¹ Ma’aruiyola se tou-tou em patou-touanna e reiy’ si sering, se matou-tou maki’it en Taurat ni TUHAN. ² Ma’aruiyola se tou-tou se timiboiy e nge’enge’-nge’enge’-Na, se masero Nisia ampit em pakasa’an e nate, ³ se kangkasi reiy’ matuanala eng kalewo’an, ta’an se matou-tou maki’it e lalan-lalan neiy i tudu’-Nala. ⁴ Nikoo nuesa koo mina’ayo mola en titah-titah-Mu, rio tiboiyan ampit e makauli-ulit. ⁵ Sa wona’na em patou-touangku en tantu kaa laa tumiboiy witu eng katataapan-Nu! ⁶ Takar niaku ku reiy’ laa maka’ato e nirang, sakawisa ku memee-meela ghenang e reiy’ sa mina’asa em perenta-Mu. ⁷ Niaku ku laa mee syukur wia-Nikoo ampit e nate jujur, sakawisa ku ma’ajar e nukum-nukum-Mu e nadil. ⁸ Niaku ku laa tumiboiy witu eng katataapan-katataapan-Nu, te’a mouw i petetele’ula niaku uli-ulit. ⁹ Ampit en sapa ku’a re’en siesa taretumou metetaangla eng kalakuanna weresi? Ampit tumayur nyi’a minatoroan ampit e nuwu’-Mu. ¹⁰ Ampit em pakasa’an e nateku niaku ku masero Nikoo, te’a mouw i pewewayala niaku sume’epangi waki perenta-perenta-Mu. ¹¹ Witu e nateku ku kimirong en ta’ar-Mu, rio aku reiy’ makadosa witu Nikoo. ¹² Lino’orouw Nikoo, eeh TUHAN; i ajarola eng katatapan-katataapan-Nu wia niaku. ¹³ Ampit en sumpingku ku sumusuiyla e reiy’ sa mina’asa e nukum neiy-Mu i totorla. ¹⁴ Witu en teturu’ e nge’enge’-nge’enge’-Mu niaku ku melaya-laya’, tanu witu e reiy’ sa mina’asa harta. ¹⁵ Niaku ku laa megheghenangla en titah-titah-Mu wo memee-meela ghenang e lalan-lalan-Nu. ¹⁶ Niaku ku laa kasa mepa’ar witu eng katataapan-katataapan-Nu; nuwu-Mu e reiy’ laaku liuren. ¹⁷ Tuananola eng kale’osan wia si hamba-Mu i yi’i, rio aku tumou, wo niaku ku laa metetiboiy witu e nuwu’-Mu. ¹⁸ Ongka’enola em berenku, rio aku lumoo’ e maka’erangen- maka’erangen waki Taurat-Mu. ¹⁹ Niaku i yi’i ku tou wo’oseiy wia eng kaoatan, te’a mouw i pekekirongla em perenta-perenta-Mu witu niaku. ²⁰ Minakemu e imukurku karengan lumelo wia e nukum-nukum-Mu susur nedo. ²¹ Nikoo koo marekak se tou-tou reiy’ time’u nadat, i kakutokouw se tou se mase’epangi waki perenta-perenta-Mu. ²² I wolonomi waki atasku e weleiy wo en sesero’an, karengan niaku ku timiboiy e nge’enge’-nge’enge’-Mu. ²³ Ma’anouw tu’u se pamuka-muka se rumuber maesa’an sumaru niaku, hamba-Mu i yi’i si maghenangla eng katataapan-katataapan-Nu. ²⁴ Yon, e nge’enge’-nge’enge’-Mu e minamuali kepa’arangku, e minamuali ngumenge’enge’-ngumenge’enge’ku. ²⁵ Imukurku si kimerut wia riawu, tounola niaku minatoroan ampit e nuwu’-Mu. ²⁶ Lalan-lalan em patou-touangku e neiy ku mouw i susuiyla wo Nikoo koo miningkot niaku – i ajarola eng katataapan-katataapan-Nu wia niaku. ²⁷ Siwonouw aku makasiligh