¹ Nu reiy’ mouw i tu ayub si minuka’ en sumana wo kumutokla e nendo kinatouanna. ² Takar sumusuiy mouw si Ayub: ³ “Ma’anouw i kaliong ma’apu e nendo kinatouangku wo em bengi e limila’la: Siesa oki’ tuama si witu mouw eng gandongan. ⁴ Ma’anouw e nendo i ti’i mamuali kareiydeman, te’a mouw satorona si Empung waki atas si mewewee ghenangla nyi’a, wo te’a mouw en sena’ terang en tumerangla nyi’a. ⁵ Ma’anouw eng kareiydeman wo eng karibe’ebengan eng kume’i e nendo i ti’i, linaak liminaak en timerungla nyi’a, wo eng gerhana ni endo en sumenge’la nyi’a. ⁶ Em bengi i ti’i – ma’anouw sia ri’ikemen ni kareiydeman; te’a mouw sia mepa-pa’ar witu e nendo-nendo witu esa nge te’un; te’a mouw sia i kaghorem patotoran en sumedot-sumedot. ⁷ Yon, ma’anouw witu em bengi i ti’i reiy’la si tumimea’, wo reiy’ kalinga’an en suara mepa’a-pa’ar. ⁸ Ma’anouw sia i tiwa’la em baya ne kumekutok e nendo, nisea nu sigha’ mewewongkela e nupi’ ni Lewiatan. ⁹ Ma’anouw se sumesena’-sumesena’ mawengindo se mareiydem; ma’anouw sia ma’ena’la en terang reiy’ maeiy-eiy, te’a mouw sia lumoo’ eng kerereka’ em beena, ¹⁰ karengan e reiy’ pinenetna em pepalen eng gandongan ni ina’ku, wo e reiy’ neiy i kirongnala eng kasusa’an waki werenku. ¹¹ Ka’a aku reiy’ minate e nedo niaku nu minatou, ka’apa minapuneng e nedo niaku nu rimou’mi waki gandongan? ¹² Ka’a em palar en simungkul niaku; ka’a wawean em bu’ana em be’ewer, i ka’ayo aku toro tumoto’? ¹³ Sa wona’na reiy’, niaku en teakan ku limo’or wo lompon; niaku ku kinatekelan wo minaka’ato paasengan ¹⁴ mewali-wali se raja-raja wo se ngumenge’enge’-ngumenge’enge’ wia em bumi, si rimedeiyla sumeup e riberek i wee en touna, ¹⁵ ka’apa mewali-wali se pemangko’-pemangko’ se makapunya mas, se minutala em balena ampit em perak. ¹⁶ Ka’apa ka’a aku reiy’ tanu sioki rima’aragh si neiy i kirongla, tanu si dade reiy’ limoo’ en terang? ¹⁷ Mana mome sitou fasik minena’ malentutla eng huru-hara, mana mome nisea se kina’apuan eng keter se minaka’ato paasengan. ¹⁸ Wo em baya ne tinaang se mewali-wali minalompon, nisea se reiy’ mouw kasi luminga en suara ne kumekeret. ¹⁹ Maname sitou rintek wo sitou sela se masuat, wo si budak si neiy i kewayami waki si tuangna. ²⁰ Ka’a en terang neiy i weela wia se masusa-susa, wo em patou-touan wia se mange’enget ate; ²¹ se mengena-ngena’la e maut, e reiy’ i ka’ayomi, se mekeki’itla nyi’a lumantouwla waki mekekiar eng harta neiy i kaleweng; ²² se mepa’a-pa’ar wo merio-rio wo se senaang, sa sea matola eng kubur; ²³ wia si tuama e lalanna neiy i kakirong, si linedong ni Empung? ²⁴ Karengan en sawel e rotiku nyi’a mouw e nga’angal penga’angalku, wo e nga’angalku neiy i katoa’ tanu en dano. ²⁵ Karengan neiyku i keide’la, ni’itu mouw en timoro niaku, wo neiyku i kakori’la, ni’itu mouw e mineiy niaku. ²⁶ Niaku ku reiy’ minaka’ato kalomponan wo eng kaleneran; niaku ku reiy’ minaka’ato pinaasengan, ta’an eng kakori’anouw e limentut.”