¹ Takar si Elifas, tou en Teman, si miningkot: ² “Sapa ku’a re’en sitou si maka ka’ara’an i wee si Empung? Reiy’, sitou maka akal budi si maka ka’ara’an i te i wee en touna nuesa. ³ Sapa ku’a re’en wawean eng ka’ara’anna i wee Si Kasakuasa, sa koo ulit, ka’apa eng kamangna, sa koo matou-tou lale’? ⁴ Sapa ku’a re’en karengan e nide’mula si Empung, takar koo niukum-Na, wo alin-Na waki paadilan? ⁵ Reiy’ ku’a re’en eng kalewo’annu en sela wo eng kaselokannu e reiy’ si kinesampetan? ⁶ Karengan ampit e waya’an i te koo simungkul e neram waki se patuari-patuarimu, wo kimaat e labung ne tou-tou miskin; ⁷ tou si mare’o mouw si reiy’ wineeannu kumoo rano, wo sitou kinelalenan si reiy’ wineeannu kumaan, ⁸ ta’an sitou ente’, nisia mouw si makapunyala en tana’, wo sitou pa’ormaten nisia mouw si rimuberla nyi’a. ⁹ Balu-balu se neiy i reomu mea ampit e lawas memayos, wo e lalupa ne ula e rinimu’umukmula. ¹⁰ Ni’itu mouw eng karenganna nikoo koo linedongla em perangkap, wo sinenge’la eng kahebatan ampit e limo’osit i tela. ¹¹ Terangmu e minareiydem, i ka’ayo koo reiy’ mete’u lumoo’ wo en songker e limi’ikerla nikoo. ¹² Reiy’ ku’a re’en si Empung si rimuber waki langit kerakek? Loo’onouw se sumesena’-sumesena’ se kasa rakek, kumura eng kerakekna! ¹³ Ta’an eng genangmu: Mete’u en sapa si Empung? Toro ku’a re’en sia maadili waki purikitna e linaak-linaak reiydem? ¹⁴ Linaak e limi’ikerla Nisia, i ka’ayo Sia reiy’ mete’u lumoo’; Nisia si mengela-ngelang kelabotan e rerikeran e langit! ¹⁵ Sapa ku’a re’en nikoo koo pa’ar minena-ena’ maki’itla e lalan ure, en tinoroala ne tou-tou lewo’, ¹⁶ nisea se rina’abusome nu reiy’pe’ e nedona, en teto’otolanna neiy i ayurla en so’oso’an; ¹⁷ nisea se limila’la wia si Empung: Rumou’ mome wia nikeiy! wo: Si Kasakuasa si toro sumiwo sapa witu nikeiy? ¹⁸ Ta’anouw Nisia mouw kangkasi si minutala em bale nea ampit e reiy’ sa mina’asa e le’os – ta’an en tetiro’an ne tou fasik nyi’a mouw e wa’akat wia niaku. ¹⁹ Kapualitan i ti’i e linoo’ ne tou ulit wo nisea se mepa’a-pa’ar; se tou reiy’ siselok se menero-nero’ nisea: ²⁰ Uli-ulit, se kesaru meiy se rine’i mola, wo neiy i tele’u nea e mina’apu mouw kinaan e napi. ²¹ Minta’ mouw e rinda witu Nisia, rio koo lompon; ampit en tuana koo maka’ato eng kamang. ²² Sungkulenouw sapa neiy i ajarla en suma-Na, wo i weela e nuwu’-Na witu e natemu. ²³ Sakawisa koo makedo’ wia Si Kasakuasa, wo kumumengla en tou; sakawisa koo ma’akati eng kawilesan waki ghorem en dasingmu, ²⁴ tumerek e watuna e mas witu eng gorem e riawu, e mas Ofir mea witu nuner em batu-batu en teberan, ²⁵ wo sakawisa Si Kasakuasa si minamuali tinawunan e masmu, wo eng kakaya’an em perakmu, ²⁶ takar eng kasa uli-ulit nikoo koo laa masena-senaang karengan Si Kasakuasa, wo laa kuma’at wia si Empung. ²⁷ Sa wona’na koo sumombayang wia-Nisia, Sia si laa lume’ele’la en sombayangmu,wo nikoo koo laa mear e nazarmu. ²⁸ Sakawisa koo tumenggolela sumiwo wo’o sapa, takar e laa ka’ayoan e maksutmu, wo en sena’ terang en sumena’la e lalan-lalannu. ²⁹ Karengan si Empung si kumumengla sitou tingkeiy ta’an si lumawirla sitou si timu’utukla eng kokong! ³⁰ Tou si reiy’ siselok si’i liseiy-Nala: nikoo koo neiy i kaliseiy karengan eng kaweresian e lawasmu.”