en teturu’ en titah-titah-Mu, rio aku ghumenangla em pasiwo-siwon –pasiwo-siwon-Nu e maka’erengen. ²⁸ Imukurku si maame’ karengan mengasi’ e nate, te’etepenola niaku minatoroan ampit e nuwu’-Mu. ²⁹ Wa’akatomi e lalan towo waki niaku, wo karunianola niaku en Taurat-Mu. ³⁰ Niaku ku minelengola e lalan kaulitan, timampa mola e nukum- nukum-Mu witu en sinaruku. ³¹ Niaku ku kimaputola witu e nge’enge’-nge’enge’-Mu, eeh TUHAN, te’a mouw pesesiwon aku meirang. ³² Niaku ku laa kumi’itla en teturu’ em perenta-perenta-Mu, karengan Nikoo koo lime’arla e nateku. ³³ I papaloo’o mola wia niaku, eeh TUHAN, en teturu’ eng katataapan-katataapan-Nu, niaku ku laa metetiboiy nyi’a i ka’ayo e nedo kesampetan. ³⁴ Siwonouw aku makasiligh, takar niaku ku laa tumiboiy en Taurat-Mu; niaku ku laa mepepiara nyi’a ampit em pakasa’an e nate. ³⁵ Ma’anouw aku tumou kumi’it en teturu’ em perenta-perenta- Mu, karengan niaku ku mepa’arla nyi’a. ³⁶ I ewe’ mola e nateku witu e nge’enge’-nge’enge’-Mu, wo te’a witu e nuntung. ³⁷ I leasomi em berenku waki maloo’ eng kapualitan reiy’ sisapa, tounola niaku ampit e lalan-lalan neiy-Mu i tudu’la! ³⁸ Te’etepenola wia si hamba-Mu i yi’i en ta’ar-Mu, em pepaken i wee se tou meide’ wia-Nikoo. ³⁹ I leasola e weleiyku e magho’ogho’la niaku, karengan e nukum-nukum-Mu nyi’a mouw e le’os. ⁴⁰ Eng kaulitna niaku ku lumelo wia en titah-titah-Mu, tounola niaku ampit eng ka’adilan-Nu! ⁴¹ Satorona e nupus lale’-Mu e lumalesi niaku, eeh TUHAN, kelawiran waki Nikoo i ti’i e minatoroan ampit en ta’ar-Mu, ⁴² rio aku toro mee wewingkot wia se tou se maweleiy niaku, karengan niaku ku ma’eman wia e nuwu’-Mu. ⁴³ Te’a mouw ma’an mekasa mesesawuti e nuwu’ kaulitan waki sumaku, karengan niaku ku maarap wia e nukum-nukum-Mu. ⁴⁴ Niaku ku laa tumiboiy witu en Taurat-Mu e reiy’ maena-ena’, i wee e mapawee-weena wo eng keurena. ⁴⁵ Niaku ku laa tumou witu eng kale’aran, karengan niaku ku masero en titah-titah-Mu. ⁴⁶ Niaku ku laa sumusuiy en tanume e nge’enge’-nge’enge’-Mu witu en sinaru ne raja-raja, wo niaku ku reiy’ laa maka’to nirang. ⁴⁷ Niaku ku kasa laa mepa’ar witu em perenta-perenta-Mu e neiyku i koupusla i ti’i. ⁴⁸ Niaku ku minayatla e lawasku witu em perenta-perenta-Mu e neiyku i koupusla, wo niaku ku laa megheghenangla eng katataapan-katataapan-Nu. ⁴⁹ Ghenangenouw e nuwu’ neiy-Mu i lila’la wia si hamba-Mu, eng karengan Nikoo koo simiwo mola niaku maarap. ⁵⁰ Nyi’i mouw em pangiborangku witu em peme’itangku, kaa en ta’ar-Mu en tumoula niaku. ⁵¹ Tou-tou se reiy’ siadat se kasa masero’la niaku, ta’an niaku ku reiy’ mase’epangi waki Taurat-Mu. ⁵² Niaku ku maghenang wia e nukum-nukum-Mu wakipe’ kasa ketarenanna, eeh