¹ Mazmur ni Daud. Niaku ku laa mekekantarla e nupus o lale’ wo e nukum, niaku ku laa mememazmur i wee-Nikoo, eeh TUHAN. ² Niaku ku laa meweweela ghenang em patou-touan e reiy’ siweleiy: Kawisa ku’a re’en Nikoo meiy wia niaku? Niaku ku laa tumou witu eng kaulitan e nateku witu eng gorem em baleku. ³ E reiy’ i reta’ku witu en saruan em berenku em perkara ne tou e wuruk kalakuan; pasiwo-siwon e murtad eng kari’risku, ni’itu e reiy’ laa kumerut wia niaku. ⁴ E nate reko’ e laa ma’akatla waki niaku, eng kalewo’an niaku ku so’o mamete’u. ⁵ Tou si makiro-kirong masero’ si ka’ampitna, sia si laaku punengela. Sitou tingkeiy wo rakek ate, niaku ku reiy’ pa’ar. ⁶ Em berenku neiy i katuyu wia se tou-tou kasa lale’ wia em banua, rio sea mena’ mewali-wali o niaku. Sitou matou-tou ampit eng kenaramen reiy’ sisering, si laa melayanla niaku. ⁷ Tou si matuanala e le’ekok wiles si reiy’ laa mena’ witu eng gorem em baleku, tou si masusuiy en towo si reiy’ laa tumaga’ witu en saruan em berenku. ⁸ Susur memo’odo se laaku punengela em baya ne tou fasik waki wanua; se laaku re’ini waki kota ni TUHAN, em baya ne tou se matuanala eng kalewo’an.