¹ Syumukurouw wia si TUHAN, karengan Nisia si le’os! Eng kaulitna i wee eng keure-urena e nupus lale’-Na. ² Ma’anouw i tu i lila’la ne tou-tou se tinubuusi ni TUHAN waki kuasa e makase’eseken, ³ se nierur-Nami waki wanua-wanua, waki sendangan wo waki talikuran, waki amian wo waki timu. ⁴ Wawean tou-tou se limepu waki padang pelas, lalan mea waki kota tampa paena’an ne tou se reiy’ niato neala; ⁵ nisea se arem wo re’o, imukur nea e lewea’ reawa’ witu eng gorem en tou nea. ⁶ Takar mengale-ngaleiy mouw sea wia si TUHAN witu eng kase’esekan nea, wo neiy i waya-Nami sea waki kakori’an nea. ⁷ Niali-Na sea timoro e lalan karondoran, i ka’ayo mina’ayo waki kota tampa paena’an ne tou. ⁸ Ma’anouw sea mee syukur wia si TUHAN karengan e nupus lale’-Na, karengan em pasiwo-siwon – pasiwo-siwon-Na e maka’erangen witu se oki-oki’ ni tou, ⁹ karengan em pinakateu-teu-Nala e imukur e re’o, wo e imukur e arem e winesu-Nala ampit eng kale’osan. ¹⁰ Wawean se tou-tou se rimuber witu eng gorem e reiydem wo ribe’ebeng, kinakurungan witu em peme’itan wo em besi. ¹¹ Karengan nisea se rimangu witu em perenta-perenta ni Empung, wo kimewur e ngenge’enge’ Ni Kasarakek, ¹² takar neiy i tu’utuk-Nala e nate nea witu eng gorem eng kasusa’an, nisea se neiy i kare’esok, wo e reiy’la si timulung. ¹³ Takar mengale-ngaleiy mouw sea wia si TUHAN witu eng kase’esekan nea, wo lawiren-Na momi sea waki kakori’an nea, ¹⁴ niali-Na sea rumou’mi waki reiydem wo ribe’ebeng, wo e rinangkut-Nala en torongku-torongku nea. ¹⁵ Ma’anouw sea mee syukur wia si TUHAN karengan e nupus lale’-Na, karengan em pasiwo-siwon – pasiwo-siwon-Na e maka’erangen witu se oki-oki’ ni tou, ¹⁶ karengan em pinete’-Nala em pepalen-pepalen tambaga, wo eng kinemu-Nala eng kekelam-kekelam em pepalen wesi. ¹⁷ Wawean se tou-tou se minerara’an karengan eng kalakuan nea e makadosa, wo se siniksa karengan eng kaselokan-kaselokan nea; ¹⁸ Nisea se mari’iris witu e reiy’ sa mina’asa kekaanen wo nisea se mina’ayo mouw witu em pepalen leloangan maut. ¹⁹ Takar mengale-ngaleiy mouw sea wia si TUHAN witu eng kase’esekan nea, wo linawir-Nami sea waki kakori’an nea, ²⁰ neiy i pa’ayo-Nala e nuwu’-Na wo line’os-Nala sea, neiy i liseiy-Nami sea waki ruragh eng kubur. ²¹ Ma’anouw sea mee syukur wia si TUHAN karengan e nupus lale’-Na, karengan em pasiwo-siwon – pasiwo-siwon-Na e maka’erangen witu se oki-oki’ ni tou. ²² Ma’anouw sea mapasempela en tetule syukur, wo me’umanla em pepa’ayangen-pepa’ayangen-Na ampit e merio-rio! ²³ Wawean se tou-tou se malease en tasik ampit eng kapal-kapal, se matuanala em pabelante’an waki lawanan pelas; ²⁴ nisea se limoo’ em pepa’ayangen-pepa’ayangen ni TUHAN, wo em pasiwo-siwon – pasiwo-siwon-Na e maka’erangen waki tampa kerarem. ²⁵ Sia si minee nuwu’, takar i to’or-Nami e reghes tumokol e rimakekla em balolong-balolongna. ²⁶ Nisea se limongkot i ka’ayo waki langit wo tumumpami waki lawanan wangko’, imukur nea si minakemu karengan en cilaka; ²⁷ nisea se minapusing wo matigo-tigogor tanu sitou tinoek, wo kinaliongan akal. ²⁸ Takar mengale-ngaleiy mouw sea wia si TUHAN witu eng kase’esekan nea, wo neiy i rou’-Nami sea waki kakori’an nea, ²⁹ siniwo-Nala e reghes tumokol i ti’i minenes, i ka’ayo em balolong-balolongna e minakapenes. ³⁰ Nisea se mepa’a-pa’ar, karengan em baya nyia e minompas, wo rinawir-Na sea mea waki sesuwa’an kepa’aran nea. ³¹ Ma’anouw sea mee syukur wia si TUHAN karengan e nupus lale’- Na, karengan em pasiwo-siwon – pasiwo-siwon-Na e maka’erangen witu se oki-oki’ nitou. ³² Ma’anouw sea rumakekla Nisia witu se jema’at ne umat i ti’i, wo melo’o-lo’or Nisia witu se majelis em baya ne tu’a-tu’a. ³³ Siniwo-Na en so’oso’an-so’oso’an minamuali padang gurun, wo eng keresotan-keresotan en dano e minamuali tana’ rese, ³⁴ en tana rewur e minamuali padang wurasen, karengan eng kalewo’an ne tou-tou se maena’ witu eng goremna. ³⁵ Siniwo-Na em padang gurun minamuali pusung en dano, wo en tana’ pera e minamuali pakeresotan-pakeresotan en dano. ³⁶ Neiy i tampa-Nala maname se tou-tou arem, wo nisea se rimedeiyla eng kota tampa paena’an; ³⁷ nisea se makeror waki penguma’an-penguma’an wo simiwo e numa-uma anggor, e makaluari wu’ana-wu’ana tanume e wua’na. ³⁸ Binerkat-Nala sea i ka’ayo sea kasa minawes eng kelaker, wo se tekapen-tekapen nea se reiy’ siniwo-Na minakurang. ³⁹ Ta’an nisea se minakurang wo minengkur karengan e nubelan en cilaka wo mengasi’. ⁴⁰ Neiy i toa’-Nami eng kahina’an witu natas ne tou-tou se kasa kasine’uan, wo siniwo-Na sea limepu waki pagang rese e reiy’la silalan; ⁴³