TUHAN, takar kineiboranola niaku. ⁵³ Niaku ku mineupi’ witu se tou-tou fasik, se timele’ula en Taurat-Mu. ⁵⁴ Eng katataapan-katataapan-Nu nyi’a mouw eng kekantaren e mazmur i wee niaku waki wale paena’angku tanume sitou wo’oseiy. ⁵⁵ Witu e nedo wengi ku ghimenang wia e ngaran-Nu, eeh TUHAN; niaku ku laa metetiboiy witu en Taurat-Mu ⁵⁶ Nyi’i mouw eng kina’atoangku, kaa niaku ku timiboiy en titah-titah-Mu. ⁵⁷ Wetengku nyi’a mouw si TUHAN, niaku ku tima’arola kaa laa tumiboiy witu e nuwu’-nuwu’-Mu. ⁵⁸ Niaku ku maaleiy en tongkoupusen-Nu ampit em pakasa’an e nate, i koupusola niaku minatoroan ampit en ta’ar-Mu. ⁵⁹ Niaku ku maghenangla e lalan-lalan em patou-touangku, wo make’angla e ne’aku matorome e nge’enge’-nge’enge’-Mu. ⁶⁰ Niaku ku minakarengan wo reiy’ mengere-ngerer kaa laa tumiboiy witu em perenta-perenta-Mu. ⁶¹ En tali-tali ne tou-tou fasik e limi’iker niaku, ta’an en Taurat-Mu e reiy’ liurengkula. ⁶² Maparua em bengi niaku ku timo’or kaa laa mesesyukur wia-Nikoo witu e nukum-nukum-Mu e nadil. ⁶³ Niaku ku minaasa’an ampit em baya ne tou se meide’ wia-Nikoo, wo ampit se tou-tou se timiboiy witu en titah-titah-Mu. ⁶⁴ Bumi e wuta ampit e nupus lale’-Mu, eeh TUHAN, i ajarola eng katataapan-katataapan-Nu wia niaku. ⁶⁵ Kale’osan en tinuana-Mu mola wia si hamba-Mu, eeh TUHAN, minatoroan ampit e nuwu’-Mu. ⁶⁶ I ajarola wia niaku eng kesama’an wo en tine’u e le’os, karengan niaku ku ma’eman witu em perenta-perenta-Mu. ⁶⁷ Nu reiy’pe’ niaku nu neiy i kalotoiy, niaku ku mase’epang, ta’an en teakan niaku ku timiboiy witu en ta’ar-Mu. ⁶⁸ Nikoo koo le’os wo masiwo e le’os; i ajarola eng katataapan-katataapan-Nu wia niaku. ⁶⁹ Tou se reiy’ siadat se simeringla niaku ampit en towo, ta’an niaku, ampit em pakasa’an e nate niaku ku laa tumiboiy en titah-titah-Mu. ⁷⁰ Nate nea eng kuraber tanu em barewes, ta’an niaku, en Taurat-Mu nyi’a mouw eng kepa’arangku. ⁷¹ Kaa niaku nu neiy i kalotoiy i ti’i e le’os i wee niaku, rio aku ma’ajar eng katataapan-katataapan-Nu. ⁷² En Taurat neiy-Mu i pa’ayola nyi’a mouw e le’os i wee niaku, e lebe waki riwuan nga kebi’ e mas wo em perak. ⁷³ Lawas-Mu en simiwo mola niaku wo minentukla niaku, weeanomi aku kasilighan, rio aku toro ma’ajar em perenta-perenta-Mu. ⁷⁴ Se tou-tou meide’ wia-Nikoo se limoo’ niaku wo mepa’a-pa’ar, karengan niaku ku maarap wia e nuwu’-Mu. ⁷⁵ Niaku ku mete’u, eeh TUHAN, kaa e nukum-nukum-Mu e nadil, wo kaa Nikoo koo limotoiy mola niaku witu eng kelale’an. ⁷⁶ Ma’anouw satorona e nupus lale’-Mu e mamuali pangiborangku, minatoroan ampit en ta’ar neiy-Mu i totorla wia si hamba-Mu. ⁷⁷ Ma’anouw e rahmat-Mu ma’ayo wia niaku, rio aku tumou, karengan en Taurat-Mu