¹ Takar sumusuiy mouw si Zofar, tou e Naama: ² “Sapa ku’a re’en sitou si laker susuiy si reiy’ o lewo’ sa reiy’ wingkoten? Sapa ku’a re’en sitou si laker suma si lewo’ sa reiy’ i ulitla? ³ Sapa ku’a re’en sitou si lewo’ sa reiy’ makapenes witu e lo’odeghmu? Wo sa koo memanti-manti, sapa ku’a re’en e reiy’la si mepeira-irangla nikoo? ⁴ Pokeiymu: Paajarangku e lenas, wo niaku ku weresi witu em beren-Nu. ⁵ Ta’an, pa’edonouw si Empung nuesa si mee nuwu’, wo muka’ en suma-Na witu nikoo, ⁶ wo mabarla wia nikoo em pengiro-ngirong eng hikmat, kaa ni’itu e maka’erangen i wee em pangartian. Takar nikoo koo laa mamete’ula, kaa si Empung si reiy’ minaparekenla i wee nikoo esa nga weteng waki kaselokannu. ⁷ Toro ku’a re’en nikoo mamete’ula eng keulitan ni Empung, muntepe em paakaran-paakaran eng kakuasa’an Ni Kasakuasa? ⁸ Kerakekna tanu e langit – sapa en toro tuanangkula? Keraremna limantouwla eng kaoatan ne tou minate – sapa en toro kakete’uannula? ⁹ Lebe labot ta’an em bumi e nukuranna, wo e lebe pelas ta’an e lawanan. ¹⁰ Sakawisa Sia lumangkoiy, tumuanala em pasikopan, wo sumiwola em paadilan, seiy si toro mape’la-Nisia? ¹¹ Karengan Nisia si sumine’u si lumele’ekok wo lumoo’ eng kalewo’an reiy’ ampit minenegha-negha’la nyi’a. ¹² Sa wona’na sitou we’engel si toro mangarti, takar sioki’ ni keledai siru tu’u si toro i patou tanume sitou. ¹³ Sa wona’na nikoo i yi’i koo sumadiala e natemu, wo malungla e lawasmu wia-Nisia; ¹⁴ sa wona’na koo ma’akatla eng kalewo’an witu e lawasmu, wo reiy’ mayala eng kawilesan mena’ witu eng gorem en dasingmu, ¹⁵ takar eng kaulitna, nikoo koo toro kuma’ati eng giomu reiy’ ampit en sering, wo nikoo koo laa rumedeiy te’etep wo reiy’ laa meide’, ¹⁶ awes tare nikoo koo laa lumiurla eng kasusa’annu, neiy i te i kaghenang wia nisia tanu e rano simo’oso’ mola limangkoiy. ¹⁷ Em patou-touannu e laa mamuali lebe maserengat ta’an e nendo oat, kareiydeman e laa mamuali terang tanu e nendo memo’odo. ¹⁸ Nikoo koo laa medam aman, karengan wawean arapan, wo nu simoisapola kawii lele’os, nikoo koo laa mea tumekel ampit e lompon; ¹⁹ nikoo koo laa ghumoleiy tumekel ampit e reiy’ reungen, wo laker tou se laa ma’edo eng gio wia nikoo. ²⁰ Ta’an em beren ne tou fasik e laa merapa, nisea se reiy’ mouw mete’u tumingkasla en tou kasi; em paarapen neape’la en sumengo i te’la nasengan.”