¹ Wawean siesa tuama waki tana’ Us mekengaran Ayub; sitou i ti’i si lale’ wo jujur; sia si meide’la si Empung wo mewa’akatla eng kalewo’an. ² Sia si minaka’ato se pitu oki’ tuama wo se telu oki’ wewene. ³ Sia si makapunya se pitu nga riwu nga ipus membe’ domba, se telu nga riwu nga ipus onta, lima nga atus nge paar sapi, lima nga atus keledai mereiy wo se budak-budak se tuana eng ka’asa’an eng kelakerna, i ka’ayo sitou i ti’i nyi’a mouw si kasa kaya waki em baya ne tou waki esa nga weka sendangan. ⁴ Se oki-oki’na tuama se minenaram masiwola em pelesir waki wale nea siesa o siesa i ki’it em pontol wo se telu patuari wewene nea se nieri’ kaa laa kumaan wo kumoo’ mewali-wali nisea. ⁵ Susur e mekasa, sakawisa e nendo-nendo pelesir limangkoiy mola, Ayub si kumeret nisea, wo kumudusla nisea; e nendo kawo’odoanna, memo’odope’, tumo’orouw si Ayub, laa o mapasempela en tetule tinunu, kelaker eng kelakerna em baya nea nu waya, karengan eng genangna: “Wo’o wona’ se oki-oki’ku se simiwo mola en dosa wo kimutokola si Empung witu eng gorem e nate.” Tuana mouw em patuananla ni Ayub e reiy’ siena’na. ⁶ Witu e nendo mekasa meiy mouw se oki-oki’ ni Empung sumaru si TUHAN wo witu e nelet nea si mineiy kangkasi si Iblis. ⁷ Takar mueiy mouw si TUHAN wia si Iblis: “Waki wisa o koo meiy?” O laa e wingkot ni Iblis wia si TUHAN: “Waki pakela-kelangan limedonge wo timeroke em bumi.” ⁸ Laa o mueiy mouw si TUHAN wia si Iblis: “Sapa ku’a re’en nikoo koo mineela ghenang si hambaku Ayub? Karengan e reiy’la siesa tou tu’u waki bumi si tanu nisia, si tuana eng kelale’ wo jujur, si meide’la si Empung wo mewa’akatla eng kalewo’an.” ⁹ O laa e wingkot ni Iblis wia si TUHAN: “Sapa ku’a re’en ampit e reiy’ maka’ato sapa-sapa si Ayub si meide’la si Empung? ¹⁰ Reiy’ ku’a re’en Nikoo si simiwo e rereen esa nga kaledongna wo em balena ma’an e reiy’ sa mina’asa eng kinapunya’annala? Sapa em pina’ayangnala em binerkat-Mu mola wo sapa eng kinapunya’annala eng kasa maawes waki wanua i ti’i. ¹¹ Ta’an i repa mola e lawas-Mu wo ka’apangenouw e reiy’ sa mina’asa eng kinapunya’annala, nisia si tantu mouw laa kumutok Nikoo witu en sinaru-Mu.” ¹² Takar e nuwu’ ni TUHAN wia si Iblis: “Aah, e reiy’ sa mina’asa eng kapunya’anna em bitu eng kakuasa’annu; ta’an i te te’a mouw koo mererepala e lawasmu witu en touna.” Kamurian rumou’ momi si Iblis waki sinaru ni TUHAN. ¹³ Witu e nendo mekasa, katoroan se oki-oki’na tuama wo wewene se mangaa-ngaan wo makoo anggor waki wale ni patuari nea polon, ¹⁴ meiy mouw siesa tou rereoan wia si Ayub wo lumila’: “Kasuatan se lembu sapi nu mapajeko wo se keledai-kledai mereiy mekaan rukut waki esa nga wekana, ¹⁵ meiy mouw se tou-tou en Syeba wo rumego wo kumaat nisea ma’an minewe se tumetayurna ampit em berenna en santi. Niaku mokan nuesa ku neiy i kaliseiy, i ka’ayo ku toro ma’ayola eng kapualitan i ti’i wia si tuang.” ¹⁶ Kasuatan sitou i ti’i nu masususiy, meiy mouw sitou walina wo lumila’: “Napi en simearomi waki langit wo rumengis ma’an kimaan mina’apu se membe’ domba wo se tumetayur-tumetayurna. Niaku mokan nuesa ku neiy i kaliseiy, i ka’ayo ku toro makite’ula eng kapualitan i ti’i wia si tuang.” ¹⁷ Kasuatan sitou i ti’i nu masusuiy, meiy mouw sitou walina wo lumila’: “Tou-tou eng Kasdim se simiwo telu pasukan, laa o rumego se onta-onta wo kumaat nisea ma’an minewe se tumetayurna ampit em berenna en santi. Niaku mokan nuesa ku neiy i kaliseiy, i ka’ayo ku toro makite’ula eng kapualitan i ti’I wia si tuang.” ¹⁸ Kasuatan sitou i ti’i nu masusuiy, meiy mouw sitou walina wo lumila’: “Se oki-oki ni taung se tuama wo se wewene se kasuatan mengaa-ngaan wo makoo e nanggor waki wale ni patuari nea polon, ¹⁹ i kalo’ositi e reghes tumokol en simengomi waki lewet em padang gurun; em bale i ti’i en tinoronami waki epat ruuna wo i karonga’ timoro se taretumou o reraa i ti’i, i kja’ayo sea minate. Niaku mokan nuesa ku neiy i kaliseiy, i ka’ayo ku toro makite’ula eng kapualitan i ti’i wia si tuang.” ²⁰ Takar rumedeiy’ mouw si Ayub, laa o kumurensang eng karaiyna, wo sumukur eng kokongna, kamurian mongkotouw sia wo masempe, ²¹ pokeiyna: “Ampit em poteiy niaku ku rimou’mi waki gandongan ni ina’ku, ampit em poteiy kangkasi ku laa mareng witu eng goremna. TUHAN si minee, TUHAN si minedo, lino’orouw e ngaran ni TUHAN!” ²² Witu em baya nyi’a i ti’i si Ayub si reiy’ simiwo en dosa wo reiy’ mature si Empung simiwo e reiy’ waar.