¹ Takar tumiro’ mouw si imam wangko’ Elyasib wo em baya ne imam, patuari-patuarina, laa o mangun sumeup em pepalen leloangan Domba. Nisea se timahbisla nyi’a wo maas em pepalen-pepalenna. Nisea se timahbisla nyi’a i ka’ayo em pewale Mea, em pewale Hananeel. ² Minetawian ampit nisea se tou-tou Yerikho mebangun, wo minetawian ampit se tou-tou i ti’i si Zakur bin Imri. ³ Pepalen leloangan Sera’ em pebangunen ne bani Senaa. Nisea se minaas en salawako-salawako laa o maas em pepalen-pepalenna ampit eng keketep-keketep wo eng kelam-kelamna. ⁴ Minetawian ampit nisea si Meremot bin Uria bin Hakos si matuanala em pasoupen, wo minetawian ampit nisia si Mesulam bin Berekhya bin Mesezabeel. Minetawian ampit nisia si Zadok bin Baana matuanala em pasoupen, ⁵ wo minetawian ampit nisia se tou-tou en Tekoa. Se pamuka-muka nea i te se so’o meela em palukana i wee em pepa’ayangen ni tuang nea. ⁶ Pepalen leloangan Ure en sinoupla ni Yoyada bin Paseah wo ni Mesulam bin Besoja. Nisea se minaas en salawako-salawako laa o maas em pepalen-pepalenna ampit eng keketep-keketep wo eng kelam-kelamna. ⁷ Minetawian ampit nisea si Melaca, tou eng Gibeon, wo si Yadon, tou e Meronot, matuanala em pasoupen ma’an se tou-tou eng Gibeon wo Mizpa, se witu wawa’ eng kakuasa’an ni kumbasar daerah lewet talikuran en so’oso’an Efrat. ⁸ Minetawian ampit nisea si Uziel bin Harhaya, si meta’esa’an tou meneniwo mas, matuanala em pasoupen,wo minetawian ampit nisia si Hananya, siesa tou sumesewok e rampa-rampa. Nisea se minapate’etep e Yerusalem i ka’ayo em beton Penar. ⁹ Minetawian ampit nisea si Refaya bin Hur, si makua-kuasa esa nga parua wilayah Yerusalem nesa si matuanala em pasoupen. ¹⁰ Minetawian ampit nisia si Yedaya bin Harumaf si matuanala em pasoupen, minakatena-tena’ witu en sinaru em balena, wo minetawian ampit nisia si Hatus bin Hasabneya. ¹¹ Malkia bin Harim wo si Hasub bin Pahat-Moab si masoupla e weteng walina wo em pewale Paapian. ¹² Minetawian ampit nisea si Salum bin Halohesh, si makua-kuasa esa nga parua wilayah Yerusalem walina si matuanala em pasoupen mewali-wali se oki-oki’ wewenena. ¹³ Pepalen leloangan Lebak en sinoupla ni Hanun wo ne penduduk Zanoah. Nisea se minangunla nyi’a sumoup wo minaas em pepalen-pepalenna ampit eng keketep-keketep wo eng kelam-kelamna. O kangkasi em beton en sinoupla eng kelabotan esa nga riwu hasta i ka’ayo waki pepalen leloangan Liwoka. ¹⁴ Pepalen leloangan Liwoka en sinoupla ni Malkia bin Rekhab, si makua-kuasa e wilayah Bet-Kerem. Sia si minangunla nyi’a sumoup wo minaas em pepalen-pepalenna ampit eng keketep-keketep wo eng kelam-kelamna. ¹⁵ Pepalen leloangan Kembu’an en sinoupla ni Salum bin Kolhoza, makua-kuasa e wilayah Mizpa. Pepalen leloangan i ti’i em binangunna sumoup, wineeanna atep wo i paasna em pepalen-pepalenna ampit eng keketep-keketep wo eng kelam-kelamna. O kangkasi en sinoupna em beton pusung paeruran e rano en salu, tawi en taman ni raja i ka’ayo witu e naran-naran e matumpami waki kota Daud. ¹⁶ Witu esa nga