¹ Kekantaren.Mazmur ni Daud. Nateku en timiro’, eeh Empung, niaku ku pa’ar mekekantar, niaku ku pa’ar mememazmur. Tumo’orouw, heiy imukurku, ² tumo’orouw, heiy gambus wo kecapi, niaku ku pa’ar mewewongkela em beena. ³ Niaku ku pa’ar mesesyukur wia-Nikoo witu e nelet ne bangsa-bangsa, eeh TUHAN, wo niaku ku pa’ar mememazmur i wee-Nikoo witu e nelet ne suku-suku bangsa; ⁴ karengan e nupus-Mu e wangko’ limantouwe e langit, wo e lale’-Mu mina’ayome waki linaak-linaak. ⁵ I rakekola en tou-Mu lumantouwe e langit, eeh Empung, wo ma’anouw eng kamulia’an-Nu lumantouwe e minapekasa em bumi. ⁶ Rio i kalempot se tou-tou i koupus-Mula, lawirenola ampit e lawas lele’os-Mu wo wingkotenouw niaku! ⁷ Empung si minee momi nuwu’ waki tampa kudus-Na: “Niaku ku laa merio-rio, Niaku ku laa memete-metengla en Sikhem, wo eng kewong Sukot e laa-Ku ukuren. ⁸ Gilead em punya-Ku, Manasye em punya-Ku, Efraim nyi’a mouw si tumeterung eng kokong-Ku, Yehuda nyi’a mouw si wulu’ eng keraja’ang-Ku, ⁹ Moab sia mouw si tampa paosang-Ku, wia si Edom Niaku ku limawala eng kasut-Ku, wo karengan em Filistia Niaku ku merio-rio.” ¹⁰ Seiy ku’a re’en si laa mali niaku mea waki kota e makarereen? Seiy ku’a re’en si rumawir niaku mea waki Edom? ¹¹ Reiy’ ku’a re’en Nikoo, eeh Empung, si timea’ mola nikeiy, wo si reiy’ minaju, eeh Empung, mewali-wali se bala suraro meiy? ¹² Weeanola wia nikeiy tetulungan witu se kesaru, karengan e reiy’ sipenoron em pelawiran waki sitou. ¹³ Ampit si Empung e laa ta tuananla em pasiwo-siwon – pasiwo-siwon e waraneiy, karengan Nisia nuesa si laa mele’e-le’ek em baya se kesaru ta.