1 Syumukurouw wia si TUHAN, kaa Nisia si le’os! Eng kaulitna i wee eng keure-urena e nupus lale’-Na. 2 Ma’anouw e Israel e lumila’: “Eng kaulitna i wee eng keure-urena e nupus lale’-Na!” 3 Ma’anouw se kaum Harun se lumila’: “Eng kaulitna i wee eng keure-urena e nupus lale’-Na!” 4 Ma’anouw se tou talo si TUHAN se lumila’: “Eng kaulitna i wee eng keure-urena e nupus lale’-Na!” 5 Witu eng kase’esekan niaku ku minaleiy mola wia si TUHAN. TUHAN si miningkotomi niaku ampit minee kapenasan. 6 TUHAN si witu em betengku, niaku ku reiy’ laa meide’. Sapa ku’a re’en en toro tuananla ni tou witu niaku? 7 TUHAN si witu em betengku, tumulung niaku; niaku ku laa lumoo’ kumeng nisea se mari’iris niaku. 8 Lebe le’os tumerung wia si TUHAN ta’an ma’eman wia sitou. 9 Lebe le’os tumerung wia si TUHAN ta’an ma’eman wia em baya se bangsawan. 10 Reiy’ sa mina’asa bangsa se limedong niaku – demi e ngaran ni TUHAN, eng kaulitna wineweku nisea minundur. 11 Nisea se limedongla niaku, yon limedongla niaku – demi e ngaran ni TUHAN, eng kaulitna wineweku nisea minundur. 12 Nisea se limedongla niaku tanu se tampaneer, nisea se melaya-layas tanu e napi tetunean, – demi e ngaran ni TUHAN, eng kaulitna wineweku nisea minundur. 13 Niaku ku neiy i sede’ i ka’ayo neiy i ka’anu, ta’an si TUHAN si timulung niaku. 14 TUHAN i ti’i si kaente’angku wo mazmurku; Nisia si minamuali mola kelawirangku. 15 Suara merio-rio wo eng kamenangan waki dasing ne tou-tou ulit: “Lawas lele’os ni TUHAN en timuanala eng kewaraneiyan, 16 lawas lele’os ni TUHAN e makakuasa merakekla, lawas lele’os ni TUHAN matuanala eng kewaraneiyan!” 17 Niaku ku reiy’ laa mate, ta’an tumou, wo niaku ku laa sumusuiyla em pasiwo-siwon – pasiwo-siwon ni TUHAN. 18 TUHAN si simiasa mola niaku ampit eng kakete, ta’an Nisia si reiy’ simarakanla niaku wia e maut. 19 Wuka’anola niaku em pepalen leloangan kaulitan, niaku ku laa megheghorem witu eng goremna, laa metetotor syukur wia si TUHAN. 20 Nyi’i mouw em pepalen leloangan ni TUHAN, tou-tou ulit se laa ghumorem witu eng gorem nyi’a. 21 Niaku ku masyukur wia-Nikoo, karengan Nikoo koo miningkotomi niaku wo minamuali mola kelawirangku. 22 Watu neiy i tea’ ne meneniwo-meneniwo bangunan e minamuali mouw watu en duuna. 23 Eng kapualitan i ti’i e minamualimi waki weteng ni TUHAN, e nesa pasiwo-siwon maka’erangen witu em beren ta. 24 Nyi’i mouw e nendo siniwola ni TUHAN, meiy mouw kita merio-rio wo mepa’a-pa’ar karengan e nyi’a! 25 Oh TUHAN, weeanouw satorona kelawiran! Oh TUHAN, weeanouw satorona kamang! 26 Binerkatola sia si mineiy witu e ngaran ni TUHAN! Nikeiy keiy merkati nikouw waki ghorem em bale ni TUHAN. 27 TUHANouw si Empung, Sia si materangi nikita. I wa’akesola en tetule nendo wangko’ i ti’i ampit en tali, witu en sunge-sunge e mezbah. 28 Empungku Nikoo, niaku ku laa mee syukur wia-Nikoo, Empungku, niaku ku laa mererakekla Nikoo. 29 Syumukurouw wia si TUHAN, kaa Nisia si le’os! Eng kaulitna i wee eng keure-urena e nupus lale’-Na.