¹ Katoroan si Sanbalat wo si Tobia wo si Gesyem, tou Arab i ti’i wo se kesaru-kesaru meiy walina nu liminga, kaa niaku ku simampetouw minangun sumeup em beton, i ka’ayo reiy’ mola kasi sipo’opot ma’anouw tu’u i ka’ayo e nedo ni’itu witu em pepalen leloangan e reiy’pe’ neiyku i paas em pepalenna, ² takar si Sanbalat wo si Gesyem se timoke tou wia niaku ampit e nower: “Meiy, kita sumiwola pinasungkulan mewali-wali waki Kefirim, waki kewong Ono!” Ta’an nisea se mekemaksut mececilakala niaku. ³ O laa aku mapa’ali tetoke wia nisea ampit e wewingkot: “Niaku ku kasuatan matuanala e nesa pepa’ayangen wangko’. Niaku ku reiy’ mete’u meiy! I wee en sapa em pepa’ayangen i yi’i ni’i kaena’ eng karengan ku timele’ula nyi’a wo mea wia nikouw!” ⁴ I ka’ayo makaepat sea minakiali e nower tanu ni’itu wia niaku wo susur e nyi’a ku meela wewingkot masuat wia nisea. ⁵ O laa ampit eng kenaramen masuat i wee eng kalimana si Sanbalat si minakialimi siesa anak buahna wia niaku si minalimi en surat neiy i kawuka’. ⁶ Witu en surat i ti’i neiy i kepatik: “Wawean se mengena-nena’ witu e nelet ne bangsa-bangsa wo si Gasymu si minulitela nyi’a, kaa nikoo wo se tou-tou Yahudi kouw mekemaksut laa mererangu, wo eng karengan e ni’itu kouw mebangun sumoup em beton. Awes kangkasi, i ki’it e nabar ni’itu, nikoo koo pa’ar mamuali raja nea. ⁷ Awes tare nikoo koo timu’udekola se nabi-nabi se lewo’ sa reiy’ mabarla tanume en toumu waki Yerusalem, en tuana: Wawean siesa raja waki Yehuda! En teakan, e nabar tanu ni’itu e laa lingan ni raja. Eng karengan e ni’itu, meiy, kita mewali-wali rumunding!” ⁸ Ta’an niaku ku minapa’ali tou wia nisia ampit e wewingkot: “Kapualitan tanu en tinotormu i ti’i e reiy’ ma’an mekasa wia. Ni’itu em bela’awa’mu i te waya!” ⁹ Karengan nisea nu waya se pa’ar mengide-ngide’la nikeiy, genangna: “Nisea se laa mayala em pepa’ayangen i ti’i, i ka’ayo reiy’ mete’u i sampetla.” Ta’an niaku e nulitna ku me’inakut esa nga kaente’an eng keter. ¹⁰ Katoroan niaku nu minea waki wale ni Semaya bin Delaya bin Mehetabeel, karengan nisia si kina’ape’an ma’eiy, lumila mouw sia: “I waya mola kita maatoan waki wale ni Empung, witu eng gorem em Bait Suci, wo kumusi’ em pepalen-pepalenna, karengan wawean sitou si pa’ar ma’eiy mewewunu’ nikoo, iyon, em bengi i yi’i nisea se pa’ar ma’eiy mewewunu’ nikoo.” ¹¹ Ta’an em pokeiyku: “Tou wisa ku’a re’en si tanu niaku i yi’i si laa tumingkasla en tou? Tou wisa ku’a re’en si tanu niaku i yi’i si toro ghomoremla witu em Bait Suci wo minena’ matou-tou? Niaku ku reiy’ mea!” ¹² Karengan eng kete’uangku ulit, kaa si Empung si reiy’ timoke nisia. Nisia si timotorla e wenti’ i ti’i wia niaku, karengan si winoko’an ni Tobbia wo ni Sanbalat. ¹³ I wee e nyi’i nisia si winoko’an, rio aku mameide’la laa o sumiwo en tuana, i ka’ayo aku makadosa. Ampit en tuana nisea se makapunyala kalempotan kaa laa mewewu’ulela e ngaranku, i ka’ayo toro sumero’la niaku. ¹⁴ Oh Empungku’ ghenangenouw kumura si Tobia wo si Sanbalat siesa o siesa nu mininta’ mola! Tu’un e winta’ ni nabiah Noajah wo se nabi-nabi walina se pa’ar minengide-ngide’la niaku. ¹⁵ Takar sumampetola em beton i ti’i witu en tanggal rua nga pulu’ o lima en sumedot Elul witu e nedo lima nga pulu’ o rua nga endo. ¹⁶ Katoroan em baya ne kesaru meiy nu liminga eng kapualitan i ti’i, meide’ mouw em baya ne bangsa kaledong meiy. Nisea se kasa kinaliongan eng gio wo minawena’as, kaa em pepa’ayangen i ti’i en tinuanala ampit en sesawangan ni Empung meiy. ¹⁷ Witu e masa ni’itu kangkasi em baya se pamuka-muka ne Yehuda se minapa’ali kelaker en surat wia si Tobia, wo eng kapurikitna nisea se simungkul en surat-surat waki nisia, ¹⁸ karengan kelaker tou waki Yehuda se makapunyala wewa’akesan en tiwa’ ampit nisia, karengan nisia nyi’a mouw si manuang ni Sekhanya bin Arah, kasuatan si Yohanan, oki’na, si minedo sioki’ ni Mesulam bin Berekhya tanume si ka’awu. ¹⁹ O kangkasi nisea se menoto-notor e reiy’ sa mina’asa eng kale’osan ni Tobia witu en saruanku wo e reiy’ sa mina’asa lelila’angku e reiy’ maena-ena’ neiy i wewerla wia nisia. O kangkasi si Tobia si minapa’ali en surat-surat kaa laa mengide-ngide’la niaku.