¹ Takar sumusuiy mouw si Bildad, tou en Suah: ² “Pirape’ eng keure kasi koo laa sumusuiy en tuana, wo e lelila’an en sumamu tanu e reghes maeder? ³ Ma’an tu’u si Empung si mareko’la eng ka’adilan? Ma’an tu’u Si Kasakuasa si mareko’la eng kaulitan? ⁴ Sawona’na se oki-oki’mu se simiwo mola en dosa witu Nisia, takar Nisia si minaya mola nisea kinuasa’ala eng kaselokan nea. ⁵ Ta’an nikoo, sa koo menero si Empung, wo maaleiy en tongkoupusen waki Si Kasakuasa, ⁶ sa koo weresi wo jujur, takar tantu mouw Sia si laa tumo’or demi nikoo wo sia si laa sumegaya’la em bale kaa nyi’a mouw eng hakmu. ⁷ Takar eng kadudukannu eng ketareanna e laa kaloo’an hina, ta’an eng kadudukannu eng kamurian e laa mamuali kasa mulia. ⁸ Memueiy-mueiy mouw en tanume se tou-tou en zaman ketareanna, wo weeanola ghenang sapa eng kinumisi em baya ne nene moyang. ⁹ Karengan nikita, oki-oki’ eng kaawi’in, ta reiy’ mete’ula sapa-sapa; karengan e nendo-nendo ta en tanu eng kumalenoan-kumalenoan wia em bumi. ¹⁰ Reiy’ ku’a re’en nisea se lewo’ sa reiy’ majarla nikoo wo se lewo’ sa reiy’ sumusuiy wia nikoo, wo tumoula e lelila’an-lelila’an waki akal budi nea? ¹¹ Toro ku’a re’en em pondang tumou rakek, sa reiy’ witu eng ga’agharan, ka’apa e rewo’ tumou sobor, sa reiy’ witu en dano? ¹² Kasuatan witu em patouan, nu reiy’pe e nedona sampuren, mawelesouw sia rumeriorla e rukut walina. ¹³ Tuana mouw em pine’ani em baya ne tou se limiurla si Empung; takar mere’i mouw e narapan ne tou fasik, ¹⁴ en tetedeanna tanu e wanaang ni karimangka’, eng ka’emananna tanu en sala ni karimangka. ¹⁵ Sia si timebe witu em balena, ta’an em balena i ti’i e reiy’ minena’ timaga’, sia si simiwola nyi’a tampa patiboiyan, ta’an em bale i ti’i e reiy’ taang. ¹⁶ Sia si tanu en tetanemen-tetanemen en segaya’pe’ witu em pasu’ ni endo, tempokna e minanap waki minapekasa en taman. ¹⁷ Kalat-kalatna rimiker en tawunan e watu, en simori’isip witu en selet-seletna em batu i ti’i. ¹⁸ Ta’an sa sia sawuteni waki tampana, takar en tampana i ti’i e reiy’ maakula nisia kasi, pokeiyna: E reiy’pe’ ma’an mekasa aku lumoo’ nikoo! ¹⁹ Tuana mouw eng kepa’aran em patou-touanna, wo en tetanemen-tetanemen walina e limentuti waki tana’. ²⁰ Kete’uanola, Empung si reiy’sumede’ sitou lale’, wo Nisia si reiy’ tumiboiy e lawas ni tou simiwo lewo’. ²¹ Sia si laape’ sumiwo en sumamu kume’eke’ wo en sumpingmu merio-rio. ²² Rumeri’iris nikoo se laa kesaputan ampit e nirang, wo en dasing ne tou fasik e laa reiy’ mouw wia kasi.”