¹ Niaku ku meupus si TUHAN, karengan Nisia si malingala en suaraku wo em paaleiyengku. ² Karengan Nisia si mase’elengi en talinga-Na wia niaku, takar esa nga umur em patou-touangku ku laa maleiy wia-Nisia. ³ Tali-tali maut e limi’ikerola niaku, wo eng kineide’an witu eng kaoatan ne tou minate en timoro niaku, niaku ku mine’ani eng kase’esekan wo e mengasi. ⁴ Ta’an niaku ku maaleiyla e ngaran ni TUHAN: “Oh TUHAN, i liseiyola satorona niaku!” ⁵ TUHAN nyi’a mouw si tongkoupus wo adil, Empung ta mengupus. ⁶ TUHAN si mapiara se tou-tou rinda; niaku ku lewea’ mouw, ta’an linawir-Nala niaku. ⁷ Marengola makapenes, heiy imukurku, karengan si TUHAN si simiwo mola le’os wia nikoo. ⁸ Yon, Nikoo koo limiseiyomi niaku waki maut, wo em berenku waki lue’, wo e ne’aku waki neiy i kasu’usu’. ⁹ Niaku ku toro kumelang witu en sinaru ni TUHAN, waki wanua ne tou-tou matou-tou. ¹⁰ Niaku ku ma’eman, ma’anouw tu’u ku lumila’: “Niaku i yi’i ku kasa neiy i kalotoiy.” ¹¹ Niaku i yi’i ku limila’ witu eng kalikokoangku: “Em baya ne tou se tumetowo.” ¹² Kumura aku laa sumuli’ wia si TUHAN e reiy’ sa mina’asa eng kale’osan-Na wia niaku? ¹³ Niaku ku laa mopo em piala kelawiran, wo laa maleiyla e ngaran ni TUHAN, ¹⁴ laa mear e nazarku wia si TUHAN witu en saruan ne minapekasa umat-Na. ¹⁵ Maka’arga witu em beren ni TUHAN eng kinepatean em baya ne tou se neiy i koupus-Nala. ¹⁶ Oh TUHAN, niaku ku hamba-Mu! Niaku ku hamba-Mu, oki’ waki si hamba-Mu wewene! Nikoo koo minuka’ mola e wewa’akes-wewa’akesku! ¹⁷ Niaku ku laa mapasempela en tetule syukur wia-Nikoo, wo laa ma’aleiyla e ngaran ni TUHAN, ¹⁸ laa mear e nazarku wia si TUHAN witu en saruan ne minapekasa umat-Na, ¹⁹ waki podol em bale ni TUHAN, waki keunerannu, eeh Yerusalem! Haleluya!