¹ Haleluya! Syumukurouw wia si TUHAN, Karengan Nisia si le’os! Eng kaulitna i wee eng keure-urena e nupus lale’-Na. ² Seiy mouw ku’a re’en si toro makite’ula eng kaente’an ni TUHAN, mapalingala e reiy’ sa mina’asa e lo’or wia-Nisia? ³ Ma’aruiyola se tou-tou se timiboiy witu e nukum, se matuanala eng ka’adilan witu e reiy’ sa mina’asa nedo! ⁴ Ghenangenouw niaku, eeh TUHAN, demi eng kamura’an witu se umat-Mu, ⁵ rio aku lumoo’ eng kale’osan witu se tou-tou pineleng-Mu, rio aku mepa’a-pa’ar witu eng kepa’aran ne umat-Mu, wo rio aku sumawa’ mewali-wali se kapunya’an-Nu nuesa. ⁶ Nikeiy wo se nene moyang meiy keiy simiwo mola en dosa, nikeiy keiy simelokouw, simiwo mola em fasik. ⁷ Nene moyang meiy waki Mesir se reiy’ makasiligh em pasiwo-siwon – pasiwo-siwon-Nu e maka’erangen, reiy’ ghimenang eng kaselana e nupus lale’-Mu, ta’an nisea se rimangu witu Si Kasarakek waki li’ilik en Tasik Teberau. ⁸ Ta’anouw linawir-Nala sea eng karengan e ngaran-Na, kaa laa mapasine’ula eng kaente’an-Na. ⁹ Rinekak-Na en Tasik Teberau, i ka’ayo minapera, niali-Na sea makelang matorola e lawanan wangko’ tanu matorola em padang gurun. ¹⁰ Tuana mouw e linawir-Nami sea waki lawas ne rumeri’iris, tinubuus-Na sea waki lawas ne kesaru; ¹¹ rano en simongkouwi em baya se kesaru nea, siesa tou tu’u wia nisea reiy’la sitimele’u. ¹² Katoroan e ni’itu ma’emanouw sea wia e reiy’ sa mina’asa nuwu’-Na, nisea se mekantarla em puji-pujian wia-Nisia. ¹³ Ta’an e makarengan nisea lumiurla em pasiwo-siwon – pasiwo-siwon-Na, wo reiy’ mina’ena’la e nge’enge’-Na; ¹⁴ nisea se sinareinseng en serit waki padang gurun, wo mina’awa’la si Empung waki padang pelas. ¹⁵ Neiy i wee-Nala wia nisea sapa eng kiniwee nea, wo neiy i eiy-Na e rumara paru-paru witu e nelet nea. ¹⁶ Nisea se oki’ ghenang wia si Musa waki pedasingan, wo wia si Harun, tou kudus ni TUHAN. ¹⁷ Bumi e minawuka’ wo lume’ouw si Datan, timutuwi e nieruran ni Abiram. ¹⁸ Napi limayas witu e wuntul nea, layas e napi rimengisla se tou-tou fasik i ti’i. ¹⁹ Nisea se simiwo sioki’ ni sapi waki Horeb, wo maongkot masempe wia si patong tinoa’; ²⁰ nisea se timo’or eng Kamulia’an nea ampit em bangunan ni sapi raghar mengaan rukut. ²¹ Nisea se limiurla si Empung si limawirola nisea, si timuana mola eng kapualitan-kapualitan e wangko’ waki Mesir: ²² em pasiwo-siwon – pasiwo-siwon maka’erangen waki tana’ Ham, em pasiwo-siwon – pasiwo-siwon hebat waki li’ilik en Tasik Teberau. ²³ Takar Nisia si limila’la si laa mepepunengla nisea, sa si Musa, tou pineleng-Na, si reiy’ minengunerla witu en sinaru-Na, kaa laa ma’ompasla e nupi’-Na, i ka’ayo Sia reiy’ munengla nisea. ²⁴ Nisea se simede’ em banua kewangun i ti’i, se reiy’ ma’eman witu e nuwu’-Na. ²⁵ Nisea se ngimu’ungul witu en dasing nea wo se reiy’ melelingala en suara ni TUHAN. ²⁶ Laa o Sia mayat e lawas-Na witu nisea kaa laa mererewala nisea waki padang gurun, ²⁷ wo kaa laa metetabuke’isla se oki’ o puyun nea mea waki elet ne bangsa-bangsa, wo sumarakan nisea mea waki waya’an wanua. ²⁸ Nisea se kimaput wia si Baal Peor, wo kimaan en tetule-tetule rineret pawee se tou minate. ²⁹ Nisea se rimarala e nate-Na ampit em pasiwo-siwon nea, takar lumentutouw eng katula witu e nelet nea. 30 Ta’an si Pinehas si rimedeiy wo kimelangla e nukum, takar mena’ mouw eng katula i ti’i. ^{30 31} Eng kapualitan i ti’i neiy i rekenla wia nisia tanume en jasa ni’i patumpa i wee eng keure-urena. ³² Nisea se minupi’la Nisia tawi en dano Meriba, i ka’ayo si Musa si tinena’ en cilaka eng karengan nisea; ³³ karengan nisea se mine’itla e natena, i ka’ayo sia minapepar ampit e lelila’an-lelila’anna. ³⁴ Nisea se reiy’ minunengla se bangsa-bangsa, tanu neiy i perentala ni TUHAN wia nisea, ³⁵ ta’an nisea se minasewokan ampit se bangsa-bangsa, wo minetete’u eng kenaramen-kenaramen nea mepa’ayang. ³⁶ Nisea se meraghes wia se berhala-berhala nea, se minamuali we’etes i wee nisea. ³⁷ Nisea se timulela se oki-oki’ tuama nea, wo se oki-oki’ wewene nea wia se roh-roh lewo’, ³⁸ wo timoa’la e raa’ ne tou reiy’ siselok, e raa’ ne oki-oki’ tuama wo ne oki-oki’ wewene nea, se neiy i tule neala wia se berhala-berhala Kana’an, i ka’ayo em banua i ti’i eng kewur kaa e nutang raa’. ³⁹ Nisea se menajisla en tou ampit en sapa en tinuana neala, wo masiwo en zinah witu em pasiwo-siwon – pasiwo-siwon nea. ⁴⁰ Takar lumayasouw e nupi’ ni TUHAN witu se umat-Na, wo Nisia si mari’iris wia se kapunya’an-Na nuesa. ⁴¹ I sarakan-Na mola sea witu e lawas ne bangsa-bangsa, i ka’ayo se tou-tou mari’iris nisea se makakuasa witu nisea. ⁴² Mekelaker neiy i reta’-Nami sea, ta’an nisea se mawinta’ merangu ampit en tetiro’an-tetiro’an nea, se timenem witu eng kaselokan nea. ⁴³ Makelaker neiy i waya-Nami sea, ta'an nisea se mawinta' merangu ampit en tetiro'an-tetiro'an nea, en timenem witu eng kaselokan nea ⁴⁴ Ta’anouw Nisia si timebo eng kasusa’an nea, eng katoroan Nisia nu liminga e rekeiy nea. ⁴⁵ Sia si ghimenang en teta’aran-Na eng karengan nisea, wo menesel minatoroan ampit e nupus lale’-Na kewangko’. ⁴⁶ Wineean-Na sea minaka’ato e rahmat waki weteng em baya ne tou se timaang nisea. ⁴⁷ Lawirenola keiy, eeh TUHAN, Empung meiy, wo erurenomi keiy waki elet ne bangsa-bangsa, rio keiy mee syukur wia e ngaran-Nu kudus, wo sumawa’ witu em puji-pujian wia-Nikoo. ⁴⁸ Lino’orouw si TUHAN, Empung Israel, waki eng keure-urena i ka’ayo eng keure-urena, wo ma’anouw se minapekasa umat se lumila’la: “Amin!” Haleluya!