¹ I wee si ma’aka-aka ne biduan. Mazmur ni Daud. Oh Empung palo’orengku, te’a mouw makapenes en tou! ² Karengan en suma ne tou fasik wo en suma ne tou le’ekok e neiy i kenganga witu niaku, nisea se mesesusuiy witu niaku ampit e lila’ towo; ³ ampit e lelila’an-lelila’an kari’irisan nisea se marego niaku wo maseke’la niaku reiy’ sitino’otolan. ⁴ Tanume en sesuli’ witu e nupusku nisea se mature niaku, kasuatan niaku ku masombayangla nisea. ⁵ Nisea se simuli’ eng kalewo’an wia niaku sawel eng kale’osan wo eng kari’irisan sawel e nupusku. ⁶ “Poponouw siesa tou fasik witu nisia, wo ma’anouw siesa tou tumeture rumedeiy witu esa nga weka lele’osna; ⁷ sakawisa akimen, ma’anouw sia rumou’ tanume sitou simelok, wo ma’anouw en sombayangna mamuali dosa. ⁸ Ma’anouw e numurna kumurang, ma’anouw en jabatanna edon ne tou walina. ⁹ Ma’anouw se oki-oki’na se mamuali ula, wo si ka’awuna si mamuali balu. ¹⁰ Ma’anouw se oki-oki’na se lumepu waya’an i te wo mengiwee, wo i sere’mi waki riberek em balena. ¹¹ Ma’anouw se menenagi e nutang se medo e reiy’ sa mina’asa kapunya’anna, wo se tou-tou walina se rumemu’ em bua’na e rinawoiy pine’ulitna. ¹² Te’a mouw wawean tou si minena-ena’ mapa’atola e nupus wia nisia, wo te’a mouw wawean tou si meupus wia se oki-oki’na minamuali ula. ¹³ Ma’anouw re’inla se see’na, wo re’inla e ngaranna witu se angkatan eng kamurian. ¹⁴ Ma’anouw eng kaselokan ne nene moyangna em peghena-ghenangen witu en sinaru ni TUHAN, wo te’a mouw perere’in en dosa ni ina’na. ¹⁵ Ma’anouw i tu salalu paweeala ghenang ni TUHAN, rio eng genang wia nisea e re’ini waki bumi. ¹⁶ Eng karengan nisia si reiy’ sighenang mapa’atola e nupus, ta’an maki’it se tou peme’itan wo miskin wo se tou kemu ate i ka’ayo sea mate. ¹⁷ Sia si meupus witu eng kutok – ma’anouw i tu meiy wia nisia; sia si reiy’ pa’ar wia em berkat – ma’anouw i tu ma’akati waki nisia. ¹⁸ Sia si mepake eng kutok tanume e labungna – ma’anouw i tu sumori’isip tanu en dano mea witu eng gorem en touna, wo tanu e lana mea witu eng gorem e ruiy-ruiyna; ¹⁹ ma’anouw i tu i wee nisia tanu e labung em pinakenala, tanume e ne’ereten e reiy’ maena-ena’ pepakenna. ²⁰ Ma’anouw em baya nyi’a i ti’i e waki weteng ni TUHAN e mamuali tetoro ne tou se mature niaku, wo en tetoro ne tou-tou se mengila-ngila’ lewo’ witu niaku.” ²¹ Ta’an Nikoo, eeh EMPUNG, Tuhanku, minta’ mouw wia niaku karengan e ngaran-Nu, i waya momi niaku karengan e nupus lale’-Mu le’os! ²² Karengan peme’itan wo miskin niaku, wo e nateku eng kinepali’an witu en touku; ²³ niaku ku limiong tanu eng kumalenoan-kumalenoan witu e nedo minepelabot, niaku ku neiy i tapekla tanu si kompo’. ²⁴ Kururku e limentu’ eng karengan e maposo, wo e nouwakeku e minarukus, mina’apu em barewesna. ²⁵ Niaku ku minamuali weweleiy i wee nisea; lumoo’ niaku, nisea se makuyungla eng kokongna. ²⁶ Tulungenouw niaku, eeh TUHAN, Empungku, lawirenola niaku minatoroan ampit e nupus lale’-Mu, ²⁷ rio sea mete’u, kaa e lawas-Mu mouw e nyi’i, kaa Nikoo mouw, eeh TUHAN, si timuana mola nyi’a. ²⁸ Ma’an sea kumutok, Nikoo koo laa merkatla; ma’anouw se kesaru-kesaruku se maka’ato e nirang, ta’an si hamba-Mu i yi’i satorona si mepa’a-pa’ar. ²⁹ Ma’anouw se tou-tou se mature niaku se mekelabungla en sering, wo makane’ulesen e nirangna tanume eng karaiy. ³⁰ Niaku ku kasa mesesyukur wia si TUHAN ampit en sumaku, wo niaku ku laa melo’o-lo’or Nisia witu eng keuneran ne tou kelaker. ³¹ Karengan Nisia si rimedeiy witu esa nga weka lele’os ne tou miskin kaa laa melelawiri nisea waki se tou-tou se meukum nisea.