHAN, tumayurouw witu em pepalen en sumpigku! ⁴ Te’a mouw i pa’ewe’la e nateku wia e lewo’, kaa laa metetuanala em pasiwo-siwon – pasiwo-siwon e fasik mewali-waliampit se tou-tou matuanala eng kalewo’an; wo te’a aku me’an e langiyu-langiyu nea. ⁵ Ma’anouw se tou ulit se tume’etek wo mukum niaku, ni’itu mouw e nupus; ta’an te’a mouw e lana ne tou fasik lumo’orla eng kokongku! E nuli-ulit niaku ku reiy’ maena-ena’ masombayang mapero eng kalewo’a-kalewo’an nea. ⁶ Sakawisa sea i sarakan wia se akim-akimna, takar nisea se laa luminga, kaa e lelila’an-lelila’angku e makasenaangen. ⁷ Tanu em batu kinewe’ wo eng kinemula witu en tana’, tuana mouw e laa mangasesera e ruiy-ruiy nea witu en suma eng kaoatan ne tou minate. ⁸ Ta’an wia-Nikoo mouw, eeh EMPUNG, Tuhanku, em berenku neiy i katuyu; wia-Nikoo mouw aku materung, te’a i pepepesikla niaku! ⁹ Terunganola niaku witu en seso’okepan em be’etes neiy nea i ta’an witu niaku, wo waki torak ne tou-tou se matuanala eng kalewo’an. ¹⁰ Tou-tou fasik se laa i ka’anu minakarengan witu eng gorem em pure’eket nea, ta’an niaku ku make’ang maleas.