nyi’a mouw eng kasa kepa’arku. ⁷⁸ Ma’anouw se tou-tou reiy’ siadat se maka’ato e nirang, karengan nisea se mawinta’ reko’ witu niaku reiy’ sitino’otolan; ta’an niaku ku laa megheghenangla en titah-titah-Mu. ⁷⁹ Ma’anouw murikit wia niaku se tou-tou meide’ wia-Nikoo, se tou-tou mete’u e nge’enge’-nge’enge’-Mu. ⁸⁰ Ma’anouw e nateku eng kasa uli-ulit witu eng katataapan-katataapan-Nu, rio aku reiy’ maka’ato e nirang. ⁸¹ Imukurku eng kasa malelola eng kelawiran waki-Nikoo, niaku ku maarap wia e nuwu’-Mu. ⁸² Em berenku eng kasa malelola en ta’ar-Mu; niaku ku limila’: “Kawisa ku’a re’en Koo laa miborla niaku?” ⁸³ Karengan niaku ku minamuali mola tanu en sompoiy niawunan, ta’anouw eng katataapan-katataapan-Nu e reiy’ liurengkula. ⁸⁴ Pirape’ kasi e nendo-nendo ni hamba-Mu i yi’i? Kawisa ku’a re’en Koo mukum se tou-tou mekeki’it niaku? ⁸⁵ Se tou-tou reiy’ siadat se kimiarola eng ko’okor i wee niaku, se tou-tou reiy’ maki’itla en Taurat-Mu. ⁸⁶ E reiy’ sa mina’asa em perenta-Mu en toro emanen; nisea se maki’it niaku reiy’ sitino’otolan – tulungenouw niaku! ⁸⁷ Weitouw i te sea ma’apula niaku wia em bumi, ta’an niaku ku reiy’ timele’ula en titah-titah-Mu. ⁸⁸ Tounola niaku minatoroan ampit e nupus lale’-Mu, rio aku tumiboiy witu e nge’enge’ neiy i wee-Mula. ⁸⁹ I wee eng keure-urena, eeh TUHAN, nuwu’-Mu e minena-ena’ te’etep waki sorga. ⁹⁰ Kelale’an-Nu waki se see’ mea waki se see’; Nikoo koo minalinto’orla em bumi i ka’ayo e minena-ena’ wia. ⁹¹ I ki’it e nukum-nukum-Mu em baya nyi’a i ti’i em bia en teakan, karengan e reiy’ sa mina’asa wo’o sapa e melayanla Nikoo. ⁹² Sa wona’na en Taurat-Mu e reiy’ minamuali kasa kepa’arku, takar niaku ku minapunengola witu em peme’itangku. ⁹³ I wee eng keure-urena niaku ku reiy’ lumiurla en titah-titah-Mu, karengan ampit e ni’itu Nikoo koo timoula niaku. ⁹⁴ Niaku ku kapunya’an-Nu, lawirenola niaku, karengan niaku ku masero en titah-titah-Mu. ⁹⁵ Tou-tou fasik se mengena-ngena’la niaku kaa laa mepepunengla niaku; ta’an niaku ku laa meweweela ghenang e nge’enge’- nge’enge’-Mu. ⁹⁶ Niaku ku limoo’ em paakaran-paakaran eng kalekepan, ta’an em perenta-Mu em pelas kasa. ⁹⁷ Eng kasa i keupuskula en Taurat-Mu! Niaku ku meghena-ghenangla nyi’a eng kelabotan e nendo. ⁹⁸ Em perenta-Mu en simiwo niaku lebe sama’ waki se kesaru-kesaruku, karengan eng keure-urena i ti’i em bia niaku. ⁹⁹ Niaku ku lebe maka akal budi ta’an em baya ne menenuru’ niaku, karengan e nge’enge’-nge’enge’-Mu em paghenangengkula. ¹⁰⁰ Niaku ku lebe makasiligh ta’an se tou-tou tu’a, karengan niaku ku timiboiy en titah-titah-Mu. ¹⁰¹ Witu e reiy’ sa mina’asa lalan kalewo’an niaku ku metaang e ne’aku, rio aku tumiboiy