¹ Takar sumusuiy mouw si Elifas, tou en Teman: ² “Oki ate ku’are’en nikoo, sa sitou ma’awa’la sumusuiy wia nikoo? Ta’an seiy ku’a re’en si toro menet en sumana? ³ Eng kaulitna, nikoo koo minee mouw teturu’ se laker tou, wo e lawas lewea’ eng kinetermu mola; ⁴ sitou neiy i kawolon si winongke mola e lelila’an-lelila’annu, wo eng kurur le’emes en tine’etepmu mola; ⁵ ta’an en teakan, en toumu en tinoro, wo nikoo koo oki’ ate, toumu en tinena’, wo nikoo koo neiy i kasenge’. ⁶ Reiy’ ku’a re’en e nide’mula si Empung e minamuali patuarimu, wo eng kelale’an em patou-touanu e minamuali arapannu? ⁷ Weeanola ghenang e nyi’i: seiy si mapuneng ampit e reiy’ siselok wo wisa ku’a re’en sitou jujur pinunengla? ⁸ E linoo’ku mola nyi’a mouw kaa sitou si minajeko eng kalewo’an wo minu’uwur eng kasusa’an sia si minupu’ nyi’a kangkasi. ⁹ Nisea se minapuneng kaa nasengan ni Empung, wo minere’i kaa en sengoan en sesepunan-Na. ¹⁰ Si singa ngimuang, si singa mineger – marepu’ mouw em ba’ang ne singa-singa muda. ¹¹ Singa se minapuneng karengan e reiy’ awes se pekekaanen, wo se oki-oki’ ni singa mereiy se minangasesera. ¹² E nesa lelila’an e neiy mouw i pa’ayola wia niaku ampit e memene-menes wo en talingaku en simikop en tena’na, ¹³ nedo en timekur karengan em paghenangan em bengi, katoroan en tekel e re’erep en timeka’la se tou. ¹⁴ Niaku ku neiy i kasenge’ wo mineide’, i ka’ayo e ruiy-ruiyku matenggo’ogho’. ¹⁵ E nesa roh limangkoiyla niaku, tu tumaga’ mouw em berasinku. ¹⁶ Sia si minena’, ta’an eng giona e reiy’ mete’u kinasine’uangku. E nesa kumalenoan em bitu en saruan em berenku, en suara menena-nena’ palingangku: ¹⁷ Wona’ ku’a re’en siesa tou si ulit witu en sinaru ni Empung, wona’ ku’a re’en siesa nga touan si lenas witu en sinaru ni Simiwo nisia? ¹⁸ Eng kaulitna, se hamba-hamba-Na se reiy’ pa’emanen-Na, se malaikat-malaikat-Na tu’u se kina’atoan-Nala neiy i kaseip, ¹⁹ lebe-lebepe’ kasi nisea se maena’ witu e lekouw tana’ pulut, en to’otolanna em bitu riawu, se minate kinapese’an tanu si tanga’. ²⁰ Witu nelet memo’odo wo mawengindo nisea se kinemula, wo e reiy’ pinadung neala e mapuneng i wee eng keure-urena. ²¹ E reiy’ ku’a re’en en dasing nea en sinawut? Nisea se minate e reiy’ ampit eng hikmat.