¹ Ta’an si Ayub si minignkot: ² “En teakan i yi’i e ngenga’angal i penga’angalku e minamuali peranguala, lawas-Na e meubel niaku, i ka’ayo aku rimapot. ³ Oh, satorona niaku ku mete’u ma’atola Nisia, wo toro meiy waki tampa paena’an-Na. ⁴ Takar e laa i welarkula em perkaraku witu en sinaru-Na, wo wutangkula en sumaku ampit en tetororen-tetotoren rerapitan. ⁵ Takar niaku ku laa mamete’ula e wewingkot-wewingkot ni’i wee-Nala wia niaku wo niaku ku laa makasiligh, sapa neiy i nuwu’-Nala wia niaku. ⁶ Pa’ar ku’a re’en Sia sumiwola perkara ampit niaku witu eng kekasakuasa’an-Na? Reiy’, Nisia si laa meela ghenang wia niaku. ⁷ Sitou jujurouw si laa rumapit en tou witu en sinaru-Na, wo niaku ku laa i kewayami waki si Akimku i wee eng keure-urena. ⁸ Eng kaulitna, sa aku kumelang mea waki sendangan, Sia si reiy’ maname; ka’apa mea waki talikuran, reiy’ atongkula Sia; ⁹ waki amian ku menero Nisia, Sia si reiy’ mapa’ato, niaku nu lumengeme waki timu, niaku ku reiy’ limoo’ Nisia. ¹⁰ Karengan Nisia si mete’u e lalan em patou-touangku; sa andeiyna Sia meuji niaku, niaku ku laa lumentut tanu e mas. ¹¹ Ne’aku e minena-ena’ maki’itla e nenus-Na, niaku ku matorola e lalan-Na wo e reiy’ mase’epang. ¹² Perenta waki sumping-Na e reiy’ linangkoiyku, witu em pusu’ nateku neiy i kirongku en totor en suma-Na. ¹³ Ta’an Nisia si reiy’ ma’an mekasa maroba – seiy si toro mape’la Nisia? Sapa neiy i kepa’ar-Nala, en tuanan-Nala kangkasi. ¹⁴ Karengan Nisia si laa sumampetla sapa neiy i tataap-Nala witu niaku, wo lakere’ kasi eng kapualitan mange’an e ni’itu ni’i maksut-Nala. ¹⁵ Ni’itu mouw eng karenganna e nateku matenggo’ogho’ mesarula Nisia, sa em baya nyi’a i ti’i eng ghenangengkula, takar niaku ku kineide’an witu Nisia. ¹⁶ Empung si simiwo mouw niaku e reiy’ siarapan, Si Kasakuasa si simiwo mola e nateku matenggo’ogho’; ¹⁷ kaa e reiy’ karengan eng kareiydeman niaku mapuneng, wo e reiy’ kangkasi karengan eng gioku em pinenetla e reiydem me’ulit.”