¹ Takar si Zofar, tou e Naama, si miningkot: ² “Eng karengan e ni’itu mouw eng genang-genangku en timodo niaku mingkot, karengan e nateku e reiy’mouw sabaar kasi. ³ Ku liminga en togoran e masero’ niaku, ta’an e miningkot niaku nyi’a mouw e akal budi e reiy’ makapangartian. ⁴ E reiy’pe’ ku’a re’en koo minete’ula em baya nyi’a i ti’i rengane’ eng kasa ketareanna, rengan se tou neiy i tampala wia em bumi, ⁵ kaa e merio-rio ne tou fasik e reiy’ ure i te, wo e mepa’a-pa’ar ne tou durhaka e reiy’ pni’ipitan weren? ⁶ Ma’anouw tu’u eng katingkeiyanna e mina’ayo waki langit wo eng kokongna en timobokla e linaak, ⁷ ta’anouw si tanu en te’ina sia laa mapuneng i wee eng keure-urena; seiy si mekasa mouw limoo’ nisia, si minueiy: Wisa sia? ⁸ E nasar ni’ipi sia si minerar limiong, reiy’ minalulang, minere’i nasarla en tu’usan e nedo wengi. ⁹ Sia si reiy’ mouw kasi paaton witu em beren ne meleloo’ nisia, wo en tampa paena’anna e reiy’ mouw maloo’ nisia kasi. ¹⁰ Se oki-oki’na se lewo’ sa reiy’ sumero en tongkoupusen ne tou miskin, wo e lawasna nuesa e lewo’ sa reiy’ marengla eng kakaya’anna. ¹¹ E ruiy-ruiyna en toro mawuta eng kaketeran ne tou muda, ta’an eng kaketeran i ti’i tu’u e laa ghumoleiyla en tou mewali nisia witu riawu. ¹² Ma’anouw tu’u eng kalewo’an e nemis pape’anen witu eng gorem en sumana, ma’anouw tu’u sia kimirongla nyi’a witu e wawa’ e lila’na, ¹³ kumeipila nyi’a ma’an e reiy’ rumeta’la nyi’a, wo tumaang e nyi’a witu e langit-langitna, ¹⁴ ta’anouw e minarobakan kangkasi eng kekaanenna witu eng gorem en tianna, e minamuali we’i ni leloiy item witu eng goremna. ¹⁵ Harta benda e nine’enepna, ta’an neiy i kero’nala kasi, Empung si rimou’mi nyi’a waki ghorem en tianna. ¹⁶ We’i ni leloiy’ item e laa se’esepenna, sia si laa wunu’un e lila’ ni leloiy’. ¹⁷ Sia si reiy’ toro lumoo’ e wa’atang-wa’atang en dano wo en teberan-teberan maso’oso’la e madu wo en dadih. ¹⁸ Sia si lewo’ sa reiy’ marengla sapa eng kina’atoanna wo reiy’ me’anla nyi’a; sia si reiy’ kimeipila eng kakaya’an wua’na em belante’na. ¹⁹ Karengan nisia si kimemu mola sitou miskin, wo timele’ula nisea neiy i kewaya; sia si kimaat em bale e reiy’ binangunna. ²⁰ Eng kaulitna, sia si reiy’ sumine’u eng kalomponan witu eng gorem e natena, wo nisia si reiy’ laa i kaliseiy ampit e maali eng harta bendana. ²¹ E nesa tu’u e reiy’ limiseiyi waki karoko’na, ni’itu mouw eng karenganna eng kamangna e reiy’ ke’ekel. ²² Witu eng kamewa’anna masewe-sewel nisia si wuta e nide’, nisia si tinoro eng kasusa’an ampit eng kasa hebatna. ²³ Kaa laa mepepumpunla em po’otna, Empung si rimeta’la witu natasna e nupi-Na melaya-layas, wo minale’ewekla ni’itu wia nisia tanume eng kekaanenna. ²⁴ Sia si toro lumiseiyla en tou witu en salanti wesi, ta’anouw em pana tambaga e limampat nisia. ²⁵ Noki’na em pana i ti’i e minesawut wo rumou’mi waki ru’urna, berenna em pana e makerap i ti’i e rimou’mi waki peruna: nisia si minalieiy. ²⁶ Kareiydeman tanu mokan neiy i kesadia i wee nisia, e napi reiy’ sinengo eng kimaan nisia wo mina’apula sapa neiy i katele’u witu en dasingna. ²⁷ Langit e minongka’la eng kaselokanna, wo em bumi en timo’or mesaru nisia. ²⁸ Wua’na em pine’inakutenna em bitu em balena e neiy i ater, em baya nyi’a e mina’apu witu nendo e nupi’-Na. ²⁹ Ni’itu mouw en sesu’i ni Empung i wee sitou fasik, kapunya’an pusaka e neiy i ta’arla ni Empung wia nisia.”