¹ Katoroan si Sanbalat nu liminga, kaa nikeiy keiy kasuatan mebangun sumoup em beton, tumo’orouw e nupi’na wo nisia si kasa rara ate. Sia si menero-nero’la se tou Yahudi ² wo meila’ witu en sinaru ne patuari-patuarina wo ne suraro Samaria: “Sapa mouw ee pasil em patuanan ne tou Yahudi lewea’ i yi’i? Sapa ku’a re’en nisea se mapate’etep e wo’o sapa? Sapa ku’a re’en sea laa ma’ali en sesempe? Sapa ku’a re’en sea laa sumampet witu esa nga endo? Sapa ku’a re’en sea laa tumoula sumoup em batu-batu waki ruruk e riberek e minarengisouw mina’apu tanu e nyi’i?” ³ Laa o lumila’ mouw si Tobia, tou Amon i ti’i, si witu en tawina: “Ma’anouw tu’u sea mangun sumoup, sa siesa nga ipus asu en talun rumenteki wo lumeler nyi’a, i karonga’ mouw em beton watu nea.” ⁴ Oh, Empung meiy, lingane kumura keiy pasero’an. Purikitla en sero’ nea tumoro eng kokong nea nuesa wo i sarakanola sea mamuali rinemu’la waki tana’ en tampa ne tinaang. ⁵ Te’a Koo mepepenetla eng kaselokan nea, wo en dosa nea te’a perere’in-Nu waki sinaru-Mu, karengan nisea se rimarala e nate-Mu ampit eng kapawinta-winta’ nea wia se tou-tou se kasuatan mebangun. ⁶ Ta’an nikeiy keiy reiy’ maena-ena’ mebangun em beton i ka’ayo esa nga parua eng kerakek wo i ka’ayo en tempok-tempokna maatoan, karengan se minapekasa bangsa se mepa’ayang ampit em pakasa’an e nate. ⁷ Katoroan si Sanbalat wo si Tobia ma’an se tou Arab wo se tou Amon wo se tou Asdot nu liminga, kaa em pepa’ayangen pasoupan em beton Yerusalem e melaa wo kaa em po’opot-po’opot em beton e muleiy mouw mapenet, takar kasa mouw meupi’ sea. ⁸ Nisea nu waya se simiwola paasa-asa’an mewali-wali kaa laa meseseke’la e Yerusalem wo mesesiwola eng karingka’an maname. ⁹ Ta’an nikeiy keiy simombayang wia si Empung meiy, wo simiwola petayuran wia nisea oat o wengi karengan eng kapawinta-winta’ nea. ¹⁰ Lumila’ mouw se tou Yehuda: “Kaente’an em baya ne mememopo eng kimo’okosouw wo e riberek eng kasape’ laker. Reiy’ makawoo keiy mebangun sumoup em beton i yi’i.” ¹¹ Ta’an se kesaru-kesaru meiy se ghimenang: “Nisea se reiy’ laa mamete’u wo reiy’ laa lumoo’ sapa-sapa, i ka’ayo kita ta witu e nelet nea, munu’ nisea wo mapaena’la em pepa’ayangen i ti’i.” ¹² Katoroan se tou-tou Yahudi se maena’ tawi nea se minakapulu’ momi mineiy ngume’enge’la nikeiy: “Nisea se laa rumego nikita waki e reiy’ sa mina’asa tampa paena’an nea.” ¹³ takar niaku ku timampala se rakyat i ki’it se kaum ne me’urang nea ampit en santi, tetura’ wo em panah waki weteng-weteng kasa kumeng waki tampa i ti’i, witu muri em beton, witu en tampa-tampa minawuka’. ¹⁴ Tegha’ engkula em baya nyi’a, laa o tumo’or rumedeiy wo lumila’ wia em baya ne pamuka-muka wo em baya ne makua-kuasa wo wia se tou-tou walina: “Te’a kouw meide’ wia nisea! Ghumenangouw wia si Tuhan si kasa wangko’ wo si ke’ekel wo sumeke’ mouw i wee se patuari-patuarimu, i wee se oki-oki’ tuama wo se oki-oki’ wewenemu, i wee si ka’awumu wo em balemu.” ¹⁵ Katoroan lininga ne kesaru meiy, kaa en tetiro’an nea eng kinakete’uan neiy mola wo kaa si Empung si mino’opolola nyi’a, takar en toro mouw nikeiy nu waya mareng mea waki beton, siesa o siea mea witu em pepa’ayangenna. ¹⁶ Rengan e nendo ni’itu se esa nga weteng waki se anak buahku se matuanala em pepa’ayangen, wo se esa nga weteng walina se timiboiy en tetura’, kekelung wo em panah wo minakela e labung Zirah, kasuatan em baya ne ma’aka-aka se rimedeiy witu muri ne pakasa’an kaum Yehuda ¹⁷ se mebangun witu em beton. Se tou-tou minesa’an wo maater se matuanala em pepa’ayangenna ampit e nesa lawas wo ampit e lawas walina nisea se timiboiy e lelutam. ¹⁸ Susur tou si mebangun si mepa’ayang ampit mina’akesla en santi witu e rereenanna, wo witu esa nga wekaku rimedeiy si sumesengo en sesebungen. ¹⁹ Lumila’ mouw aku wia em baya ne pamuka-muka wo em baya ne makua-kuasa wo wia se tou-tou walina: “Pepa’ayangen i yi’i en sela wo em pelas, wo nikita ta neiy i kasera witu em beton, siesa si wa’akat waki se walina. ²⁰ Wo sa kouw luminga legu’an en sesebungen waki e nesa tampa, merurouw mea maname matola nikeiy. Empung ta si laa sumeke’ i wee nikita!” ²¹ Witu esa nga wekana si Meremot bin Uria bin Hakos si masoupla e weteng tumodongla, waki pepalen maghoreme em bale ni Elyasib i ka’ayo witu en tempok em bale ni Elyasib. ²² Witu esa nga wekana em baya ne imam, se tou-tou waki Kewong e Yordan, se matuanala em pasoupen. ²³ Witu esa nga wekana si Benyamin wo si Hasub se masiwola em pasoupen witu en saruan em bale nea. Witu esa nga weka nea si Azarya bin Maaseya bin Ananya se masiwola em pasoupen witu esa nga weka em balena.