¹ Ta’an si Ayub si miningkot: ² “Nulit, niaku ku mete’u, kaa en tuana mouw eng kapualitanna, ma’anouw tu’u sitou si ulit witu en sinaru ni Empung? ³ Sawona’na sia pa’ar mepeperkara ampit si Empung esa waki esa nga riwu sia si reiy’ mete’u mero-Nisia. ⁴ Empung i ti’i si sama’ wo ente’, seiy ku’a re’en si toro kumete sumaru Nisia, wo minena-ena’ lawir? ⁵ Sia mouw si simoro’la eng kuntung-kuntung ampit reiy’ kinete’uala ne tou, si mineghogha-ghoghirla nyi’a witu e nupi’-Na; ⁶ si minensongi em bumi waki tampana, i ka’ayo em pa’asekna minengoghe-ngoghe; ⁷ si minee perenta wia siendo, i ka’ayo reiy’ rimetik, wo kimalero se tekapen-tekapen ampit e wa’il; ⁸ si maesa-esa minitarla e langit, wo kume’ang witu natas em balolongan-balolongan en tasik; ⁹ si simiwola si sumesena’ Biduk, sumesena’ Belantik, sumesena’ Kartika, wo e werot-werot ne sumesena’ Woang Timu; ¹⁰ si timuanala em pasiwo-siwon wangko’ e reiy’ kinatika’an, wo e maka’erangen-maka’erangen e reiy’ i katotor eng kelakerna. ¹¹ Sakawisa Sia lumangkoiyla niaku, niaku ku reiy’ limoo’-Nisia, wo sa Sia lumeas, niaku ku reiy’ minete’ula. ¹² Sakawisa Sia kumaat, seiy si laa mape’la-Nisia? Seiy si laa tumogoor-Nisia: Sapa en tinuana-Mula? ¹³ Empung si reiy’ tumaangla e nupi’-Na, witu wawa’ eng kuasa-Na em baya ne sumesawang ni Rahab se minengkur; ¹⁴ lebe-lebe niaku, kumura aku toro mero Nisia, meleng e lelila’an-lelila’angku witu en sinaru-Na? ¹⁵ Ma’anouw tu’u aku ulit, niaku ku reiy’ wona’ mero Nisia, awes tare aku ku lewo’ sa reiy’ maleiy en tongkoupusen wia si timure niaku. ¹⁶ Sa aku maleiy, Sia si mingkot; niaku ku reiy’ mete’u ma’eman, kaa Nisia si pa’ar melelingala en suaraku; ¹⁷ Sia mouw si rimimu’umukla niaku witu reghes tumokol, si minepelaker em pali’ku ampit e waya’an em pa’ar, ¹⁸ si reiy’ minayala niaku maseng, ta’an si minesula niaku ampit eng kape’itan. ¹⁹ Sa en tanume eng kaente’an eng keter, Sia mouw si makapunyala! Sa en tanume eng ka’adilan, seiy si toro kume’I Nisia? ²⁰ Ma’anouw tu’u aku ulit, en sumaku nuesa e laa mapaloo’o-loo’ola niaku ku reiy’ ulit; ma’anouw tu’u aku reiy’ siselok, Sia si laa mapaloo’o-loo’ola niaku ku makaselok. ²¹ Niaku ku reiy’ makaselok! Niaku ku reiy’ mepadungla en touku, niaku ku reiy’ maweela ghenang em patou-touangku! ²² Em baya nyi’a i ti’i e masuat i te, ni’itu mouw eng karenganna niaku ku limila’: si reiy’ simelok wo si simelok se marua-ruana se pinuneng-Nala. ²³ Sa en sesa’alit-Na e munu’ ampit e minakarengan, Nisia si menero-nero’ eng kareiy’ siarapan ne tou reiy’ siselok. ²⁴ Bumi e neiy mouw i sarakanla witu lawas ne tou fasik, wo em beren em baya ne akimna em pinenet-Na mola; Sa reiy’ kaa Nisia, ni seiype’ kasi? ²⁵ Nendo-nendoku e limease lebe repet ta’an siesa tou tumetingkas, minere’i reiy’ ampit limoo’ e naruiy, ²⁶ makoror e limangkoiy tanumokan e lodeiy pondang, tanu si rajawali masear em pekekaanenna. ²⁷ Sa aku ghumenang: Niaku ku laa meleliurla e nga’angal i penga’angalku, rimoba eng gioku, wo melaya-laya’, ²⁸ takar meide’ mouw aku wia e reiy’ sa mina’asa kasusa’angku; niaku ku mete’u, kaa Nikoo koo reiy’ laa mapokeiyla niaku reiy’ makaselok. ²⁹ Niaku ku neiy i papaloo’o-loo’ola makaselok, sapa eng ka’aranna aku mesesusala en tou ampit e reiy’ sipenoron? ³⁰ Ma’anouw tu’u aku moas en touku ampit en salju wo moas e lawasku ampit en sabong, ³¹ ta’anouw Nikoo koo laa tumenemla niaku witu lipetek, i ka’ayo e labungku mapedam e ri’iris witu niaku. ³² Karengan Nisia si reiy’ tou tanu niaku, i ka’ayo aku toro mingkot-Nisia: Meiy mewali-wali sumaru em paadilan. ³³ Reiy’la wasit witu e nelet meiy, si toro tumiboiy nikeiy nu rua! ³⁴ Ma’anouw Sia sumingkiri em bewewe-Na waki niaku, te’a aku toron eng kineide’an witu Nisia, ³⁵ takar niaku ku laa sumusuiy ampit e reiy’ mapedam e meide’ witu Nisia, karengan niaku ku reiy’ maweela ghenang eng kaselokangku.”