¹ Lo’orenouw si TUHAN, heiy imukurku! TUHAN, Empungku, Nikoo koo kasa wangko’! Nikoo si limabung eng kewangko’an wo en serengat, ² wo makane’ulesla en terang tanu e roko’, si minelare e langit tanu en tenda, ³ si rimedeiyla e ri’irir-ri’irir em paa-Mu waki rano, si simiwola e linaak-linaak tanume em pengalin-Nu, e maoghe witu natas eng kale’ekew e reghes, ⁴ en simiwo e reghes tanume e rereoan-rereoan-Nu, wo e napi melayas en tanume se pelayan-pelayan-Nu, ⁵ si timo’otolola em bumi witu natas eng kontoiyanna, i ka’ayo e reiy’ laa moghe i wee e mapawee-weena wo eng keurena. ⁶ Ampit e lawanan wangko’ Nikoo koo limi’ikerola nyi’a; e rano minurepomi limantouwi eng kuntung-kuntung. ⁷ Witu e rekakan-Nu en dano i ti’i en timingkasla en tou, timingkas minalikoko witu e legu’an e lenter-Mu, ⁸ sumosor eng kuntung, meros eng kewong mea waki tampa neiy i tantu-Mula i wee nisea. ⁹ Em paakaran Nikoo koo timantula, e reiy’ laa langkoiyen neala, e reiy’ laa sumeup sea tumawuni em bumi. ¹⁰ Nikoo si minaya eng kembu’an-kembu’an mea witu eng gorem eng kewong-kewong, maso’oso’ witu e nelet eng kuntung-kuntung, ¹¹ mawee kumoo’ se reiy’ sa mina’asa tekapen waki padang, minapateu-teula e re’o ne keledai-keledai en talun; ¹² witu en tawina maena’ se wara-wara wia natas, masiwiki waki elet e laleiyna-laleiyna. ¹³ Nikoo si minee kumoo’ eng kuntung-kuntung waki ri’irir-ri’irir em paa-Mu, em bumi e minawesumi waki wu’ana em pina’ayang-Mu. ¹⁴ Nikoo si timoumi en dukut i wee se tekapen wo en tanemen-tanemen kaa laa pape’inakuten ne tou, ¹⁵ wo e nanggor mekepa’aren e nate ni tou, en simiwo eng gio masena’ karengan e lana, wo eng kekaanen e makasegaya’en e nate ne tou. ¹⁶ Wesu e nakana-nakana ni TUHAN, e nakana-nakana aras waki Libanon neiy i tanem-Na, ¹⁷ witu e wisa se wara-wara mesala, se uak em balena e witu nakana-nakana en sanobar; ¹⁸ eng kuntung-kuntung rakek nyi’a mouw ni’i wee se membe’-membe’ en talun, eng kakenturan-kakenturan watu nyi’a mouw en tampa teterungan i wee se pelanduk. ¹⁹ Nikoo si simiwo mola si sumedot minamuali petantu e nedo, siendo si mete’ula e nedo keuntepna. ²⁰ Sakawisa Koo mapa eiy e reiydem, takar e nendo tu’u e wengi mouw; katoroan e ni’itu mouw o maoghe se reiy’ sa mina’asa tekapen en talun. ²¹ Singa-singa muda se mengua-nguangla se pengaanen, wo make’i eng kekaanenna waki si Empung. ²² Sakawisa siendo nu rumetik, merurouw em baya nea wo ghumoleiy witu en tampa teterungan nea; ²³ sitou tu’u rumou’ mouw mea waki pepa’ayangenna, wo mea waki pe’inekutanna i ka’ayo mawengido. ²⁴ Kumura eng kelaker em pasiwo-siwon-Nu, eeh TUHAN, minapekasa nyi’a en siniwo-Mula ampit eng kesama’an, bumi e wuta empit en siniwo-Mu. ²⁵ Loo’onouw en tasik i ti’I, sela wo em pelas e wilayahna, witu se maoghe, se reiy’ i keila’ eng kelakerna, se tekapen-tekapen rintek wo sela. ²⁶ Witu eng kapal-kapal e mawole wo si Lewiatan si binentuk-Mu mola kaa laa ma’ayang ampit e nyi’a. ²⁷ Em baya nyi’a e ma’ena’la Nikoo, rio weeanla kekaanen witu nedona. ²⁸ Sakawisa Koo meela nyi’a, nisea se murut nyi’a; sakawisa Koo muka’ e lawas-Mu, nisea se wesu kaa eng kale’osan. ²⁹ Sakawisa Koo kumirongla eng gio-Mu, nisea se i kasenge’; sakawisa Koo medo e roh nea, nisea se mate mapuneng wo mareng mamuali riawu. ³⁰ Sakawisa Koo mapa’alimi e roh-Mu, nisea se kinasiwoan, wo Nikoo koo minerula en saruan em bumi. ³¹ Ma’anouw eng kamulia’an ni TUHAN e minena-ena’ i wee eng keure-urena, ma’amouw si TUHAN si mepa’a-pa’ar karengan em pasiwo-siwon – pasiwo-siwon-Na! ³² Nisia si timu’us em bumi i ka’ayo mineide’, si limeler eng kuntung-kuntung i ka’ayo minawun. ³³ Niaku ku laa mekekantar i wee si TUHAN eng keurean naiku nu matou-tou, Niaku ku laa mememazmur i wee si Empungku eng keurean niaku nu wiape’. ³⁴ Ma’anouw eng geghenangangku e nemis palingan wia-Nisia! Niaku ku laa mepa’a-pa’ar karengan si TUHAN. ³⁵ Ma’anouw ma’apumi se tou-tou makadosa waki bumi, wo ma’anouw se tou-tou fasik se reiy’ mouw wia kasi! Lo’orenouw si TUHAN, heiy imukurku! Haleluya!