¹ Ta’an si Ayub si miningkot: ² “Linganola makale’o-le’os e lelila’angku wo ma’anouw i tu mamuali pangiborannu, ³ Sumabaarouw ampit niaku, niaku ku laa sumusuiy; nu simampetola en sesusuiyengku toro mouw kouw sumero’. ⁴ Wia sitou ku’a re’en e ngenga’angalku neiy i katuyu? Ka’a aku reiy’ toro meupi’ e nate? ⁵ Lumenge mouw wia niaku, takar kouw laa i kenganga, wo menet en sumamu ampit e lawas! ⁶ Sa aku ghumenangla nyi’a, ku mineide’, wo tumenggo’ogho’ mouw e nouwakeku. ⁷ Ka’a se tou fasik se minena-ena’ matou-tou, matu’a, awes tare maawes-maawes eng kaente’? ⁸ See’ nea se minena-ena’ mewali nisea, wo se oki’ o puyun se paweean neala ghenang. ⁹ Em bale-wale nea e aman, e reiy’la kineide’an, wewewe ni Empung e reiy’ tumoro nisea. ¹⁰ Sapi raghar nea se mabibit ta’an se reiy’ pino’opol, sapi mereiy nea se minaanak wo reiy’ kinawu’uwusan. ¹¹ Se koki’-koki’ nea se i pewayala kumaluar tanu se membe’ domba, se oki-oki’ nea se mengompo-ngompo’. ¹² Nisea se menganta-ngantar ampit pateperela e rebana wo eng kecapi, wo mepa’a-pa’ar i ki’it eng kekantaren sesulingen. ¹³ Nisea se ma’apula e nendo-nendo nea witu eng kamang, wo ampit e lompon sea tumumpa witu eng gorem eng kaoatan ne tou minate. ¹⁴ Ta’an em pokeiy nea wia si Empung: Rumou’me wia nikeiy! Nikeiy keiy so’o mamete’ula e lalan-lalan-Nu. ¹⁵ Si Kasakuasa i ti’i sapa, i ka’ayo keiy lewo’ sa reiy’ rumaghes wia-Nisia, wo sapa eng ka’ara’anna i wee nikeiy, sa keiy maleiy wia-Nisia? ¹⁶ Memang, eng kamang nea e reiy’ neiy i kareta’ witu eng kuasa nea nuesa! Tetiro’an ne tou fasik nyi’a mouw e wa’akati waki niaku. ¹⁷ Kumura eng kare’ereghna em barung ne tou fasik pinatela, kapunengan en timoro nisea wo eng kinerara’an neiy i wetengla ni Empung wia nisea witu e nupi’-Na! ¹⁸ Nisea se minamuali tanu en daami witu en saruan e reghes, tanu e neta neiy i telewla e reghes tumokol. ¹⁹ Em bencana i wee nisia neiy i kirongla ni Empung i wee se oki-oki’na. Eng kale’osna sitou i ti’i nuesa si su’in ni Empung, rio mawena’as; ²⁰ eng kale’osna em berenna nuesa e lumoo’ eng kapunenganna, wo nisia nuesa si kumoo’omi waki upi’ Ni Kasakuasa! ²¹ Karengan mepadungla sapa sia wia se me’urangna nu reiy’ mouw sia nu minate, sa tu mina’apu mola eng kelakerna en sumedotna? ²² Ma’anouw tu’u wia si Empung e neiy i ajarla ni tou en tine’u, wia Nisia si minadilela nisea se waki tampa rakek? ²³ Siesa tou si minate ampit e wutape’ eng keter, ampit eng kasa lompon wo kasa senaang; ²⁴ rereenanna e rebur kaa em barewes, wo e we’enek e ruiy-ruiyna en segaya’pe’. ²⁵ Se walina se minate ampit e rara ate, ampit e reiy’ ma’an mekasa mine’anla eng kasenaangan e nate. ²⁶ Ta’an mewali-wali nisea sea neiy i kagholeiy witu eng gorem e riawu, wo se witek-witek se maroiy-roiyna’ witu natas nea. ²⁷ Eng kaulitna, niaku ku mete’ula eng genangmu, wo e le’ekok tiniro’ miouwla witu niaku. ²⁸ Pokeiymu: Wisa em bale ni makua-kuasa? Wisa en dasing tampa paena’an ne tou-tou fasik? ²⁹ E reiy’pe’ ma’an mekasa ku’a re’en kouw memue-mueiy wia se tou-tou melangkoiy witu lalan? Toro ku’a re’en kouw sumangkal en teturu’-teturu’ nea, ³⁰ ka se tou lewo’ se kinaterungan witu e nendo kapunengan, wo se linawirla witu e nendo nupi’ ni Empung? ³¹ Seiy si laa makarengan kume’i eng kalakuanna, wo sumu’i em pasiwo-siwonna? ³² Sia mouw si niali waki pakuburan, wo e warugana em peurusen ne tou. ³³ Ampit eng kasenaang nisia si pinenetla e me’eme’-me’eme’ en tana’ waki kewong; susur tou se maki’itla nisia, wo se rimeriorla nisia se reiy’ i katotor eng kelakerna. ³⁴ Kumura e reiy’la sisapana em pangiborannu i wee niaku! Em baya em bewingkotmu e le’ekok wiles i te waya!”