¹ O laa si Ayub si miningkot: ² “Oh, satorona mouw wona’ eng kaupi’an e nateku e wilingen wo eng kabelotangku ni’i reta’ mewali-wali witu en timbangan! ³ Takar eng kawuterna e laa lumantouwla e neris waki tasik; eng karengan e ni’itu e neiy i karerio-rerior e lelila’angku. ⁴ Karengan sioki’na em pana waki Si Kasakuasa neiy i kate’etep witu e nouwakeku, wo e racungna en sine’esep ni imukurku; kahebatan ni Empung tanu se pasukan mesaru niaku. ⁵ Makuringking ku’a re’en si keledai siru waki tampa e rukut sobor, ka’apa mamoo ku’a re’en si sapi tawi eng kekaanenna? ⁶ Toro ku’a re’en eng kekaanen tewang eng kaanen reiy’ ampit em buras ka’apa sapa’ ku’a re’en em puti’na em burenga wawean em pe’anena? ⁷ Niaku ku reiy’ pa’ar kuma’apang nyi’a, em baya nyi’a i ti’i eng kekaanen makakero’on i wee niaku. ⁸ Oh, satorona eng kale’ele’an em pengiweengku wo si Empung si mee sapa em paarapengkula! ⁹ Satorona si Empung si mepa’ar rumimu’umukla niaku, satorona Sia si mayala e lawas-Na wo ma’apula e nyawaku! ¹⁰ Ni’itu mouw en tanupe’la em pangiboran i wee niaku, awes tare niaku ku laa mengompo-ngompo’ melaya-laya’ witu e nendo kange’engetan e reiy’ makasine’u en tongkoupusen, karengan niaku ku reiy’ ma’an mekasa sumangkal e nuwu’ Ni Kasakudus. ¹¹ Sapa ku’a re’en eng kaente’angku, i ka’ayo aku makawoo tumaang, wo sapa ku’a re’en e masa wia reriorku, i ka’ayo aku lewo’ sa reiy’ sumabaar? ¹² Sapa ku’a re’en eng kaente’angku tanu eng kaente’an em batu? Sapa ku’a re’en e nouwakeku en tambaga o siwon? ¹³ Reiy’ ku’a re’en e reiy’ mola kasi tetulungan i wee niaku, wo eng kelawiran e wa’akat wia niaku? ¹⁴ Seiy si metaang e nupus o rendem witu si kasuatna, si mapeparla e meide’la Si Kasakuasa. ¹⁵ Patuari-patuariku reiy’la si mete’u emanen tanu en so’oso’an, tanu en to’otolan waki so’oso’an e maso’oso’ minere’i, ¹⁶ eng kewur karengan en dano kimete, em bitu eng goremna en salju minerano, ¹⁷ eng kimo’okos witu noras ra’ar, wo minapera witu en tampana sakawisa tena’an em pasu’; ¹⁸ minemeko-meko’ e lalan e narosna, maso’oso’me waki padang rese, laa o mere’i. ¹⁹ Kafila waki Tema e menegha-negha’la nyi’a wo se rewok waki Syeba se maarapla nyi’a, ²⁰ ta’an nisea se oki’ ghenang karengan eng ka’emanan nea, nisea se kinale’ekokan i kekeka’ayo nea maname. ²¹ Tuana mouw kouw en teakan i wee niaku, katoroan nu limoo’ eng hebat, mineide’ mouw kouw. ²² Mekasa mouw ku’a re’en niaku limila’: Weeanola aku wo’o sapa, ka’apa: Weeanola niaku e loit wewoko’ waki hartamu, ²³ ka’apa: Liseiyi niaku waki lawas ne kesaru, ka’apa: Tubuusenouw niaku waki lawas ne tou lalim? ²⁴ Ajarenouw niaku, takar niaku ku laa menes; wo i tudu’la wia niaku witu eng kapualitan sapa niaku neiy i kaseip. ²⁵ Kumura eng kate’etepna e lelila’an-lelila’an jujur! Ta’an sapa ku’a re’en e maksut en sesero’an waki wetengmu i ti’i? ²⁶ Sapa ku’a re’en kouw mekemaksut mesesero’ e lelila’an? Sapa ku’a re’en e lelila’an ne tou se reiy’ siarapan em papokeiyla reghes? ²⁷ Awes tare witu se oki’ ula kouw malobo’ koba’, wo si kalomu si patuanan niouwla tanume em barang i pabelante’. ²⁸ Ta’an en teakan, lumenge mouw wia niaku; niaku ku reiy’ laa tumowo witu en sinarumu. ²⁹ Murikitouw, te’a mouw tu mamuali kawilesan, murikitouw, niaku ku tantu ulit. ³⁰ Sapa ku’a re’en wawean kawilesan witu lila’ku? Sapa ku’a re’en e langit-langitku e reiy’ mete’u mememange’anla em bencana?”