¹ “Ka’a Si Kasakuasa si reiy’ kimesanla e masa peukuman wo nisea se sumine’u Nisia se reiy’ lumoo’ e nendo paadilan-Na? ² Wawean tou si sime’ese’ em paakaran en tana’, si kimaat se kawang ne ternak, laa o rumawirla nisea. ³ Keledai kapunya’an ne ula se neiy i patounala, wo si sapi mereiy kapunya’an niesa balu si sinungkulna tanume e neram, ⁴ tou miskin se neiy i todonami waki lalan, tou peme’itan witu eng gorem em banua se neiy i kapupus kumirong em baya nea. ⁵ Eng kaulitna, tanu si keledai siru waki padang gurun nisea se rimou’mi kaa laa ma’ayang sumero sapa-sapa waki padang kapelas tanume eng kekaanen i wee se oki-oki’ nea. ⁶ Waki penguma’an sea maedo kekaanen ne tekapen, wo e numa anggor, punya ne tou fasik, en tinipu’la em bu’ana neiy i katele’u. ⁷ Ampit em poteiy nisea se timekel, karengan se reiy’la silabung, wo nisea se reiy’ makapunyala ne’ules witu e nedo ghe’egher; ⁸ kaa e naro repet waki kakuntungan nisea se minakekos ru’unut, wo karengan e reiy’la tampa paterungan, nisea se kimipitla e nouwakna witu eng kuntung watu. ⁹ Wawean si rimo’obiti sioki’ ula waki susu ni ina’na wo simungkul si dade ni tou miskin tanume si eram. ¹⁰ Ampit em poteiy nisea se matio-tiouw, karengan e reiy’la silabung, wo ampit eng kelalenan nisea se minesa’an eng ke’ekes-ke’ekes eng gandum; ¹¹ witu nelet e rua nga werot uma nisea se masiwo lana, nisea se mele’e-le’ek en tampa pakusuan kasuatan minare’o. ¹² Waki ghorem eng kota eng kinalinga’an e nengisan ne tou-tou se tawi mouw mate wo e rekeiyan ne tou-tou se peme’itan em pali’, ta’an si empung si reiy’ minadungla en sombayang nea. ¹³ Waweane’ kasi se weteng ne masu’usukla en terang, si reiy’ makasine’u e lalan nea wo se reiy’ minena-ena’ minena’ witu en tetoroanna. ¹⁴ Witu en tawi moat tumiro’ mouw si mememunu’, tou peme’itan wo miskin se winunu’na, wo e nedo wengi sia si mawinta’ tanu si rongkit. ¹⁵ Tou si masiwo en zinah si ma’ena’ e mawengindo, eng genangna: Te’a siesa tou tu’u si lumoo’ niaku; laa o pakennala em peporong eng gio. ¹⁶ Witu e reiydem nisea se maghoghar em bale, witu e nendo oat nisea se kumirong; nisea se sumine’u en terang, ¹⁷ karengan eng kareiydeman nyi’a mouw e nendo memo’odo i wee nisea nu waya, wo nisea se minenaramouw ampit eng kahebatan eng kareiydeman. ¹⁸ Nisea se minayur witu en saruanna en dano, e weteng nea neiy i kakutok wia em bumi; nisea se reiy’ mouw kasi minea waki uma anggor nea. ¹⁹ Rano en salju eng kina’apula e noras ra’ar wo em pasu’, tuanakan kangkasi en tinuanala eng kaoatan ne tou minate witu nisea se simiwo en dosa. ²⁰ Eng gandongan ni ina’ e limiurla nisia, witek se minuyutla nisia, sia si reiy’ mouw paghenangen kasi: kawilesan e rinepu’la tanu nakana eng kayu. ²¹ Sia si maremu’la se wewene pesel, se reiy’ mineurang, wo reiy’ masiwo le’os witu siesa balu, ²² awes tare se kimeong se tou-tou waraneiy ampit eng kaente’anna; sia si timo’or sumeup, ta’an em patou-touanna e reiy’ nieram. ²³ Empung si minee nisia ka’amanan e minamuali sesaderanna, wo mategha’la e lalan-lalanna. ²⁴ E reiy’ i te ure sea rimakekla en tou, laa o reiy’ mouw wia kasi; nisea se rima’aragh, laa o kumesut tanu e reiy’ sa mina’asa wo’o sapa, nisea se kina’aret tanu e naka en tangkupna eng gandum. ²⁵ Sa wona’na e reiy’ tuana eng kapualitanna, seiy si berani mero niaku wo rume’ila e lelila’angku?”