¹ “Niaku ku masenso’ mouw matou-tou, niaku ku laa meteturusla e nga’angalku, niaku ku laa sumusuiy witu eng kape’itan ni imukurku. ² Niaku ku laa lumila’ wia si Empung: Te’a manginselokela niaku; i pakite’u mola niaku, ka’a Koo maperkara ampit niaku. ³ Sapa ku’a re’en e nuntungna i wee-Nikoo simiwola em palotoiyan, tumea’ e wua’na rawoiy em bedu e lawas-Mu, kasuatan Nikoo koo madukung en tetiro’an ne tou fasik? ⁴ Sapa ku’a re’en Nikoo koo makapunya em beren e nouwak? Masuat ku’a re’en em peloo’an-Nu ampit em peloo’an ni tou? ⁵ Sapa ku’a re’en e nendo-nendo-Mu en tanu e nendo-nendo ni tou, en te’un-te’un-Nu en tanu e nendo-nendo nitou tuama, ⁶ i ka’ayo Koo menero-nero eng kaselokangku, wo make’i en dosaku, ⁷ e nulitna Nikoo koo mete’u, kaa niaku ku reiy’ makaselok, wo kaa e reiy’la siesa tou tu’u si toro mee eng kewaya’ani waki lawas-Mu? ⁸ Lawas-Mu mouw e minentuk wo simiwo niaku, ta’an eng kamurian Koo lumenge wo laa mepepunengla niaku? ⁹ Ghenangenouw, kaa Nikoo si simiwomi niaku waki tana’ pulut, ta’an Nikoo koo laa mesesiwola niaku mariawu sumeup? ¹⁰ Reiy’ ku’a re’en Nikoo si timoa’la niaku tanu e ranona en susu, wo kimetela niaku tanu eng keju? ¹¹ Nikoo koo minakela eng kuli’ wo e le’ona wia niaku, wo limuwir niaku ampit e ruiy wo e noat. ¹² Matou-tou wo nupus o lale’ neiy i karunia-Mula wia niaku, wo pemiara’an-Nu en timayur e nyawaku. ¹³ Ta’an nyi’i mouw e neiy i kirong-Mula witu eng gorem e nate-Mu; kete’uangku, kaa nyi’i mouw e maksut-Mu: ¹⁴ sa aku sumiwo en dosa, takar Nikoo koo laa tumegha’la niaku, wo Nikoo koo reiy’ laa mayami niaku waki kaselokangku. ¹⁵ Sa aku makaselok, cilaka mouw aku! Wo sa aku ulit, niaku ku reiy’ laa berani kuma’ati eng kokongku, karengan ku wesu ampit en sesero’an, wo karengan limoo’ em peme’itangku. ¹⁶ Sa aku kuma’ati eng kokongku, takar tanu si singa Koo laa mengasu niaku, wo mapa’atola sumeup eng kuasa-Mu maka’erangen wia niaku. ¹⁷ Nikoo koo laa mapa’ayola se sairi-sairi weru witu niaku, – Nikoo koo minapasela eng keupi’an-Nu witu niaku – wo se pasukan-pasukan weru, awes tare se pasukan perajurit ne suraro se mesaru niaku. ¹⁸ Ka’a Koo kimarenganla niaku rimou’mi waki gandongan? Lebe le’os aku minapuneng, nu reiy’pe’ se tou nu limoo’ niaku! ¹⁹ Takar niaku ku tanu mokan e reiy’ ma’an mekasa wia; waki gandongan ni ina’ niaku ku neiy i papawee-wee niali mea waki kubur. ²⁰ Reiy’ ku’a re’en e nendo-nendo e numurku en toyo’ i te? I waya mola aku, rio aku toro melaya-laya’ reiy’ ure, ²¹ nu reiy’pe niaku nu mea, wo reiy’ mouw marengi kasi, mea waki wanua reiydem wo eng kasa ribe’ebeng, ²² mea waki wanua kasa reiydem, en tampa kasa ribe’ebeng wo e minesesuke’ekalan, witu e wisa en sena’na en terang mange’an ampit eng kareiydeman.”