witu e nuwu’-Mu. ¹⁰² Niaku ku reiy’ sume’epangi waki ukum-ukum-Mu, karengan Nikoo mouw si mawee teturu’ niaku. ¹⁰³ Kumura eng kaemisna en ta’ar-Mu i ti’i i wee e langit-langitku, e lebe ta’an e madu i wee en sumaku. ¹⁰⁴ Niaku ku minaka’ato kasilighan waki titah-titah-Mu, ni’itu mouw eng karenganna niaku ku mari’iris e reiy’ sa mina’asa lalan towo. ¹⁰⁵ Nuwu’-Mu i ti’i em barung i wee e ne’aku wo en terang i wee e lalanku. ¹⁰⁶ Niaku ku timiwa’ mola wo niaku ku laa makatorola nyi’a, kaa laa tumiboiy witu e nukum-ukum-Mu e nadil. ¹⁰⁷ Niaku ku kasa neiy i kalotoiy, eeh TUHAN, tounola niaku minatoroan ampit e nuwu’-Mu. ¹⁰⁸ Satorona en sesempe kepa’a-pa’aran en tanula em puji-pujian e mekepa’aren wia-Nikoo, eeh TUHAN, wo i turu’ momi e nukum-ukum-Mu wia niaku. ¹⁰⁹ Niaku ku salalu mesaelangla e nyawaku, ta’anouw en Taurat-Mu e reiy’ liurengkula. ¹¹⁰ Tou-tou fasik se tima’anola we’etes witu niaku, ta’an niaku ku reiy’ simeip waki titah-titah-Mu. ¹¹¹ E nge’enge’-nge’enge’-Mu nyi’a mouw eng kapunya’an pusakaku i wee eng keure-urena, karengan em baya nyi’a i ti’i eng kelaya-laya’an e nateku. ¹¹² Neiyku mouw i ewe’la e nateku kaa laa metetuanala eng katataapan-katataapan-Nu, i wee eng keure-urena, i ka’ayo e nedo kesampetan. ¹¹³ Tou si meware-wareng e nate si kari’irisku, ta’an en Taurat-Mu ni’i koupusku. ¹¹⁴ Nikoo mouw si kekirongangku wo kekelungku; niaku ku maarap wia e nuwu’-Mu. ¹¹⁵ Ma’akatouw waki niaku, heiy lumelewo-lumelewo’; niaku ku laa metetiboiy em perenta-perenta ni Empungku. ¹¹⁶ Tobolenouw niaku minatoroan ampit en ta’ar-Mu, rio aku tumou, wo te’a mouw mesesiwo niaku meirang witu em paarapengku. ¹¹⁷ Tobolenouw aku, rio aku melawir; niaku ku laa merio-rio witu eng katataapan-katataapan-Nu reiy’ maena-ena’. ¹¹⁸ Nikoo koo simede’ em baya ne tou se simeipi waki katataapan-katataapan-Nu, karengan e reiy’ sipenoron e le’ekok wiles nea. ¹¹⁹ Tanume en te’ina Koo mapokeiyla em baya se tou fasik wia em bumi; kaa ni’itu niaku ku meupusla e nge’enge’-nge’enge’-Mu. ¹²⁰ Nouwakeku matenggo’ogho’ karengan eng kineide’an witu Nikoo, niaku ku meide’ witu em peukuman-Nu. ¹²¹ Niaku ku kimelangola e nukum wo eng ka’adilan; te’a mouw mesesarakan niaku wia se mememeras-mememeras niaku! ¹²² Mamuli mouw eram i wee se hamba-Mu i wee eng kale’osan, te’a mouw se tou-tou reiy’ siadat se mepeperas niaku. ¹²³ Em berenku eng kasa malelola eng kelawiran waki Nikoo wo malelola en ta’ar-Mu e nadil. ¹²⁴ Patuananola se hamba-Mu minatoroan ampit e nupus lale’-Mu, wo i turu’ momi eng katataapan-katataapan-Nu wia niaku. ¹²⁵ Hamba-Mu niaku i yi’i, siwonouw aku makasiligh, rio aku mete’u e nge’enge’-nge’enge’-Mu. ¹²⁶ E nedo kaa laa