¹ Reiy’ wia nikeiy, eeh TUHAN, reiy’ wia nikeiy, ta’an wia e ngaran-Nu mouw weean eng kamulia’an, eng karengan e nupus-Mu, eng karengan e lale’-Mu! ² Ka’a se bangsa-bangsa se laa lumila’: “Waki wisa si Empung nea?” ³ Empung ta si waki sorga; Sia si matuanala sapa neiy i kepa’ar-Nala! ⁴ Berahala-berhala nea nyi’a mouw em perak wo e mas, en siniwo e lawas ni tou, ⁵ makapunya suma, ta’an e reiy’ mete’u meila-ila’, makapunya weren, ta’an e reiy’ mete’u lumoo’, ⁶ makapunya talinga, ta’an e reiy’ mete’u luminga, makapunya sesepunan, ta’an e reiy’ mete’u sumengut, ⁷ makapunya lawas, ta’an e reiy’ mete’u maringka-ringkap, makapunya ne’a, ta’an e reiy’ mete’u kumelang, wo e reiy’ mete’u mee suara ampit en tikoona. ⁸ Tanu e ni’itu mouw e minamualina se tou-tou simiwo nyi’a, wo em baya ne tou se ma’eman wia nyi’a. ⁹ Heiy Israel, ma’emanouw wia si TUHAN! – Nisia mouw si tetulungan nea wo kekelung nea. ¹⁰ Heiy kaum Harun, ma’emanouw wia si TUHAN! – Nisia mouw si tetulungan nea wo kekelung nea. ¹¹ Heiy se tou-tou talo si TUHAN, ma’emanouw wia si TUHAN! – Nisia mouw si tetulungan nea wo kekelung nea. ¹² TUHAN si ghimenangola nikita; Sia si laa merkatla, merkatla se kaum Israel, merkatla se kaum Harun, ¹³ merkatla se tou-tou talo si TUHAN, le’os se rintek ka’apa tu’u se sela. ¹⁴ Satorona si TUHAN si mee em pa’awesan wia nikouw, wia nikouw wo wia se oki-oki’mu. ¹⁵ Binerkatola ni TUHAN nikouw, si simiwola e langit wo em bumi. ¹⁶ Langit i ti’i e langit kapunya’an ni TUHAN, wo em bumi i ti’i e neiy mouw i wee-Nala wia se oki-oki’ ni tou. ¹⁷ Reiy’ se tou-tou minate se laa melo’o-lo’or si TUHAN, wo e reiy’ em baya ne tou se timumpame waki tampa kapenesan, ¹⁸ ta’an nikita, nikita ta laa lumo’or si TUHAN, en teakan i yi’i i ka’ayo eng keure-urena. Haleluya!