¹ Ta’an si Ayub si miningkot: ² “Pirape’ eng keure kasi kouw merarala nateku, wo rumimu’umukla niaku ampit e lelila’an? ³ Teakan e minakapulu’ mola kouw masero’ niaku, Nikouw kouw reiy’ meirang masiksa niaku. ⁴ Sa aku uli-ulit neiy i kaseip, takar niaku nuesa si mesa’an eng kaseipangku i ti’i. ⁵ Sa kouw uli-ulit laa meseselala en tou witu niaku, wo sumiwo en seringku tanume em bukti witu en touku, ⁶ wena’asenola, kaa si Empung si timuana mola e reiy’ adil witu niaku, wo minitarla e lelobo’-Na witu niaku. ⁷ Eng kaulitna, ku rimekeiy: Kawengi’isan!, ta’an e reiy’la si miningkot. Niaku ku minaleiy makitulung, ta’an e reiy’la ka’adilan. ⁸ Lalanku em pinenet-Na ampit em beton, i ka’ayo aku reiy’ mete’u lumangkoiyla nyi’a, wo e lalan-lalanku i ti’i en siniwo-Na reiydem. ⁹ Sia si minangkulola eng kamulia’angku wo kimaat e mahkota witu eng kokongku. ¹⁰ Sia si maghoghar niaku waki em baya en tampa, i ka’ayo aku minere’i, wo tanu nakana e narapangku sinawut-Na. ¹¹ Nupi’-Na e melayas witu niaku, wo mapokeiyla niaku kesaru-Na. ¹² Pasukan-Na se minaju minakarengan, nisea se minape’la e lalan mesaru niaku, laa o kumepung en dasingku. ¹³ Se patuari-patuariku se neiy i wa’akat-Nami waki niaku, wo se makasine’u-makasine’u niaku se reiy’ mouw kasi sumine’u niaku. ¹⁴ Se kawanua patuariku se sime’epang, wo se ka’ampit-ka’ampitku se limiurla niaku. ¹⁵ Se oki’ mepa’ayang wia niaku wo se budak weweneku se mapokeiyla niaku tou reiy’ kasine’uan, niaku ku paloo’on neala tou wo’oseiy. ¹⁶ Sa aku kumeret se budakku, nisea se reiy’ masingkom; niaku ku lewo’ sa reiy’ melur nisea ampit e lelila’an-lelila’an emis. ¹⁷ Nasengangku malentutla em pedaman mari’iris wia si ka’awuku, wo em bouku e makakero’on se patuari-patuari esa nga gandongku. ¹⁸ awes tare se koki’-koki’ tu’u se masero’ niaku, sa aku mereredeiy nisea se masero’ niaku. ¹⁹ Em baya se ka’ampit karetukeku se mapedam mekekero’ witu niaku; wo nisea se neiy i koupuskula, se minurikit mesaru niaku. ²⁰ Ruiyku eng kimerut witu eng kuli’ wo e le’onaku, wo en dengitku mokan en timele’u wia niaku. ²¹ I keupusola aku, i keupusola aku, heiy kalo-kaloku, karengan e lawas ni Empung en timoro mola niaku. ²² Ka’a kouw mekeki’it niaku, tanu mokan si Empung, wo e reiy’ minawesu kimaan e le’onaku? ²³ Oh, satorona e lelila’angku ni’i patik, ni’i catat witu eng kaol, ²⁴ neiy i kepa’at ampit em besi lelumi wo en tima witu eng kuntung watu i wee eng keure-urena! ²⁵ Ta’an niaku ku mete’u: Tumetubuusku si matou-tou, wo eng kesampetanna Nisia si laa tumo’ori witu atas e riawu. ²⁶ O kangkasi nu reiy’ mouw eng kuli’ nouwakeku eng kasa minateri, reiy’ ampit e le’onaku tu’u ku laa lumoo’ si Empung, ²⁷ e niaku nuesa ku laa lumoo’ si laa maedo-edo niaku; em berenku nuesa e lumoo’ola-Nisia wo e reiy’ tou walina. Em pusu’ nateku en timekur karengan e lelo. ²⁸ Sa kouw lumila’: Nikeiy keiy laa kume’i nisia wo matola wia nisia em poong em perkarana!, ²⁹ meide’ mouw wia en santi, karengan eng kaupi’an e mapa eiy nukuman en santi, rio kouw mete’u, kaa wawean paadilan.”