¹ Witu e nendo karua nga pulu’ o epat sumedot ni’itu merurouw se tou Israel wo moso ampit minakela labung pengasi’ wo ampit en tana’ witu eng kokong. ² See’ ne tou Israel se tima’atasla en tou waki em baya ne tou wo’oseiy, laa o rumedeiy waki tampana wo maaku en dosa wo eng kaselokan ne nene moyang nea. ³ Kasuatan nisea nu rimedeiy witu en tampa, i waca mola e weteng-weteng waki kaol en Taurat ni TUHAN, Empung nea, keurean esa nga paepat nga endo, kasuatan esa nga paepat nga endo kasi nisea se matotorla em paakuan wo maongkot masempe wia si TUHAN, Empung nea. ⁴ Witu natas e naran en tampa ne tou-tou Lewi rumedeiy mouw si Yesua, Bani, Kadmiel, Sebanya, Buni, Serebya, Bani wo si Kenani. Ampit en suara menaleinteng sea maaleiy wia si TUHAN, Empung nea. ⁵ Wo lumila’ mouw si Yesua, Kadmiel, Bani, Hasabneya, Serebya, Hodia, Sebanya wo si Petahya, tou-tou Lewi i ti’i: “Tumo’orouw, lo’orenouw si TUHAN Empungmu waki keure-urena i ka’ayo eng keure-urena! Lino’orouw e ngaran-Nu mulia, e neiy i rakekla minatasla e reiy’ sa mina’asa lo’or wo e normat!” ⁶ “Nikoo i te nyi’a mouw si TUHAN Nikoo koo simiwo mola e langit, yon e langit e reiy’ sa mina’asa langit ampit se reiy’ sa mina’asa pasukan perajurit ne surarona, wo em bumi ampit e reiy’ sa mina’asa em bitu natasna, wo en tasik ampit e reiy’ sa mina’asa em bitu eng goremna. Nikoo koo minee em patou-touan wia em baya nea i ti’i wo se pasukan perajurit ne suraro langit se maongkot masempe wia-Nikoo. ⁷ Nikoo mouw si TUHAN, Empung si minelengola si Abram wo minali nisia rimou’mi waki Ur-Kasdim wo mineela wia nisia ngaran Abraham. ⁸ Nikoo koo minatola kaa natena e lale’ witu Nikoo wo Nikoo koo mina’akes en teta’aran ampit nisia kaa laa meweweela en tana’ se tou Kana’an, en tana’ se tou Het, en tana’ se tou Amori, en tana’ se tou Feris, en tana’ se tou Yebus wo en tana se tou Girgasi wia se see’na. Wo Nikoo koo minapatena’ mola en ta’ar-Mu, karengan Nikoo siulit. ⁹ Nikoo koo limoo’ em peme’itan ne nene moyang meiy waki Mesir wo liminga e rekeiyan nea waki li’ilik en Tasik Teberau. ¹⁰ Nikoo koo minapa’ato mola eng kowa-kowa’ wo e mujizat-mujizat witu en saruan ni Firaun wo em baya ne pegawaina ma’an se minapekasa rakyat em banuana, karengan Nikoo koo mete’ula nisea se mawinta’ tingkeiy wia se nene moyang meiy. Ampit en tuana Nikoo koo minabarola e ngaran-Nu tanu eng kumura eng kaleno e nendo i yi’i. ¹¹ Witu en sinaru nea Koo kimewe’ en tasik, i ka’ayo sea toro lumewet timorola en tampa pera witu eng keuneran en tasik. Ta’an se mengi’it-mengi’it nisea se neiy-Mu mouw i terekla witu e rano kerarem, tanu em batu minea witu e rano kake’ekel. ¹² Ampit em pa’asek linaak Koo mina’aka-aka nisea witu e nendo oat wo ampit em pa’asek api witu e nendo wengi kaa laa meteterangla e lalan patoroan neala. ¹³ Nikoo koo minerosomi waki atas eng kuntung Sinai wo sumusuiy ampit nisea waki langit wo mineela nisea e natoran-natoran e nadil, e nukum-ukum e nulit ma’an eng katataapan-katataapan wo em perenta-perenta e le’os. ¹⁴ O kangkasi Koo minakite’ula wia nisea en sabat-Mu kudus wo mineela wia nisea em perenta-perenta, katataapan-katataapan wo e nukum-Mu ampit pinaeletan ni Musa, hamba-Mu. ¹⁵ E neiy-Mu mouw i weela wia nisea e roti waki langit kaa laa merere’ila e narem wo e rano neiy-Mu i rou’mi i wee nisea waki kuntung watu kaa laa merere’ila e re’o. O kangkasi Nikoo koo rimeo nisea ghumoremla wo ruberala em banua se ampit minopo en tiwa’ e neiy-Mu mouw i ta’arla meweweela nyi’a wia nisea. ¹⁶ Ta’an nisea, se nene moyang meiy i ti’i, se mininta’ tingkeiy wo mine’eteng e lee’ wo reiy’ lele’ wia em perenta-perenta-Mu. ¹⁷ Nisea se simede’ laa lumale’ wo se reiy’ maghenang em pasiwo-siwon – pasiwo-siawon e maka’erangen en Siniwo-Mu mola witu nelet nea. Nisea se mine’eteng e lee’ awes tare se kimete eng kokong kaa laa mareng mea waki pabudakan waki Mesir. Ta’an Nikoo mouw si Empung si pa’ar mampungela, wo si makaupus wo tongkoupusen, si labot sabar wo minelokon e nupus lale’-Na. Nikoo koo reiy’ timele’ula nisea. ¹⁸ awes tare, eng katoroan sea nu masiwo sioki’ ni sapi neiy i toa’ wo lumila’: “Nyi’i mouw si Empungmu si timeper nikoo rimou’mi waki Mesir!’, wo simiwo eng kakewuran wangko’, ¹⁹ Nikoo koo reiy’ timele’ula nisea waki padang gurun karengan e nupus wo rendem-Mu eng kewangko’. Em pa’asek linaak e reiy’ simoro’mi waki atas nea witu e nendo oat kaa laa ma’aka-aka nisea witu em pakela-kelangan, tuanakan kangkasi em pa’asek api witu e nendo wengi kaa laa materangla e lalan patoroan neala. ²⁰ Wo Nikoo koo mineela wia nisea e Roh-Mu le’os kaa laa ma’ajar nisea. O kangkasi e manna-Mu e reiy’ tinaang-Mu waki suma nea wo Nikoo koo mineela rano wia nisea kaa laa merere’ila e re’o. ²¹ Epat nga pulu’ nge te’un eng keurena Nikoo nu mineela nisea kumaan waki padang gurun. Nisea se reiy’ sikakurangan, e labung nea e reiy’ teri, wo e ne’a nea e reiy’ kimesa. ²² Nikoo koo simarakanla wia nisea eng keraja’an-keraja’an wo se bangsa-bangsa wo minetengla ni’itu wia nisea tanume en daerah paakaran, karengan nisea se rimuberla en tana’ waki si Sihon, raja em banua Hesbon wo en tana waki si Og, raja em banua Basan. ²³ Nikoo koo simiwo se oki-oki’ nea minelaker tanu se sumesena’-sumesena’ waki langit wo minali nisea mea waki tana’ e neiy-Mu i reo wia se nene moyang nea kaa laa ghoremen wo ruberan. ²⁴ O laa se oki-oki’ i ti’i se ghimoremla wo rimuberla en tana’ i ti’i wo Nikoo koo timu’utukla witu en sinaru nea se penduduk en tana’ i ti’i, nyi’a i yi’i se tou-tou eng Kana’an, wo simarakanla setou-tou i ti’i, le’os se raja-raja nea, ka’apa tu’u se bangsa-bangsa en tana’ i ti’i, witu e lawas nea, rio se tou-tou i ti’i se patuananla esa nga kepa’aran e nate nea. ²⁵ Nisea se rimo’obit eng kota-kota makarereen wo en tana’ rewur. Nisea se kimaat em bale-wale wuta makapumpun e minegheghioan barang le’os, en tampa-tampa rano pina’at, e numa-uma anggor, e numa-uma zaitun wo e nakana-nakana e wu’ana-wu’ana witu eng kasa ka’asa’an. Nisea se kimaan wo se minawesu wo rebur. Nisea se matou-tou mewah karengan eng kale’osan-Nu em bangko’. ²⁶ Ta’an nisea se reiy’ limale’ wo se merangu witu-Nikoo. Nisea se timaburila e nukum-Mu wo minunu’ se nabi-nabi-Mu se ngime’enge’la nisea ampit e maksut mesesiwo nisea murikit wia-Nikoo. Nisea se simiwo eng kakewuran wangko’. ²⁷ O laa Nikoo koo simarakanla nisea witu lawas ne kesaru-kesaru