¹ Ta’an si Ayub si miningkot: ² “Kapualitan i ti’i e re’ereghouw lelingangku. Meibor e kombengen nikouw nu waya! ³ E reiy’pe’ mina’apu ku’a re’en e lo’odegh i ti’i? Sapa en simareinsengla nikoo kaa laa mapero? ⁴ Niaku tu’un ku toro sumusuiy tanu nikouw, sa wona’na kouw witu en tampaku; niaku ku laa sumiwo e lelila’an-lelila’an wangun witu nikouw, wo menguyu-ngyungla eng kokong witu nikouw. ⁵ Niaku ku laa kumeterla e natemu ampit en suma, wo e reiy’ meketaang en sumpingku melelila’la en tongkoupusen. ⁶ Ta’an sa aku sumusuiy, em peme’itangku e reiy’ laa mawure’, wo sa aku menes en tou, sapa ku’a re’en neiy i kaliong waki niaku? ⁷ Ta’an en teakan, Sia si simiwo mola niaku mawedu wo timabuke’isla em pakasa’an e rumah tanggaku, ⁸ simikopola niaku; nyi’i mouw e minamuali sairi; karukusangku en timo’oromi mature niaku. ⁹ Nupi’-Na e mera’akep wo mesarula niaku, Sia si kimare’eketla em ba’angna witu niaku; kesaruku si matu’usla niaku ampit em beren e maapi-api. ¹⁰ Nisea se ngimangala en suma nea mesaru niaku, simepe’ eng kereku ampit en sesero’an, wo mewali-wali minuyutla niaku. ¹¹ Empung si simarakan niaku wia se tou wengi’is, wo limenta’la niaku witu e lawas ne tou fasik. ¹² Niaku ku matou-tou ampit en dame, ta’an Nisia si mebalisala niaku, niaku ku sinikop-Na witu e lo’ongku, laa o i wansal-Na, wo niaku ku neiy i walinto’or-Nala minamuali sesarapen-Na. ¹³ Niaku ku winale’ewekla em pana, watu-watuku e linampat-Na ampit e reiy’ makasine’u en tongkoupusen, peruku neiy i wa’awar-Nala witu en tana’. ¹⁴ Sia si minengisi-ngisi’ niaku, marego niaku tanu mokan siesa pejuang. ¹⁵ Eng kaneki neiyku mouw i wilitla witu eng kuli’ku, wo en sesungeku e neiyku i ghoremla witu eng gorem riawu; ¹⁶ gioku e mea’ karengan e miname’, wo em pepi’ipitku em pinorongla eng kasa ribe’ebeng, ¹⁷ ma’anouw tu’u e reiy’la kawengi’isan witu e lawasku, wo en sombayangku em beresi. ¹⁸ Heiy bumi, te’a mouw mepepenetla e raa’ku, wo te’a mouw satorona e rekeiyku e maka’ato tampa paena’an! ¹⁹ Kete’uanola, en teakan i te tu’u kangkasi, Sairiku si waki surga, Si minee kasairian i wee niaku si waki tampa kasa rakek. ²⁰ Ma’anouw tu’u niaku ku sinero’ala ne kalo-kaloku, ta’anouw en timorome si Empung em berenku kima’at kasuatan maame’, ²¹ rio Sia tumenggolela em perkara e nelet ni tou ampit si Empung, wo e nelet ni tou ampit si kasuatna. ²² Karengan en toyo’ eng kelakerna en te’un laa meiy, wo niaku ku laa tumoro e lalan, waki wisa niaku ku reiy’ mouw marengi kasi.