¹ Takar kalinga’anouw e nga’angal kaente waki se rakyat wo kangkasi waki se weteng em baya ne tu’awewene witu se kasuat tou Yahudi. ² Wawean se marekeiy: “Oki’ tuama wo se oki’ wewene meiy se kelaker wo nikeiy keiy lewo’ sa reiy’ maka’ato gandum, rio keiy toro kumaan wo tumou.” ³ Wo wawean se marekeiy: “Penguma’an wo e numa anggor wo em bale neiy i eram meiyla kaa laa maka’ato gandum witu e nedo kelalenan.” ⁴ O kangkasi wawean se marekeiy: “Nikeiy keiy lewo’ sa reiy’ minjang loit kaa laa mear em pajak neiy i tena’la ni raja witu em penguma’an wo e numa anggor meiy. ⁵ En teakan, ma’anouw tu’u nikeiy i yi keiy esa nga raa’ esa nga le’ona ampit se patuari-patuari esa nge bangsa meiy wo se oki-oki’ meiy se masuat ampit se oki-oki’ nea, nikeiy keiy neiy i kase’esek minayala se oki-oki’ tuama wo se oki-oki’ wewene meiy minamuali budak wo se pira mola oki’ wewene meiy se lewo’ sa reiy’ mayala en tou mapunyala ni tou. Nikeiy keiy reiy’ mete’u sumiwo sapa-sapa, karengan em penguma’an wo e numa anggor meiy em bitu mouw e lawas ne tou walina.” ⁶ Takar kasa mouw meupi’ aku, katoroan ku liminga e nga’angal nea wo e naba-abar i ti’i. ⁷ Niaku nu minakaghenangola makale’o-le’os, ku kumulitikla em baya ne pamuka-muka wo em baya ne makua-kuasa. Pokeiyku wia nisea: “Siesa o siesa kouw kimaanola e rente waki se patuari-patuarimu!” Laa o siwoangkula wia nisea e nesa sidang jema’ah kasela. ⁸ Lumila’ mouw aku wia nisea: “Nikeiy keiy reiy’ maena-ena’ mame’inakut satoro-torona kaa laa tumubuus se kasuat tou Yahudi se neiy i wangker wia se bangsa-bangsa walina. Ta’an nikouw i yi’i awes tare mewangker se patuari-patuarimu, rio sea telesen neiy kasi!” Nisea se minenes en tou karengan se reiy’ mete’u mepepero. ⁹ Pokeiyku: “E reiy’ mouw waar sapa en tinuana miouwla i ti’i! Reiy’ ku’a re’en nikouw kouw lewo’ sa reiy’ mawinta-winta’ ampit meide’la si Empung ta kaa laa mesese’epangla en tou waki sesero’an ne bangsa-bangsa walina, se kesaru-kesaru ta? ¹⁰ O kangkasi niaku wo se patuari-patuariku wo se anak buahku se minungangola e loit wo eng gandum wia nisea. I waya mola kita rume’ila e nutang nea i ti’i! ¹¹ I waya mola kouw marengla wia nisea e nendo i yi’i kangkasi em penguma’an nea, numa anggor, numa zaitun wo em bale nea, o kangkasi re’inola e nutang nea, nyi’a i yi’i e loit ma’an eng gandum, nanggor wo e lana em pawusuken niouwmi waki nisea!” ¹² Lumila’ mouw sea: “Ni’itu e laa i wareng meiyla! Wo nikeiy keiy reiy’ laa kume’i sapa-sapa waki nisea. Nikeiy keiy laa tumuanala minakatena-tena’ tanu neiymu i perentala!” Laa o ku kumeret em baya ne imam wo rumeo nisea tumiwa’, kaa nisea se laa makatena’la en ta’ar nea. ¹³ O kangkasi i pi’ipikekula e lepetan e labungku kasuatan lumila’: “Tuana mouw susur tou si reiy’ minapatena’la en ta’ar i yi’i si laa i pi’ipiki ni Empung waki walena wo e wua’na em pine’inakutna. Tuana mouw sia i pi’ipik wo mamuali reiy’la sisapa-sapa!” Wo se minapekasa jema’ah se limila’: “Amin,” o laa sea melo’o-lo’or si TUHAN. Takar se rakyat se simiwo e minatoroan ampit en ta’ar i ti’i. Kapawinta-winta ni Nehemia si reiy’ masero kauntungan ¹⁴ O kangkasi rengan niaku nu pinopo tanume si kumbasar waki tana’ Yehuda, nyi’a i yi’i waki te’un karua nga pulu’ I ka’ayo en te’un katelu nga pulu’ o rua em paperenta’an ni Artahsasta jadi e mapulu’ o rua nge te’un eng keurena, niaku wo se patuari-patuariku keiy reiy’ ma’an mekasa medo e weweteng minamuali hak ni kumbasar. ¹⁵ Ta’an em baya ne kumbasar nu reiy’pe nyi’a, se rimeriorla niaku, se kasa mawuterla em pemesa’anen ne rakyat. Kumbasar-kumbasar i ti’i se maedomi waki nisea e nepat nga pulu’ syikal perak esa nga endo i wee em bahan kekaanen wo e nanggor. Awes tare se anak buah nea se maka lela’la witu se rakyat. Ta’an niaku ku reiy’ masiwo en tuana karengan ku meide’la si Empung. ¹⁶ Niaku tu’u ku minuleiy em pepa’ayangen em baton i ti’i, ma’anouw tu’u ku reiy’ minaka’ato penguma’an. Wo em baya se anak buahku se nierurla maname wuntul i wee em pepa’ayangen i ti’i. ¹⁷ Rumuber witu e mejaku se tou-tou Yahudi wo em baya ne makua-kuasa, se esa nga atus lima nga pulu’ tou, walinana wia nisea se mineiy wia nikeiy waki se bangsa-bangsa kaledong meiy. ¹⁸ En sinadiala esa nga endo witu en tanggongangku nyi’a mouw: siesa nga ipus sapi, enem nga ipus membe’domba se kinapelengan wo se pirala nga ipus unggas, wo e minegheghioan anggor ampit e meloko-lokon susur mapulu’ nga endo. Ta’anouw, ampit em baya nyi’a i ti’i, niaku ku reiy’ make’i wewetengan e minamuali hak ni kumbasar, karengan em pepa’ayangen i ti’i eng kasa meubel se rakyat. ¹⁹ Oh Empungku, demi eng kasejahtera’angku, ghenangenouw e reiy’ sa mina’asa en siniwoku i wee em bangsa i yi’i.