nea, se sime’esekla nisea . Wo witu e nedo peme’itan nisea se rimekeiy wia-Nikoo, o laa Nikoo koo limingame waki langit wo karengan e nupus o rendem-Mu e wangko’ neiy-Mu i weela wia nisea se tou-tou se limawiromi nisea waki lawas ne kesaru nea. ²⁸ Ta’an tuana sea nu maka’atola eng ka’amanan, minareng sea sumiwo e lewo’ witu en sinaru-Mu. Wo Nikoo koo simarakan nisea witu lawas ne kesaru-kesaru nea se kimuasala nisea. Minareng sea rumekeiy wia-Nikoo, wo Nikoo koo limingame waki langit, laa o tumulung nisea mineneu-neup karengan e nupus rendem-Mu. ²⁹ Nikoo koo ngime’enge’la nisea ampit e maksut mesesiwo nisea murikiti wia e nukum-Mu. Ta’an nisea se mawinta’ tingkeiy nisea se reiy’ lale’ wia em perenta-perenta-Mu wo nisea se makadosa witu e natoran-natoran-Nu, e nawes tare e minee patou-touan wia sitou si timuanala nyi’a. Nisea se timilawala em paluka kaa laa mesesaru, nisea se mine’eteng e lee’ wo so’o luminga. ³⁰ Ta’anouw e minete’u-te’un eng keurena Koo minapawee-weela en sabaar-Mu witu nisea. Ampit e Roh-Mu Koo ngime’enge’la nisea, nyi’a i yi’i ampit em pinaeletan em baya ne nabi-Mu, ta’an nisea se reiy’ minadungla nyi’a, i ka’ayo Koo simarakanla nisea witu lawas ne bangsa-bangsa e reiy’ sa mina’asa wanua. ³¹ Ta’an karengan e nupus rendem-Mu e wangko’ Nikoo koo reiy’ minunengla nisea kasa uli-ulit wo reiy’ timele’ula nisea, karengan Nikoo mouw si Empung tongkoupusen wo makaupus. ³² En teakan, ee Empung meiy, Empung si kasa wangko’, ente’ wo ke’ekel, si timiboiy witu en teta’aran wo nupus lale’-Na, Te’a mouw Koo maloo’ola apis e reiy’ sa mina’asa peme’itan em pine’an neiy momi, ne raja-raja meiy, ma’aka-aka – ma’aka-aka meiy, imam-imam meiy, nabi-nabi meiy, wo se nen moyang meiy, yon ne minapekasa umat-Mu, rengan en zaman ne raja-raja Asyur i ka’ayo e nendo i yi’i. ³³ Ta’an Nikoo mouw si ulit witu e reiy’ sa mina’asa kapualitan en timoro nikeiy, karengan nikoo si matuanala e lale’ wo nikeiy mouw si masiwo em bu’ul. ³⁴ O kangkasi se raja-raja meiy, se ma’aka-aka – ma’aka-aka meiy, se imam-imam meiy, wo se nene moyang meiy se reiy’ matuanala e nukum-Mu. Nisea se reiy’ maweeghenangla em perenta-perenta-Mu wo e nge’enge’-nge’enge’-Mu e neiy-Mu i weela wia nisea. ³⁵ Witu eng kadudukan tanume si raja nisea se so’o rumaghes wia Nikoo, ma’anouw tu’u Koo kimaruniamola wia nisea kelaker eng kale’osan wo simadia mola i wee nisea en tana’ kapelas wo e rewur. Nisea se reiy’ minurikiti waki pasiwo-siwon – pasiwo-siwon nea e lewo’. ³⁶ Loo’onouw, en teakan i yi’i nikeiy nyi’a mouw keiy budak. Iyon, wia en tana’ neiy-Mu i weela wia se nene moyang meiy kaa laa kumeipi e wua’na wo e reiy’ sa mina’asa kakaya’anna nikeiy i yi’i nyi’a mouw keiy budak. ³⁷ Tana’ i ti’i e minua’la kelaker i wee se raja-raja se neiy mouw i tantu-Mula witu nikeiy karengan en dosa-dosa meiy. Nisea i ti’i se maperenta esa nga kepa’aran e nate witu en tou meiy, wo se ternak meiy, i ka’ayo keiy witu eng kase’esekan wangko.” Piagam teta’aran ³⁸ Tumo’otolela witu em baya nyi’a i yi’i nikeiy keiy mina’akes en teta’aran e te’etep e neiy i patik meiy ampit wineeanla e wa’il em baya ne ma’aka-aka meiy, se tou-tou Lewi meiy, wo em baya ne imam meiy.