¹ I wee si ma’aka-aka ne biduan. Mazmur ni Daud. TUHAN, Nikoo koo masoisapla wo sumine’u niaku; ² Nikoo koo mete’ula sa aku rimuber ka’apa rimedeiy, Nikoo koo makasilighi eng genangku waki rou’. ³ Nikoo koo masoisap niaku sa aku makelang ka’apa ghimoleiy, e reiy’ sa mina’asa lalanku Nikoo si mete’ula. ⁴ Karengan nu reiy’pe’ e lila’ku rumou’mi lelila’an, eng kaulitna, em baya nyi’a eng kinete’uan-Nu mola, eeh TUHAN. ⁵ Waki muri wo waki rerior Nikoo koo kimurung niaku, wo Nikoo koo minee e lawas-Mu witu natasku. ⁶ Taleus maka’erangen i wee niaku en tine’u i ti’i, taleus rakek, reiy’ makawoo aku ma’ayola nyi’a. ⁷ Mea wisa aku toro mea mewewa’akatla e roh-Mu, mea wisa aku toro tumingkasi waki sinaru-Mu? ⁸ Sa aku sumosore mea waki langit, Nikoo koo maname; sa aku meela en tampa tetekelangku waki kaoatan ne tou minate, witula tu’u Nikoo. ⁹ Sa aku tumelew ampit en tetelew em beena, wo sumiwo paena’an waki tempok en tasik, ¹⁰ o kangkasi maname e lawas-Mu laa rumawir niaku, wo e lawas lele’os-Mu en tumiboiy niaku. ¹¹ Sa aku lumila’: “Ma’anouw eng kareiydeman i te e morongi niaku, wo en terang esa nga kaledongku mamuali wengi,” ¹² takar eng kareiydeman tu’u e reiy’ makareiydemen i wee niaku, wo em bengi mamuali terang tanu e noat; kareiydeman e masuat tanu en terang. ¹³ Karengan Nikoo mouw si minentuk e wu’ana e rereenangku, limuwir niaku witu eng gandongan ni ina’ku. ¹⁴ Niaku ku masyukur wia-Nikoo karengan eng kinememualiku eng kahebat wo maka’erangen; maka’erangen sapa en siniwo-Mu, wo e imukurku e nuli-ulit minena’asla nyi’a. ¹⁵ Ruiy-ruiyku e reiy’ kinaterungan i wee-Nikoo, katoroan niaku nu siniwola witu en tampa neiy i kakirong, wo niaku ku rinekam waki weteng-weteng em bumi kasa wawa’; ¹⁶ em beren-Nu limoo’ eng kasuatan niaku nu mememuali oki’, wo witu eng kaol-Mu em baya nyi’a neiy i kepatik e nendo-nendo laa pebebentuken nu reiy’pe’la e nesa tu’u waki nyi’a. ¹⁷ Wo i wee niaku, kumura eng kapedisna eng genang-Mu, eeh Empung! Kumura eng kasela eng kelakerna! ¹⁸ Sa aku pa’ar merereken nyi’a, ni’itu e lebe laker ta’an e neris. Sakawisa aku mena’, niaku ku mewali-walipe’ kasi Nikoo. ¹⁹ Sa wona’na Koo matela se tou fasik, eeh Empung, i ka’ayo ma’akati waki niaku se menenoa’-menenoa’ raa’, ²⁰ se menoto-notor en towo witu Nikoo, wo masu’usuk Nikoo ampit e reiy’ sipenoron. ²¹ Ma’anouw tu’u aku reiy’ mari’iris se tou-tou mari’iris Nikoo, eeh TUHAN, wo reiy’ mapedam senso’ wia se tou-tou timo’or mesaru Nikoo? ²² Niaku ku kasa uli-ulit mari’iris nisea, nisea se minamuali kesaruku. ²³ Soisapenouw aku, eeh Empung, wo sine’unouw e nateku, ujinouw aku wo sine’unouw eng genang-genangku; ²⁴ loo’onouw, sapa ku’a re’en e lalanku e mewarat, wo rawirenouw aku witu e lalan kekal!