¹ Maleiy mouw – wawean ku’a re’en sitou mingkot nikoo? Wo wia si seiy witu e nelet ne tou-tou kudus koo laa lumenge? ² Eng kaulitna, sitou we’engel si winunu’ e rara ate, wo sitou ba’abal si pinatela e niri ate. ³ Niaku nuesa ku mekasa mouw lumoo’ sitou we’engel minamut, ta’an e minakarengan i kutokkula en tampa paena’anna. ⁴ Se oki-oki’na se salalu reiy’ katulungan, nisea se i pele’e-le’ek witu em pepalen leloangan e reiy’la sitou si laa mayami nisia. ⁵ Sapa e niupu’na, eng kaanen ma’apu ne tou arem, awes tare eng kaateni waki keuneran en tetune, wo se tou-tou re’o se mepa’arla eng kakaya’anna. ⁶ Karengan e reiy’ waki riawu o rumetiki en cilaka wo e reiy’ waki tana’ o tumoumi eng kasusa’an; ⁷ ta’an i te sitou si limentuti eng kasusa’an i wee en touna, tanu e wungangna e napi melayupe kerakek. ⁸ Ta’an niaku, tantu mouw ku laa sumero si Empung, wo wia si Empung niaku ku laa rumapotla em perkaraku. ⁹ Sia si timuanala em pasiwo-siwon – pasiwo-siwon e wangko’ wo e reiy’ katika’an, ma’an e maka’erangen-maka’erangen e reiy’ katotoran eng kelakerna; ¹⁰ Nisia si minee naro wia natas en saruan em bumi wo rima’araghi rano witu natas em penguma’an; ¹¹ Sia si timampala sitou hina witu en teper kerakekan wo sitou mengasi’ si minaka’ato tetulungan kaente’; ¹² Sia si mino’opolela en tetiro’an ne tou lali’iket, i ka’ayo em pe’inakutan e lawas nea e reiy’ minua’; ¹³ Sia si simikop sitou makahikmat witu eng kelali’iketanna nuesa, i ka’ayo en tetiro’an ni tou e minereko-reko’ em pino’opolela. ¹⁴ Witu e nendo oat nisea se tinoro e reiydem, wo witu e marorake nisea se maringka-ringkap tanu witu e nedo wengi. ¹⁵ Ta’an Nisia si limawirla se tou-tou miskin waki kahebatan en suma nea, wo waki lawas ne tou se ente’. ¹⁶ Tuana mouw e wawean arapan kasi se tou rintek, wo eng kawilesan e menet en suma. ¹⁷ Eng kaulitna, ma’aruiyola se tou se tinogor ni Empung; kaa ni’itu te’a mouw koo mesesede’ en didikan Ni Kasakuasa. ¹⁸ Karengan Nisia mouw si minali’la, ta’an kangkasi si simalipupu; Nisia si minewela, ta’an e lawas-Na e lime’osla kangkasi. ¹⁹ Waki enem nga ghio kase’esekan nikoo koo neiy i liseiy-Nala wo witu em pitu nga ghio nikoo koo reiy’ tinena’ eng kacilaka’an. ²⁰ Witu e noras eng kelalenan nikoo koo neiy i waya-Nami waki maut, wo witu e noras em paseke’an waki kuasa en santi. ²¹ Waki sesa’alit lila’ nikoo koo kinaterungan, wo nikoo koo reiy’ perlu meide’, sa eng kapunengan nu meiy. ²² Kapunengan wo eng kelalenan e laa i ke’eke’mula wo se tekapen siru se reiy’ laa i keide’mula. ²³ Karengan e nelet nikoo wo em batu-batu waki padang e laa wawean teta’aran, wo se tekapen siru se laa medamean ampit nikoo. ²⁴ Nikoo koo laa me’anla, kaa en dasingmu e aman wo sakawisa koo kumumisi en tampa paena’annu, nikoo koo reiy’ laa kaliongan sapa-sapa. ²⁵ Nikoo koo laa me’anla, kaa se see’mu se melaker wo kaa se oki’ puyunmu se tanu e rukut witu en tana’. ²⁶ Witu e numur pinakatu’an koo laa tumumpa witu eng gorem eng kubur, tanu eng ke’ekes eng gandum niali ghimorem witu e nedona. ²⁷ Eng kaulitna, em baya nyi’a i ti’i eng kinumisi meiy mola, memang tuana e ni’itu; linganola wo weeanola ghenang e ni’itu!”