¹ Witu en sumedot Nisan en te’un karua nga pulu’ em paperenta’an ni raja Artahsasta, katoroan e minamuali lukarku kaa laa sumadiala anggor, niaku ku minopola e nanggor wo ma’ayola nyi’a wia si raja. Karengan niaku ku paloo’ola tekur, e memang reiy’pe’ ma’an mekasa mamuali witu en sinaru ni raja, ² o mueiy mouw sia wia niaku: “Ka’a eng giomu en tedur, ma’anouw tu’u koo reiy’ rara’an? Nikoo koo tantu mouw tekur ate.” Laa o ku minamuali kasa meide’. ³ Wingkotku wia si raja: “Tumou mouw si raja i wee eng keurena! Kumura eng gioku e reiy’ laa tumedur, sa eng kota, en tampa pakuburan ne nene moyangku, e minamualimouw riberek wo em pepalen-pepalen leloanganna e mina’apu kinaan e napi?” ⁴ O laa em pokeiy ni raja wia niaku: “Jadi, sapa ni’i kepa’armu?” takar ku sumombayang wia si Empung pakasa’an e langit, ⁵ kamurian e wingkotku wia si raja: “Sa si raja mapokeiyla le’os wo mepa’arla wia si hambamu i yi’i, i toke mouw aku mea waki Yehuda, mea waki kota pakuburan ne nene moyangku, rio aku mangunla nyi’a sumeup.” ⁶ Laa o mueiy mouw si raja wia niaku, kasuatan si permaisuri si rimuber witu esa nga wekana: “Pira eng keure koo witu em pakela-kelangan, wo kawisa ku’a re’en koo marengi?” Wo si raja si minepa’ar timoke niaku, nu reiy’ mouw niaku nu timotorla eng keurean e nedo wia nisia. ⁷ Lumila’la aku wia si raja: “Sa si raja mapokeiyla le’os, weeanola aku surat-surat i wee se kumbasar-kumbasar waki daerah lewet en so’oso’an Efrat, rio sea mangintorola niaku o laa i ka’ayo aku i ka’ayola waki Yehuda. ⁸ O kangkasi e nesa surat i wee si Asaf, tumetegha’ en taman ni raja, rio sia meela niaku kayu kaa laa mepepaas en salawako-salawako witu em pepalen-pepalen leloangan waki benteng em Bait Suci, i wee em beton kota wo i wee em bale laa ena’angku.” Wo si raja si lime’ele’la em pengiweengku i ti’i, karengan e lawas ni Empungku murah en timerungla niaku. ⁹ Takar meiy mouw aku wia se kumbasar-kumbasar waki daerah lewet en so’oso’an Efrat wo sumarakan wia nisea en surat-surat ni raja. Wo si raja si rimeo se panglima-panglima paseke’ wo se tou-tou mesake-sake kawalo tumeperla niaku. ¹⁰ Katoroan si Sanbalat, tou eng Horon, wo si Tobia, tou e Amon, si pelayan i ti’i, nu liminga eng kapualitan i ti’i, nisea se kasa oki’ ghenang kaa wawean tou se mineiy mame’inakutla eng kasejahtera’an ne tou Israel. ¹¹ Takar i ka’ayo mola aku waki Yerusalem. Niaku nu telu nga endo mouw maname, ¹² tumo’orouw aku witu e nendo wengi mewali-wali se parala tou i te se timeperla niaku. Niaku ku reiy’ minakite’ula wia si seiy i te tu’u en tetiro’an laa petetuanangkula i wee e Yerusalem, e neiy i weela ni Empungku witu nateku. O kangkasi e reiy’la walina sitekapen wia niaku kacuali si sinakeangku. ¹³ Tuana mouw witu e nendo wengi niaku nu kimaluar timorola em pepalen leloangan Lebak, mea waki matorome eng kembu’an Leloiy’ Naga wo em pepalen leloangan Liwoka. Niaku ku simoisapla makale’o-le’os em beton-beton Yerusalem e minaghogharouw wo em pepalen-pepalen leloanganna e mina’apu kinaan e napi. ¹⁴ Laa o ku mapawee-weela em pakela-kelangangku mea waki pepalen leloangan Kembu’an wo em pusung Raja. Karengan si tekapen sinakeangku si reiy’ mete’u lumeas witu en tampa i ti’i, ¹⁵ o ku lumongkot matas timorola en so’oso’an pera witu e nendo wengi wo ku sumoisapla ampit e makale’o-le’os em beton i ti’i.Kamurian o ku mareng, laa o ghumorem timorola em pepalen leloangan Lebak. Tuana mouw aku nu minareng. ¹⁶ Em baya ne makua-kuasa se reiy’ mete’u wisa e lina’angku mola wo sapa en tinuanaku mola, karengan i ka’ayomi i yi’i niaku ku reiy’pe’ minakite’ula sapa-sapa wia se tou Yahudi, le’os wia em baya ne imam, ka’apa tu’u wia em baya ne pamuka-muka, wia em baya ne makua-kuasa wo em baya ne petugas walinana. ¹⁷ Lumila’ mouw niaku wia nisea: “Loo’on niouw eng ka’eseman em pine’antami , nyi’a i yi’i e Yerusalem e minamuali mouw riberek, wo em pepalen-pepalen leloanganna e mina rengisouw. Meiy, tu wangunen ta sumeup em beton Yerusalem , rio kita reiy’ mouw kasi sero’an.” ¹⁸ Katoroan i pakite’ukula wia nisea, kumura eng kamurahna e lawas ni Empungku en timerungla niaku wo kangkasi sapa neiy i lila’la ni raja wia niaku, lumila’ mouw sea: “Nikeiy keiy timiro’ kaa laa mebebangun!” Wo ampit eng kaente’an eng keter sea muleiy tumuanala em pepa’ayangen e le’os i ti’i. ¹⁹ Katoroan si Sanbalat, tou eng Horon, wo si Tobia, tou Amon, si pelayan i ti’i, wo si Gesyem, tou Arab, nu liminga ni’itu, sea menero-nero’la wo maoki’la nikeiy. Pokeiy nea: “Sapa em patuanan niouwla i ti’i? Sapa kouw pa’ar mererangu witu si raja?” ²⁰ Niaku ku miningkot nisea, pokeiyku: “Empung em pakasa’an e langit, Nisia mouw si simiwo nikeiy minua’! Nikeiy, hamba-hamba-Na, keiy timiro’ mouw kaa laa mebebangun. Ta’an nikouw kouw reiy’ makapunya weteng ka’apa hak wo reiy’ laa ghenangen waki Yerusalem!”