minta’ e mina’ayo mouw i wee si TUHAN; nisea se ghimogharola en Taurat-Mu. ¹²⁷ Ni’itu mouw eng karenganna niaku ku meupusla em perenta-perenta-Mu lumebela ta’an e mas, awes tare waki e mas tu’a. ¹²⁸ Ni’itu mouw eng karenganna niaku ku matou-tou jujur minatoroan ampit e reiy’ sa mina’asa en titah-Mu; e reiy’ sa mina’asa lalan towo eng kari’irisku. ¹²⁹ E nge’enge’-nge’enge’-Mu e maka’erangen, ni’itu mouw eng karenganna e imukurku en timiboiy nyi’a. ¹³⁰ Sa i kaongka’, e nuwu’-nuwu’-Mu e mawee terang, mawee kasilighan wia se tou-tou we’engel. ¹³¹ Sumaku ni’i ngangakula wo memo’a-mo’aiy, karengan niaku ku kasa mepa’arla em perenta-perenta-Mu. ¹³² Lumenge mouw wia niaku wo i koupusola niaku, kumura eng kewaarna witu se tou-tou meupusla e ngaran-Nu. ¹³³ Te’etepenola eng ke’angku kaa en ta’ar-Mu, wo te’a mouw e reiy’ sa mina’asa kalewo’an eng kumuasa witu niaku. ¹³⁴ I wayamomi aku waki paperasan ne tou, rio aku tumiboiy witu en titah-titah-Mu. ¹³⁵ Sena’enomi si hamba-Mu ampit eng gio-Mu, wo i turu’ momi eng katataapan-katataapan-Nu wia niaku. ¹³⁶ Lue’ku e makerewowoiy tanu en salosot en dano, karengan se tou se reiy’ timiboiy witu en Taurat-Mu. ¹³⁷ Nikoo koo adil, eeh TUHAN, wo e nukum-ukum-Mu e nulit. ¹³⁸ E neiy-Mu mouw i perentala e nge’enge’-nge’enge’-Mu witu eng ka’adilan wo witu eng kelale’an em bayana. ¹³⁹ Layas e nupusku e mina’apula niaku, karengan em baya ne kesaruku se limiurla e reiy’ sa mina’asa nuwu’-Mu. ¹⁴⁰ Ta’ar-Mu eng kasa mineuji, wo si hamba-Mu si meupusla nyi’a. ¹⁴¹ Niaku i yi’i ku rintek wo hina, ta’an en titah-titah-Mu e reiy’ liurengkula. ¹⁴² Eng ka’adilan-Nu e nadil i wee eng keure-urena, wo en Taurat-Mu e nulit. ¹⁴³ Niaku ku timoro eng kase’esekan wo eng kasusa’an, ta’an em perenta-perenta-Mu e minamuali kepa’arangku. ¹⁴⁴ E nge’enge’-nge’enge’-Mu e nadil i wee eng keure-urena, siwonouw niaku makasiligh, rio aku tumou. ¹⁴⁵ Niaku ku maaleiy ampit em pakasa’an e nate; wingkotenouw niaku, eeh TUHAN, Eng katataapan-katataapan-Nu e laaku petetiboiyan. ¹⁴⁶ Niaku ku maaleiy wia-Nikoo; lawirenola niaku! Niaku ku laa metetiboiy witu e nge’enge’-nge’enge’-Mu. ¹⁴⁷ Memo’odope’ rapa niaku ku timo’or wo rumekeiy makitulung; niaku ku maarap wia e nuwu’-Mu. ¹⁴⁸ Niaku ku timo’or rimeriorla e nedo metayur em bengi kaa laa mengengenangla en ta’ar-Mu. ¹⁴⁹ Linganouw en suaraku minatoroan ampit e nupus lale’-Mu; eeh TUHAN tounola niaku minatoroan ampit e nukum-Mu. ¹⁵⁰ Timawi se tou-tou mekeki’it niaku ampit e maksut lewo’, nisea se mina’akati waki Taurat-Mu. ¹⁵¹ Nikoo koo tawi, eeh TUHAN, wo e reiy’ sa mina’asa em perenta-Mu nyi’a mouw e nulit. ¹⁵² Rengane’ eng ketareanna niaku ku minete’umi waki e