¹ Ta’an si Ayub si miningkot: ² “Memang, nikouw mouw se tou-tou i ti’i, wo mewali-wali nikouw eng hikmat e laa mate. ³ Niaku tu’u ku makapunya pangartian, masuat tanu nikouw, niaku ku reiy’ kala ampit nikouw; seiy si reiy’ mete’u eng kapualitan-kapualitan mange’an e ni’itu? ⁴ Niaku ku minamuali keke’eke’en ne kasuateku, niaku, si minaka’atomi wewingkot waki si Empung, sa aku maleiy wia-Nisia; tou si ulit wo lale’ minamuali keke’eke’en. ⁵ Pasero’an i wee se tou minacilaka, – tuana mouw em pendapat ne tou se matou-tou aman – e nesa wewewe i wee se tou neiy i kare’esok e ne’ana. ⁶ Ta’an amanouw en dasing em baya ne tumeteri, wo lenerouw nisea se mato’orla e nupi’ ni Empung, nisea se laa ma’ali si Empung witu e lawasna. ⁷ Ta’an mueiy mouw wia si tekapen, takar nikoo koo laa weeanna pangajaran, wia si burung waki reghe-reghesan, takar nikoo koo laa weeanna katerangan. ⁸ Ka’apa tumotorouw wia si bumi, takar nikoo koo laa weeanna pangajaran, awes tare se sera’ waki tasik se laa sumusuiy wia nikoo. ⁹ Seiy si witu e nelet em baya nyi’a i ti’i si reiy’ mete’u, kaa e lawas ni Empung en timuanala ni’itu; ¹⁰ kaa witu e lawas-Na rimeta’ e nyawa ne reiy’ sa mina’asa se matou-tou wo e nasengan susur ne tou? ¹¹ Reiy’ ku’a re’en en talinga e meuji e lelila’an-lelila’an, tanu e langit-langit menga’anga’ eng kekaanen? ¹² Pokeiy nea eng hikmat em bia se tou tu’a, wo em pangartian e witu se tou pinakatu’an e numurna. ¹³ Ta’an em bia si Empungouw eng hikmat wo eng kaente’an, Nisia mouw si makapunya en tetimbangan wo em pangartian. ¹⁴ Sa Sia ghumoghar, e reiy’la si toro mangun sumeup; sa Sia sumikop siesa nga touan, e reiy’la si toro mayala nisia. ¹⁵ Sa Sia sumeper en dano, mapera mouw em baya nyi’a; sa Sia mayala nyi’a sumo’oso’, takar en tana’ en toronnala. ¹⁶ Wia Nisia mouw eng kuasa wo eng kamenangan, Nisia mouw si kimuasala le’os se tou neiy i kaseip ma’anouw tu’u se tou maseipla. ¹⁷ Sia si rimawir si mentri ampit em poteiy, wo em baya ne akim se wine’engel-Nala. ¹⁸ Nisia si minuka’ en torongku neiy i pakela ne raja-raja wo mina’akes e rereenan nea ampit en tali wewa’akes. ¹⁹ Nisia si rimawir wo simoisap em baya ne imam, wo minolonla se te’etep. ²⁰ Nisia si minu’ukulela se tou-tou pa’emanen, simiwola em baya ne tu’a-tu’a kinaliongan akal. ²¹ Nisia si minapa eiymi em sesero’an wia em baya ne pamuka-muka, wo minayami e ne’ereten ne tou ente’. ²² Nisia si minongka’la em pengiro-ngirong eng kareiydeman, wo minapa eiyla eng kasa karibe’ebengan witu en terang. ²³ Nisia si simiwo se bangsa-bangsa timou, laa o munengla nisea, wo mepelaker se bangsa-bangsa, laa o sumere’ nisea. ²⁴ Nisia si minakarenganla em baya ne ma’aka-aka eng kaoatan kinaliongan akal, wo simiwo nisea neiy i kaseip waki padang pelas e reiy’la lalanna. ²⁵ Nisea se meringka-ringkap witu eng kareiydeman e reiy’la terangna; wo Nisia si simiwo nisea kimelang matuyu-tuyu tanu se tou tineleuw.”