¹ Katoroan i ka’ayola en sumedot kapitu, kasuatan se tou Israel se maena’ mouw witu eng kota-kotana, ² takar se minakarengan minewali minerurla se minapekasa rakyat witu eng kalasan witu en saruan em pepalen leloangan Rano. Nisea se kimiwee wia si Ezra, si kasa sigha’ eng kaol i ti’i, rio sia mali eng kaol Taurat ni Musa, nyi’a i yi’i eng kaol ukum neiy i weela ni TUHAN wia se Israel. ³ O laa witu e nendo kasa ketare-tare en sumedot kapitu i ti’i imam Ezra si minali eng kaol Taurat i ti’i witu en sinaru ne jema’ah, nyi’a i yi’i le’os tuama ka’apa tu’u wewene wo susur tou si toro luminga wo mangarti. ⁴ Nisia si minacala em pirala nga weteng waki kaol iti’i witu eng kalasan witu en saruan em pepalen leloangan Rano waki memo’odo i ka’ayo marorake witu en sinaru ne tuama wo wewene wo em baya ne tou se toro mangarti. Ampit eng kasa mawee ghenang se minapekasa umat se malingala em pewaca’an eng kaol Taurat i ti’i. ⁵ Ezra, si kasa sigha’ eng kaol i ti’i, si rimedeiy witu natas e mimbar kayu en siniwola kaa em peristiwa i ti’i. witu e li’ilikna esa nga weka lele’os rimedeiy si Matica, Sema, Anaya, Uria, Hilkia wo si Maaseya, kasuatan witu esa nga weka kawii rimedeiy si Pedaya, Misael, Malkia, Hasum, Hasbadana, Zakharia wo si Mesulam. ⁶ Ezra si minuka’ eng kaol i ti’i witu en saruan em beren ne minapekasa umat, karengan nisia si rimedeiy lebe rakek waki em baya ne tou i ti’i. Witu e nedo sia nu muka’ eng kaol i ti’i em baya ne tou se timo’or rimedeiy. ⁷ O laa si Ezra si limo’or si TUHAN, Empung si kasa wangko’, wo em baya ne tou se simarot ampit e : “Amin, amin!”, kasuatan minayat e lawas. Kamurian sea kumurur wo maongkot masempe wia si TUHAN ampit eng gio mina’ayo en tana’. ⁸ O kangkasi si Yesua, Bani, Serebya, Yamin, Akub, Sabetai, Hodia, Maaseya, Kelita, Azarya, Yozabad, Hanan, Pelaya, se nyia’ mouw se tou-tou Lewi, se maweela teturu’ en Taurat i ti’i wia se tou-tou i ti’i, kasuatan se tou-tou i ti’i se rimedeiy witu en tampana. ⁹ E weteng-weteng waki kaol i ti’i, nyi’a i yi’i en Taurat ni Empung, e winacala ampit eng kalenona, ampit wineeanla katerangan-katerangan, i ka’ayo em binacala em pangartian. ¹⁰ O laa si Nehemia, nyi’a i yi’i si kapala daerah i ti’i, wo si imam Ezra, si kasa sigha’ eng kaol i ti’i, wo se tou-tou Lewi se mawee teturu’ se tou-tou i ti’i, lumila’ wia nisea nu waya: “Nendo i yi’i nyi’a mouw eng kudus i wee si TUHAN, Empungmu. Te’a kouw tumekur wo mame’!”, karengan em baya ne tou i ti’i se mame’ eng katoroan nu liminga en tetotoren-tetotoren en Taurat i ti’i. ¹¹ Laa o lumila’ mouw sia wia nisea: “Mea mouw kouw, kumaanouw e mengaruiy wo kumoo’ mouw eng kekoo’on emis wo i papa’ali mouw esa nga weteng wia nisea se reiy’ simadia sapa-sapa, karengan e nendo i yi’i nyi’a mouw eng kudus i wee si TUHAN ta! Te’a kouw masusah ate, karengan e mepa’a-pa’ar eng karengan si TUHAN ni’itu mouw em pakelungannu!” ¹² O kangkasi setou-tou Lewi se rimeo em baya se tou i ti’i rio makapenes ampit e lelila’an-lelila’an: “Menesouw! Nendo i yi’i nyi’a mouw eng kudus, Te’a mouw kouw masusah ate!” ¹³ Takar mea mouw em baya ne tou i ti’i kaa laa mekekaan wo mekekoo’, kaa laa memete-meteng kekaanen wo melesir mepa’a-pa’ar, karengan nisea se mangarti e reiy’ sa mina’asa e nuwu’ neiy i pakite’ula wia nisea. ¹⁴ Witu e nedo karua se kapala-kapala kaum ne me’urang ne minapekasa bangsa, o kangkasi em baya ne imam wo se tou-tou Lewi se minerur witu si Ezra, si kasa sigha’ e nukum Taurat i ti’i, kaa laa mesesoisap en tetotoren-tetotoren en Taurat i ti’i. ¹⁵ Takar eng kina’atoannala e neiy i kepatik witu e nukum neiy i weela ni TUHAN ampit e nieletala ni Musa, kaa se tou Israel se lewo’ sa reiy’ mena’ witu e lekouw-lekouw witu e nendo wangko sumedot kapitu, ¹⁶ wo kaa waki em baya eng kota nea wo waki Yerusalem e lewo’ sa reiy’ i pa’ayola e nabar wo em palakat em palingan: “Mea mouw waki kuntung, edonouw e laleiyna nakana en zaitun, e laleiyna nakana e lana, e laleiyna nakana e murad, e laleiyna nakan eng korma wo e laleiyna waki akana-akana rirung kaa laa siwon lekouw-lekouw tanu eng kumura neiy i kepatik.” ¹⁷ Takar mea mouw se tou mea medo e laleiyna-laleiyna i ti’i, laa o sumiwo e lekouw-lekouw, siesa o siesa witu natas natep em balena, witu eng kalasan nea, o kangkasi witu em podol e wale-wale ni Empung, waki pelein em pepalen leloangan Rano wo waki pelein em pepalen leloangan Efraim. ¹⁸ Minapekasa jema’ah se minarengi waki pasea’an i ti’i se simiwo e lekouw-lekouw wo mena’ witu. Memang rengan en zaman ni Yosua bin Nun i ka’ayo nendo ni’itu se tou Israel se reiy’ ma’an mekasa sumiwo en tuana. Takar siwonola em pelesir mepa’a-pa’ar eng kasa wangko’. E weteng-weteng eng kaol Taurat ni Empung i ti’i em pewacanla susur e nendo, waki e nendo kasa ketare i ka’ayo e nendo kesampetan. Pitu nga endo eng keurena sea nu minangko’la e nendo wangko’ i ti’i wo witu e nendo kauwalu wawean em penasungkulan wangko’ minatoroan ampit e natoran. Paakuan en dosa wo em pengiweean en sombayang