¹ Takar si Bildad, tou en Suah, si miningkot: ² “Kawisa ku’a re’en koo sumampet mesesusuiy? Ghenangenola, tare mouw keiy laa sumusuiy. ³ Ka’a keiy i papokeiyla tekapen? Ka’a keiy we’engel witu em paloo’annula? ⁴ Nikoo si rima’akep en toumu nuesa witu eng kaupi’an, demi em pe’ukumennu ku’a re’en em bumi e lewo’ sa reiy’ mapenes, wo eng kuntung watu e minensongi waki tampana? ⁵ Ma’anouw kumura tu’u kangkasi en terang ne tou fasik en tantu mate, wo e layas napina e reiy’ minena-ena’ masena’. ⁶ En terang witu eng gorem en dasingna e minareiydem, wo em barung witu natasna e mate. ⁷ Ke’angna eng kaente’ eng kinaape’an, wo em pemili-milingenna nuesa eng kima’anula nisia. ⁸ Karengan e ne’ana nuesa en simangkongla nisia witu em pure’eket, wo witu natas em pepenet pemo’opot sia makelang. ⁹ Tu’umirna eng kinasikopan em palewo’, wo nisia si kinetaangan em be’etes. ¹⁰ Tali neiy i kakirong i wee nisia witu en tana’, en torak neiy i keta’an i wee nisia witu e lalan patoroannala. ¹¹ Kahebatan en sumenge’la nisia wisa –wisa i te, wo mekeki’it nisia wisa i te kangkasi sia kume’ang. ¹² Bencana e mepa’arla nisia, kapunengan e meniro-niro’ mengena-ngena’la nisia i ka’anu. ¹³ Kuli’ e nouwakna eng kinaan e rumara, awes tare e weteng e nouwakna eng kinaan e rumara kasa. ¹⁴ Sia si kineongi waki dasingna, en tampa sia nu mapedam aman, wo niali wia si raja kahebatan. ¹⁵ Witu en dasingna en timele’u sapa e reiy’la minake’itanna ampit nisia, witu natas en tampa paena’anna e winu’uwurala em balelang. ¹⁶ Witu e wawa’ em pera mouw eng kalat-kalatna, wo witu natas e welesouw em pangana. ¹⁷ Eng genang wia nisia minere’imi waki bumi, ngarana e reiy’ mouw kasi tinotor wia e lorong-lorong. ¹⁸ Sia si neiy i ure’mi waki tampa terang mea witu eng kareiydeman, wo nisia si rine’imi waki kaoatan. ¹⁹ Sia si reiy’ laa makapunyala oki’ ka’apa puyun o cici witu e nelet ne bangsana, wo e reiy’ siesa tou tu’u si timele’u matou-tou witu en tampa paena’anna. ²⁰ Witu nendo em pateanna se tou-tou waki Talikuran se laa i kenganga, wo se tou-tou waki sendangan se laa teka’anla eng kineide’an. ²¹ Nulit, tuana mouw en tampa paena’an ne tou wiles, tuana mouw en tampa paena’an ne tou se reiy’ sumine’u si Empung.”