nge’enge’-nge’enge’-Mu, kaa Nikoo koo timataapola nyi’a i wee eng keure-urena. ¹⁵³ Loo’onouw em peme’itangku wo i liseiyola niaku, karengan en Taurat-Mu e reiy’ liurengkula. ¹⁵⁴ Pe’inakutenola em perkaraku wo tubuusenouw aku, tounola niaku minatoroan ampit en ta’ar-Mu. ¹⁵⁵ Kelawiran e mina’akati waki se tou-tou fasik, karengan eng katataapan-katataapan-Nu e reiy’ mouw sinero nea. ¹⁵⁶ Rahmat-mu e limokon. eeh TUHAN, tounola niaku minatoroan ampit e nukum-nukum-Mu. ¹⁵⁷ Mengengi’it wo se kesaruku se laker, ta’an niaku ku reiy’ sime’epangi waki e nge’enge’-nge’enge’-Mu. ¹⁵⁸ Lumoo’ se sumese’epang-sumese’epang, niaku ku masenso’, karengan nisea se reiy’ timiboiy witu en ta’ar-Mu. ¹⁵⁹ Loo’onouw, kumura niaku nu meupusla en titah-titah-Mu! Eeh TUHAN, tounola niaku minatoroan ampit e nupus lale’-Mu. ¹⁶⁰ To’otolan e nuwu’-Mu nyi’a mouw eng kaulitan wo e reiy’ sa mina’asa e nukum-nukum-Mu e nadil nyi’a mouw i wee eng keure-urena. ¹⁶¹ Pemangko-pemangko’ se mekeki’it niaku reiy’ sito’otolan, ta’an witu i te e nuwu’-Mu e nateku matenggo’ogho’. ¹⁶² Niaku ku melaya-laya’ witu en ta’ar-Mu, tanu sitou si minaka’ato kelaker e rinemu’. ¹⁶³ Niaku ku masenso’ wo mari’iris witu en towo, ta’an en Taurat-Mu ni’i koupusku. ¹⁶⁴ Maka pitu witu esa nga endo niaku melo’o-lo’or Nikoo, karengan e nukum-nukum-Mu e nadil. ¹⁶⁵ Wangko’ mouw eng kaleneran witu se tou-tou se meupusla en Taurat-Mu, e reiy’la siwatu kasu’usu’an i wee nisea. ¹⁶⁶ Niaku kumengena-ngena’la eng kelawiran waki Nikoo, eeh TUHAN, wo niaku ku matuanala em perenta-perenta-Mu. ¹⁶⁷ Niaku ku timiboiy witu e nge’enge’-nge’enge’-Mu, wo niaku ku kasa meupusla nyi’a. ¹⁶⁸ Niaku ku timiboiy witu en titah-titah-Mu wo e nge’enge’-nge’enge’-Mu, karengan e minapekasa em patou-touangku neiy i kawuka’ witu en sinaru-Mu. ¹⁶⁹ Ma’anouw e rekeiyku e ma’ayome waki sinaru-Mu, eeh TUHAN; weeanouw niaku kasilighan minatoroan ampit e nuwu’-Mu. ¹⁷⁰ Ma’anouw em paaleiyengku e meiy witu en sinaru-Mu; i waya momi niaku minatoroan ampit en ta’ar-Mu. ¹⁷¹ Ma’anouw en sumpingku tumotorla em puji-pujian, karengan Nikoo koo timuru’la eng katataapan-katataapan-Nu wia niaku. ¹⁷² Ma’anouw e lila’ku kumantarla en ta’ar-Mu, karengan e reiy’ sa mina’asa em perenta-Mu e nulit. ¹⁷³ Ma’anouw e lawas-Mu e mamuali tumetulungku, karengan niaku ku mineleng en titah-titah-Mu. ¹⁷⁴ Niaku ku lumelo wia eng kelawiran waki-Nikoo, eeh TUHAN, wo en Taurat-Mu e minamuali kepa’arangku. ¹⁷⁵ Ma’anouw e imukurku tumou, rio melo’o-lo’or Nikoo, wo ma’anouw e nukum-nukum-Mu en tumulung niaku. ¹⁷⁶ Niaku ku seip tanu si domba neiy i kaliong, seronouw si hamba-Mu i yi’i, karengan em perenta-perenta-Mu e reiy’ liurengkula.