¹ Sombayang ni esa tou peme’itan, witu e nedo sia nu lewea’ reawa’ wo minura’arakla e rerapotna witu en sinaru ni TUHAN. TUHAN, linganome en sombayangku, wo ma’anouw e rekeiyku maki tulung e ma’ayome wia-Nikoo. ² Te’a mouw i pekekirongla eng gio-Mu witu niaku witu e nendo niaku nu neiy i kase’esek. I se’elengomi en talinga-Mu witu niaku; witu e nendo niaku nu maaleiy, makarenganouw mingkot niaku! ³ Karengan e nendo-nendoku e mina’apu tanu e nawun, e ruiy-ruiyku e minewaa tanu em paapian. ⁴ Nateku e minawewe wo minaweles tanu en dukut, i ka’ayo niaku ku minaliur kumaan e rotiku. ⁵ Eng karengan e nga’angalku menaleinteng, niaku ku ruiy-ruiyna mokan. ⁶ Niaku ku asarokan si wara re’erep pera’ waki padang gurun, minamuali mouw tanu si wara reiy’ si ipus witu e riberek. ⁷ Niaku ku reiy’ mete’u tumekel wo pedis mamuali tanu se wara neiy i katewa witu natas em paa. ⁸ Kelabotan e nendo niaku ku pasero’an ne kasaru-kesaruku, se tou- tou se mepa’ayangla niaku se matiwa’ ampit matotor e ngaranku. ⁹ Karengan niaku ku mekaan e riawu tanu e roti, wo masewok eng kekoo’ongku ampit e nengisan, ¹⁰ eng karengan e nupi’-Mu wo eng keupi’an-Nu, karengan Nikoo koo minopo mola niaku wo timerekla niaku. ¹¹ E nendo-nendoku tanu eng kumalenoan-kumalenoan minepelabot, wo niaku nuesa ku minaweles tanu en dukut. ¹² Ta’an Nikoo, eeh TUHAN, koo rimuber i wee eng keure-urena, wo e ngaran-Nu e minena-ena’ see’ o see’. ¹³ Nikoo nuesa koo laa tumo’or, laa meupusla en Sion, karengan e nedona mouw laa meupusla nyi’a, em bia mouw e nedona. ¹⁴ Karengan se hamba-hamba-Mu se meupus wia em batu-batuna, wo mapedam meupusla e riawuna. ¹⁵ Takar se bangsa-bangsa se mineide’la e ngaran ni TUHAN, wo em baya ne raja em bumi se mineide’la eng kamulia’an-Nu, ¹⁶ sa si TUHAN si minangunola en Sion, minapa’ato mola en tou witu eng kamulia’an-Na, ¹⁷ limenge momi melelingala en sesombayangen ne tou-tou lo’ogas, wo reiy’ maloo’ola hina en sesombayangen nea. ¹⁸ Ma’anouw eng kapualitan i yi’i ni’i patikla i wee se angkatan kamurian, wo se bangsa siwonla kamurian se laa melo’o-lo’or si TUHAN, ¹⁹ Karengan Nisia si timembo momi waki kerakekan-Na kudus, TUHAN si matebomi waki sorga wia bumi, ²⁰ kaa laa melelinga e nga’angal ne tou tinaang, kaa laa mewewayami se tou-tou neiy i tantula mate wunu’un, ²¹ rio e ngaran ni TUHAN ni’i susuiyla waki Sion, wo Nisia si pelo’o-lo’oren waki Yerusalem, ²² sakawisa merur mewali-wali se bangsa-bangsa wo se keraja’an-keraja’an kaa laa rumaghes wia si TUHAN. ²³ Nisia si rimepu’ mola eng kaente’angku witu e lalan, wo minapapotot e numurku. ²⁴ Niaku ku limila’: “Oh Empungku, te’a mouw ma’edo niaku witu eng keuneran e numurku! En te’un-te’un-Nu e minena-ena’ see’ o see’!” ²⁵ Eng ketareanna neiy-Mu mouw i reta’la en to’otolan em bumi, wo e langit nyi’a mouw en siniwola e lawas-Mu. ²⁶ Em baya nyi’a i ti’i e laa mapuneng, ta’an Nikoo koo minena-ena’ wia, wo em baya nyi’a i ti’i e laa mamuali ure tanu e labung, tanu eng karaiy Koo laa rumoba nisea, wo nisea se minaroba; ²⁷ ta’an Nikoo koo minena-ena’ masuat, wo en te’un-te’un-Nu e reiy’ siniakaran. ²⁸ Se oki’ ne hamba-hamba-Mu se laa mena’ ampit e lompon, wo se oki’ puyun nea se laa minena-ena’ wia en sinaru-Mu.