¹ Mee mouw syukur wia si TUHAN, i aleiy mola e ngaran-Na, i pakisine’u mola em pasiwo-siwon-Na witu e nelet ne bangsa-bangsa! ² Kumantarouw i wee-Nisia, memazmurouw i wee-Nisia, pasusuiyenola e reiy’ sa mina’asa em pasiwo-siwon-Na maka’erangen! ³ Sumawa’ mouw witu e ngaran-Na kudus, ma’anouw mepa’a-pa’ar ate se tou-tou masero si TUHAN! ⁴ Seronouw si TUHAN wo eng kaente’an-Na, seronouw eng gio-Na reiy’ siena’na! ⁵ Ghenangenola em pasiwo-siwon – pasiwo-siwon-Na e maka’erangen en tinuana-Nala, e mujizat-mujizat-Na wo em peukuman-peukuman neiy i totor-Nala, ⁶ heiy oki’ o puyun ni Abraham, hamba-Na, heiy oki-oki’ ni Yakub, tou-tou pineleng-Na! ⁷ Nisia mouw si TUHAN, Empung ta, wia minapekasa em bumi em pepaken em peukuman-Na. ⁸ Nisia si maghenangla i wee eng keure-urena en teta’aran-Na, e nuwu’ neiy i perenta-Nala wia se esa nga riwu angkatan, ⁹ em bina’akes-Na ampit si Abraham, wo en tiwa’-Na wia si Ishak; ¹⁰ siniwo-Nala eng kapualitan i ti’i minamuali katataapan i wee si Yakub, minamuali teta’aran kekal i wee se Israel, ¹¹ nuwu’-Na: “Wia nikoo e laa-Ku i weela en tana’ Kana’an, tanume eng kapunya’an pusaka neiy i tantula i wee nikoo.” ¹² Katoroan eng kelaker nea se reiy’ takura, se toyo’ i te, wo nisea se tou-tou wo’oseiy maname, ¹³ wo malepu waki se bangsa esa mea waki se bangsa walina, waki keraja’an esa mea waki se suku bangsa walina, ¹⁴ Sia si reiy’ minayala siesa tou tu’u meras nisea, raja-raja se niukum-Na eng karengan nisea: ¹⁵ “Te’a mawilot se tou-tou ni’isu’-Kula, wo te’a masiwo lewo’ wia se nabi-nabi-Ku!” ¹⁶ Eng katoroan Sia nu minapa eiy eng kelalenan witu natas em banua i ti’i, wo kimemula e minapekasa walun kekaanen, ¹⁷ i toke-Na mola siesa tou rumeriorla nisea: Yusuf si neiy i wangker minamuali budak. ¹⁸ Nisea se rimopit e ne’ana ampit en torongku, lee’na eng gimorem witu eng gorem em besi, ¹⁹ mina’ayo e nedo e nuwu’-Na minalekepouw, wo en teta’aran ni TUHAN e minulitla nyi’a. ²⁰ Raja si rimeo rumeta’la nyi’a, makua-kuasa ne bangsa-bangsa se minayala nyi’a. ²¹ Siniwonala sia tuang witu e istanana, wo kuasa witu e reiy’ sa mina’asa harta kapunya’anna, ²² Kaa laa meweweela patudu’ wia em baya ne pemangkona esa nga kepa’aran e natena wo maturu’la eng hikmat wia em baya ne tu’a-tu’ana. ²³ Tuana mouw se Israel mineiy waki Mesir, wo si Yakub si minena’ tanume sitou wo’oseiy waki tana’ Ham. ²⁴ TUHAN si simiwo se umatna kasa sobor, wo simiwola nisia lebe ente’ ta’an em baya ne kesaruna; ²⁵ rinoba-Na e nate nea kaa laa rumi’iris se umat-Na, kaa laa mepeponge’la se hamba-hamba-Na. ²⁶ Neiy i toke-Na si Musa, hamba-Na, wo si Harun si pineleng-Na mola; ²⁷ sea nu rua se simiwola eng kowa’-kowa’-Na witu e nelet nea, wo e mujizat-mujizat waki tana’ Ham: ²⁸ neiy i papa’ali-Na eng kareiydeman, takar e nendo minareiydem, ta’an nisea se minererangu witu e nuwu’-Na; ²⁹ rinoba-Na en dano nea minamuali raa’, wo pinate-Nala se sera’-sera’ nea. ³⁰ Pekak-pekak se maroina-roina’ waki wanua nea, awes tare witu e ri’irir-ri’irir ne raja nea; ³¹ Sia si minee nuwu’, takar meiy mouw se laler laar, wo se rongit-rongit waki minapekasa en daerah nea; ³² neiy i wura’arak-Nami e naro eis sawel e naro nea, wo e napi melaya-layas waki wanua nea; ³³ rinoba-Nala e nakana nanggor wo e nakana ara nea, wo neiy i ro’at-Nala e nakana waki daerah nea; ³⁴ Sia si minee nuwu’, takar meiy mouw se kompo’ wo se kompo’ kumekompo’ se reiy’ i keila’ eng kelakerna, ³⁵ se kimaan e reiy’ sa mina’asa en tanemen-tanemen waki wanua nea, wo kimaan e wua’na en tana’ nea; ³⁶ winunu’-Na em baya ne oki’ polon waki wanua nea, kinetareani e reiy’ sa mina’asa eng kapo’opolan nea: ³⁷ Rinawir-Na sea rimou’mi maali-ali em perak wo mas, wo witu e nelet ne suku-suku nea e reiy’la si neiy i kare’esok. ³⁸ Tou Mesir se mepa’a-pa’ar, eng katoroan nisea nu rimou’mi, karengan se tou-tou Mesir i ti’i se tinoro eng kineide’an witu nisea. ³⁹ Neiy i welar-Nala e linaak minamuali peporong, wo e napi kaa laa meteterangla em bengi. ⁴⁰ Nisea se makiwee, takar neiy i eiy-Nala se wara kekekouw, wo ampit e roti waki langit winesu-Nala sea. ⁴¹ Winuka’-Na eng kuntung watu, takar neiy i keresotoi en dano, laa o sumo’oso’ waki padang-padang pera tanu en so’oso’an; ⁴² Rinawir-Na se umat-Na rimou’mi ampit e melaya-laya’ wo se tou-tou pineleng-Na ampit e merio-rio. ^{43 44} Neiy i wee-Nala wia nisea e wanua-wanua ne bangsa-bangsa, i ka’ayo sea makapunya wua’na e rinawoiy pine’ulit ne suku-suku bangsa, ⁴⁵ rio sea minena-ena’ maki’itla eng katataapan-Na, wo tumiboiy e reiy’sa mina’asa ni’i paajar-Na. Haleluya!