wekana si Nehemia bin Azbuk, si makua-kuasa esa nga parua wilayah Ben-Zur, si masiwola em paseupen i ka’ayo waki saruan em pakuburan ni Daud wo i ka’ayo witu em pusung siniwote wo e wale em baya ne pahlawan. ¹⁷ Witu esa nga wekana se tou-tou Lewi se masiwola em pasoupen, nyi’a i yi’i si Rehu bin Bani, wo minetawian ampit nisia si Hasabaya, makua-kuasa esa nga parua e wilayah Kehila esa, i wee e wilayana. ¹⁸ Witu esa nga wekana se patuari-patuari nea, nyi’a i yi’i si Binui bin Henadad, makua-kuasa esa nga parua e wilayah Kehila walina, si masiwola em pasoupen. ¹⁹ Minetawian ampit nisia si Ezer bin Yesua, makua-kuasa e Mizpa, si masoupla e weteng tumodongla, witu en saruan em pasosoran mea waki godong lelutam, tawi e Ruuna. ²⁰ Witu esa nga wekana si Barukh bin Zabai masoupla e weteng tumodongla, waki Ruuna i ka’ayo witu em pepalen maghoreme em bale ni imam wangko’ Elyasib. ²¹ Witu esa nga wekana si Meremot bin Uria bin Hakos si masoupla e weteng tumodongla, waki pepalen maghoreme em bale ni Elyasib i ka’ayo witu en tempok em bale ni Elyasib. ²² Witu esa nga wekana em baya ne imam, se tou-tou waki Kewong e Yordan, se matuanala em pasoupen. ²³ Witu esa nga wekana si Benyamin wo si Hasub se masiwola em pasoupen witu en saruan em bale nea. Witu esa nga weka nea si Azarya bin Maaseya bin Ananya se masiwola em pasoupen witu esa nga weka em balena. ²⁴ Witu esa nga wekana si Binui bin Hanadad si masoupla e weteng tumodongla, waki wale ni Azarya i ka’ayo e Ruuna wo i ka’ayo em Penjuru. ²⁵ Palal bin Uzai si masiwola em pasoupen witu en saruan e Ruuna wo witu en saruan em pewale rakek e rimoa’mi waki istana ni raja, tawi em podol petayuran. Witu esa nga wekana si Pedaya bin Paros si masiwola em pasoupen ²⁶ i ka’ayo waki saruan em pepalen leloangan Rano, waki esa nga weka sedangan wo witu en saruan em pewale rimoa’. Sapa tare em baya ne budak witu em bait ni Empung se minena’ waki Ofel. ²⁷ Witu esa nga weka ni Pedaya se tou-tou en Tekoa se masoupla e weteng tumodongla, waki saruan em pewale wangko’ e rimoa’ i ti’i i ka’ayo waki beton Ofel. ²⁸ Muleiymi waki pepalen leloangan Kawalo em baya ne imam se simiwola em pasoupen, siesa o siesa witu en saruan em balena. ²⁹ Witu esa nga weka nea si Zadok bin Imer si masiwola em pasoupen witu en saruan em balena. Witu esa nga wekana si Semaya bin Sekhanya, si tumetayur em pepalen leloangan Sedangan. ³⁰ Witu esa nga wekana si Hananya bin Selemya wo si Hanun, sioki’ ni Zalaf kaenem, se masoupla e weteng tumodongla . Witu esa nga weka nea si Mesulam bin Berekhya si masiwola em pasoupen witu en saruan e ruraghna. ³¹ Witu esa nga wekana si Malkia, siesa tou meneniwo mas, si masiwola em pasoupen i ka’ayo witu em bale em baya ne budak witu em bait ni Empung wo em baya ne belante’, witu en saruan em pepalen leloangan Pedaftaran wo i ka’ayo witu eng kamar atas waki ruuna. ³² O laa e nelet eng kamar atas witu en duuna wo em pepalen leloangan Domba em baya ne meneniwo mas wo em baya ne belante’ se masiwola em pasoupen.