¹ “Reiy’ ku’a re’en sitou si lewo’ sa reiy’ memalo-malo’ wia em bumi, wo e nendo-nendona en tanu e nendo-nendo ne tou paweean tetoro? ² Tanu wia siesa budak malelola en teterungan, tanu wia sitou paweean tetoro si mengena-ngena’la en tetorona, ³ tuana mouw e winetengla wia niaku en sumedot-sumedot e reiy’ si penoron, wo neiy i tantula wia niaku e wengi-wengi wuta eng kasusa’an. ⁴ Sa aku mea tumekel, takar eng genangku: Kawisa ku’a re’en aku laa mawongke? Ta’an em bengi e rimenet kelabot, wo niaku ku rini’ikem em balisa i ka’ayo en tawi moat. ⁵ Se witek wo riawu se timutuwla e nouwakeku, kuli’ku e minakete, laa o mapete’. ⁶ Nendo-nendoku e limease lebe repet ta’an e lulut, wo eng kimawus reiy’ ampit e narapan. ⁷ Ghenangenouw, kaa em patou-touangku en sengoan i te nasengan; em berenku e reiy’ mouw kasi laa lumoo’ e le’os. ⁸ Tou si tumu’usla niaku, si reiy’ mouw laa lumoo’ niaku kasi, kasuatan Nikoo nu tumu’usla niaku, niaku ku reiy’ mouw wia kasi. ⁹ Tanu eng kumura e linaak mere’i wo minerar i kaliong, tuana mouw kangkasi sitou nu tumumpame witu eng kaoatan ne tou minate si reiy’ mouw laa modoli kasi. ¹⁰ Sia si reiy’ mouw kasi mareng waki walena, wo si reiy’ mouw sine’un kasi en tampa pinaena’anna. ¹¹ Kaa ni’itu niaku tu’u ku reiy’ laa tumaang en sumaku, niaku ku laa sumusuiy witu eng kase’esekan e imukurku, nguma’angal witu eng kange’engetan e nateku. ¹² Sapa ku’a re’en niaku i yi’i ku tasik ka’apa naga, i ka’ayo Koo timampala tumetayur witu niaku? ¹³ Sakawisa aku ghumenang: En tampa patekelangku e laa mee niaku pangiboran, wo en tampa palo’orangku e laa mewewure’la e nga’angal penga’angalku, ¹⁴ takar Nikoo koo limo’ositla niaku ampit e nimpian wo simenge’la niaku ampit eng khayal, ¹⁵ i ka’ayo aku lebe pa’ar koti’en wo mate ta’an tumanggong eng kasusa’angku. ¹⁶ Niaku ku senso’, niaku ku so’o tumou i wee eng keure-urena. I waya mola aku, karengan e nendo-nendoku en tanu i te en sengoan nasengan. ¹⁷ Sapa ku’a re’en ee pasil sitou, i ka’ayo sia si’i papokeiy-Mula wangko’, wo Koo mawee ghenangla, ¹⁸ wo si pengein-Nu susur memo’odo wo si peujin-Nu susur nedo? ¹⁹ Kawisa mouw ku’a rer’en Koo mewewerami en tu’usan-Nu waki niaku, wo mayala niaku, i ka’ayo aku i kalempot nume’enep e rura’ku? ²⁰ Sa aku masiwo en dosa, sapa ku’a re’en en siniwoku mola witu Nikoo, ee Tumetayur ne tou? Ka’a Koo sumiwola niaku sesarapen-Nu, i ka’ayo aku minamuali pemesa’anen i wee en touku? ²¹ Wo ka’a Koo reiy’ minampungla em pinasu’uskeku, wo reiy’ rime’ila eng kaselokangku? Karengan en teakan niaku ku neiy i kagholeiy witu e riawu, o laa Nikoo koo laa masero niaku, ta’an niaku ku reiy’ mouw laa wia kasi.”