¹ Witu e nendo mekasa meiy mouw se oki-oki’ ni Empung sumaru si TUHAN wo witu e nelet nea si mineiy kangkasi si Iblis kaa laa mesesaru si TUHAN. ² Takar mueiy mouw si TUHAN wia si Iblis: “Waki wisa o koo meiy?” O laa e wingkot ni Iblis wia si TUHAN: “Waki pakela-kelangan limedonge wo timeroke em bumi.” ³ Nuwu’ ni TUHAN wia si Iblis: “Sapa ku’a re’en koo mineela ghenang si hamba-Ku Ayub? Karengan reiy’la siesa tou tu’u waki bumi si tanu nisia, si tuana eng kelale’ wo jujur, si meide’la si Empung wo mewa’akatla eng kalewo’an. Nisia si minena-ena’ lale’ witu eng kelale’anna, ma’anouw tu’u koo minelurola Niaku sumaru nisia kaa laa mececilakala nisia ampit e reiy’ sitino’otolan.” ⁴ O laa e wingkot ni Iblis wia si TUHAN: “Kuli’ sawelan eng kuli’! Tou si laa meela e reiy’ sa mina’asa eng kapunya’anna sawel e nyawana. ⁵ Ta’an i repamola e lawas-Mu wo ka’apangenouw e ruiy wo e le’ona, sia si tantu mouw laa kumutok Nikoo witu en sinaru-Mu.” ⁶ Takar e nuwu’ ni TUHAN wia si Iblis: “Aah, nisia si witu eng kakuasa’annu; ta’an i koupusela e nyawana.” ⁷ Kamurian si Iblis rumou’mi waki sinaru ni TUHAN, laa o toronna si Ayub ampit em baana wu’ul waki palarna i ka’ayo waki watu eng kokongna. ⁸ O laa si Ayub si minedo esa nga kebi’ kaca pete’ kaa laa i pengo’oko-ngo’okor e nouwakna, kasuatan rimuber witu nuner e riawu. ⁹ Takar lumila’ mouw si ka’awuna wia nisia: “Matenteme’ ku’a re’en nikoo witu eng kelale’annu? I kutokola si Empungmu wo mate mouw!” ¹⁰ Ta’an e wingkot ni Ayub wia nisia: “Nikoo koo masusuiy tanu si wewene sepereng! Sapa ku’a re’en nikita ta pa’ar i te sumungkul e le’os waki si Empung, ta’an so’o sumungkul e wu’ul?” Witu em baya nyi’a i ti’i si Ayub si reiy’ simiwo en dosa ampit en sumpingna. ¹¹ Katoroan se telu kalo ni Ayub nu liminga e nabar tanume e reiy’ sa mina’asa eng kacilaka’an timoro nisia, takar rumou’ momi sea waki tampa nea siesa o siesa, nyi’a i yi’i: si Elifas, tou en Teman, wo si Bildad, tou en Suah, ma’an si Zofar, tou e Naama. Nisea se minaasa’an kaa laa tumotorla esa nga pemesa’anen wia nisia wo mibor nisia. ¹² Katoroan nisea nu lumoo’omi waki wa’akat, nisea se reiy’ mouw simine’u kasi nisia. Laa o mame’ mouw sea ampit en suara menaleinteng. Nisea se kimurensang eng karaiy nea, wo mu’uwurla riawu wia eng kokong witu silangit. ¹³ Laa o sea rumuber mewali-wali nisia witu en tana’ eng keurean pitu nga endo pitu nga wengi. Siesa tou tu’u si reiy’ timotorla esa nga repu’ lelila’an wia nisia, karengan nisea se limoo’, kaa eng kasa wuter em peme’itanna. Nga’angal em penga’angal ni Ayub